އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަދި ފަލަސްތީނުގެ ހަމާސްގެ ލީޑަރުން ހައްޔަރު ކުރުމުގެ އަމުރެއް ހޯދަން އިންޓަނޭޝަނަލް ކްރިމިނަލް ކޯޓުގެ ޕްރޮސެކިއުޓަރުން މިއަދު ހުށަހަޅައިފި އެވެ.

އައިސީސީގެ ޕްރޮސެކިއުޓަރު ކަރީމް ހާން މިއަދު ބުނީ ނަތަންޔާހޫގެ އިތުރުން އިޒްރޭލުގެ ޑިފެންސް މިނިސްޓަރު ޔޯއާވް ގަލަންޓް ހައްޔަރު ކުރުމުގެ އަމުރަކަށް ވެސް އެދިފައިވާނެ ކަމަށެވެ.

ހަމާސްގެ ލީޑަރުންގެ ތެރެއިން ހައްޔަރު ކުރަން އެދިފައި ވަނީ ހަމާސްގެ ލީޑަރު ޔަހްޔާ ސިންވާރް އާއި ހަމާސްގެ މިލިޓަރީ ވިންގުގެ ކޮމާންޑަރު މުހައްމަދު ދިއާބް އިބްރާހިމް އަލް-މަސްރީ އަދި ހަމާސްގެ ޕޮލިޓިކަލް ބިއުރޯގެ ހެޑް އިސްމާއިލް ހަނީޔޭ އެވެ.

ނަތަންޔާހޫ އަދި އޭނާގެ ޑިފެންސް މިނިސްޓަރު ހައްޔަރު ކުރަން އެދިފައި ވަނީ ހަނގުރާމައިގެ އުކުޅެއްގެ ގޮތުގައި ބޭނުންކޮށް އިންސާނުން ބަނޑަށް ޖެއްސުން، ގަސްދުގައި މީހުން ހާލުގައި ޖައްސައި، ގަސްދުގައި މީހުން މެރުން، ހަނގުރާމައެއްގެ ތެރެއިން މަދަނީން މެރުން އަދި އިންސާނިއްޔަތާ ހިލާފު އަމަލުތައް ހިންގާފައިވާތީ އެވެ.

ކްރިމިނަލް ކޯޓުގެ ޕްރޮސެކިއުޓަރުން ބުނެފައި ވަނީ ހަމާސްގެ ލީޑަރުން ހައްޔަރު ކުރަން އެދުނީ ބަޔަކު ނައްތާލުން، މީހުން މެރުން، ރަހީނު ކުރުން، ރޭޕު ކުރުން އަދި ލާއިންސާނީ އަމަލު ހިންގިކަމުގެ ތުހުމަތުގައި ކަމަށެވެ.

އޮކްޓޯބަރު 7، 2023، ގައި އިޒްރޭލުން ފެށި ގަތުލްއާންމުގައި ފަލަސްތީނުގެ 34،000 އަށް ވުރެ ގިނަ މީހުން ވަނީ މަރާލައިފަ އެވެ. އޭގެ ތެރޭގައި އެންމެ ގިނައީ އަންހެނުންނާއި ކުޑަކުދިންނެވެ. އިޒްރޭލުން ވަނީ ފަލަސްތީނުގެ ގނަ ހޮސްޕިޓާތައް ބިމާ ހަމަކޮށްފަ އެވެ. އެ ގައުމުން ގެންގުޅެނީ ނަސްލު ނައްތާލުމުގެ އުކުޅުތަކެކެވެ.