އަވަސް އެޕް އަދި އަވަސް ރައިޑުން ޓެކްސީކުރާ އަގުތައް ވެސް ޓްރާންސްޕޯޓް މިނިސްޓްރީން ކަނޑައަޅާފައިވާ އަގަށް މިއަދު ބަދަލުކޮށްފި އެވެ.

އަވަސް އެޕްއިން ބުނީ މެއި 14، ގައި މާލެ ސަރަހައްދުގައި ޓެކްސީކުރާ އަގުތަކަށް މިނިސްޓްރީން ގެނައި ބަދަލާއެކު އަވަސް އެޕް އަދި އަވަސް ރައިޑުން ވަނީ އާ އަގުތަކަށް އަމަލުކުރަން ފަށާފައި ކަމަށެވެ.

ކަނޑައަޅާފައިވާ އާ އަގުތަކަށް އެ އެޕްލިކޭޝަންތައް ބޭނުންކޮށްގެން ޓެކްސީގެ ހިދުމަތް ދޭ ފަރާތްތަކުން އަމަލު ކުރޭތޯ ވަރަށް ގާތުން ބަލަމުން ދާނެ ކަމަށް އަވަސް ރައިޑުގެ މެނޭޖްމެންޓުން ވަނީ ބުނެފަ އެވެ.

"ގަވާއިދަށް ގެނައި ބަދަލާއި އެކު އަވަސް ޓީމުން މިނިސްޓްރީއަށް އެއްބާރުލުން ދޭނެ ވާހަކަ ދަންނަވަން،" އަވަސް އެޕުން ބުނެ އެވެ.

އަވަސްގެ ދެ އެޕްލިކޭޝަން ކަމަށްވާ އަވަސް ރައިޑު އަދި އަވަސް އެޕްގަ ވެސް ޓެކްސީތަކުގެ އަގުތައް ފަސޭހައިން ފެންނާނޭ ކަމަށް ވެސް އެ ކުންފުނިން ބުނެ އެވެ.

ގަވާއިދާ ހިލާފަށް ޓެކްސީ ދަތުރުތަކަށް ފައިސާ ނަގަމުންދާތީ، އާންމުން ޝަކުވާ ކުރަމުންދާކަން ފާހަގަކޮށް ގަވާއިދާ ހިލާފަށް ހަރަކާތްތެރިވާ ޓެކްސީތައް ރިޕޯޓު ކުރުމަށް އަވަސް އިން ވަނީ އެދިފަ އެވެ.

މިހާތަނަށް އާ އަގުތަކަށް އެންމެ ފުރަތަމަ އަމަލު ކުރަންފަށާފައި ވަނީ އަވަސް އިންކަން ފާހަގަކޮށްލެވެ އެވެ.

ރާއްޖޭގައި ޓެކްސީގެ ހިދުމަތްދެމުންގެންދާ އެންމެ ބޮޑު އެއް ކުންފުނި ކަމުގައިވާ އަވަސް ރައިޑް އިތުރު ހިދުމަތްތަކާއެކު އަވަސް އެޕަށް ބަދަލުކޮށް 2،000 އަށް ގިނަ ޑްރައިވަރުންނާއި، އެތައް ސަތޭކަ ހާސް ކަސްޓަމަރުންނާއިއެކު ވަނީ ރީބްރޭންޑްކޮށްފަ އެވެ.