"މި ދެންނެވި ނުވަ ލައްކަ އަކަ ކިލޯ މީޓަރުގެ ބޮޑު ސަރަހައްދަކީ، ދެން މީގެ ފަހުން ހަމަ ކޮންމެ ވަގުތުކޮޅެއްގައި ވެސް އަޅުގަނޑުމެންގެ ސާވޭލަންސްގެ ދަށުން ބެލެހެއްޓޭނެ ސަރަހައްދެއްކަން، އެގޮތަށް ހާލުގައި ޖެހޭ މީހުން ހޯދުމުގައި، އިސާހިތަކު އެކަން ކާމިޔާބު ކުރެވޭނެކަމުގެ ޔަގީންކަން އަޅުގަނޑުމެންނަށް އިރާދަކުރެއްވީތީ މި ލިބިގެން ދިޔައީ."

އެމްއެންޑީއެފްގެ އެއާ ކޯ އިފްތިތާހު ކުރުމާއި، އަންމޭންޑް އޭރިއަލް ވެހިކަލް (އޫއޭވީ/ޑްރޯން) ސިފައިންގެ ހިދުމަތަށް ތައާރަފް ކުރުމަށް މާޗު 15، 2024 ގައި ނ. މާފަރުގައި ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވި މި ވާހަކައިން އަހަރެން ފަހުރުވެރިވި އެވެ. ސަބަބަކީ މި ސިޓީގައި އިހި ނަގަން މޫދަށް އެރިއުޅުނު މަރަދޫ، ކުރެދުމާގޭ، މުހައްމަދު ނައީޝް، 18، ފެނިފައި ނުވުމާއި، ކަނޑުމަތީގެ ހާދިސާތައް ހިނގާލެއް ގިނަވެ، މީހުންނާއި އުޅަނދުފަހަރު ގެއްލޭތީ އެވެ.

އެހެންވެ، ރައީސް މުއިއްޒު މި ވާހަކައިން ތަސައްލީ ލިބިގެން ދިޔަ އެވެ. "ހާލުގައި ޖެހިގެން ހޯދަންޖެހޭ މީހާ ނުހޯދިގެން މީގެ ކުރިން އުޅެންޖެހުނުހާ ގިނަ ވަގުތު، ދެން އުޅެންނުޖެހޭނެކަން ޔަގީންވެގެން އެބަދޭ."

މި ހުރިހާ ވާހަކައަކުން އަހަރެންގެ ސިކުނޑީގައި ހަރުލީ ޑްރޯންތައް އަބަދު ވެސް މަތީގައި އުދުހެމުންދާނެ ކަމެވެ. މަސްވެރިން މާކަނޑުގެ ބިޔަ ރާޅުތަކުގައި ދުއްވަމުން ދާއިރު ފާރަވެރިޔަކަށް ޑްރޯންތައް ވާނެ ކަމަށެވެ. ރާއްޖޭގެ ސަލާމަތާއި ރައްކާތެރިކަމަށްޓަކައި ނުރައްކަލެއްގެ ލިސާނެއް ވިޔަސް އެނގޭނެ ކަމަށެވެ. ދޯންޏެއް، މީހެއް ކަނޑުމައްޗަށް ގެއްލުނަސް، އަޑިޔަށް ދިޔަޔަސް، ރައީސް ވިދާޅުވި ގޮތުން ޑްރޯންތަކުގެ ގާބިލުކަމުން ހިސާހިތަކު ފެންނާނެ ކަމެވެ. އެހެންވެ، އެފަދަ ހާދިސާތަކުން ލިބޭ ހިތާމަ ނިމުމަކަށް އައީ ކަމަށް ގަބޫލު ކުރެވުނެވެ.

ސިޓީބިޓީ ކޮލަމް އަށް މި ލިޔުން ފޮނުވަން ޖެހުނީ، މާލެ އަތޮޅު ތިލަފުށިން ފުރައިގެން މުލަކު އަތޮޅަށް ދަތުރުކުރަމުން ދިޔަ ދޯންޏެއްގައި ދިވެއްސަކާއެކު ޖުމުލަ ހަތަރު މީހުން ތިބިއިރު، އެ ދޯނި ގެއްލުނުތާ 48 ގަޑިއިރުވީއިރު ވެސް ޑްރޯންތައް ބޭނުންކުރާ ވާހަކަ އަޑު ނީވޭތީ އެވެ.

އެއީ އަހަރެމެންގެ ބަޖެޓުގައި ކުއްލި ހާލަތެއްގައި އަތްލާން ހުރި ފައިސާއިން 37 މިލިއަން ޑޮލަރު (570 މިލިއަން ރުފިޔާ) ހަރަދުކޮށްގެން ހޯދި ޑްރޯންތަކެކެވެ. އެ ޑްރޯންތަކުގެ ގާބިލުކަމާއި އެކަމާ ގުޅޭ ގޮތުން ރައީސް ދެއްވެކި ވާހަކަތައް ފަހުރަކަށް ވާނީ އެ ތަކެތީގެ ބޭނުމާއި ފައިދާ ފެނި، ކަށަވަރު ވެގެންނެވެ.

ރައްޔިތުންގެ މަޖިލީހުގެ އިންތިހާބަށް އެއް ދުވަހަށް ވެފައި އޮއްވައި، މާޗު 20، 2024 ގައި، އޭރު ގެއްލިގެން އުޅުނު ދޯނި ހޯދީ ޑްރޯން ބޭނުންކޮށްގެން ކަމަށް އެމްއެންޑީއެފުން ބުނެފައިވެ އެވެ. އެއީ ހަމަ މ. އަތޮޅެވެ. ހަމަ ރަތްމެންދޫ ބޭރެވެ. އެފަހަރު ހޯދީ 440 އަކަ ނޯޓިކަލް މޭލެވެ. އެހެންވެ، ޑްރޯންގެ ގާބިލްކަމާއި ވަގުތު ސަލާމަތް ކުރެވުނުކަން އެބަ އެނގެ އެވެ. މިފަހަރު ވެސް މ. އަތޮޅުވެ. ރަތްމެންދޫ ބޭރެވެ. މިފަހަރު ޑްރޯން ބޭނުން ނުކުރަނީ ކީއްވެ ހެއްޔެވެ. ޑްރޯންތައް އަބަދު މަތީގައި ނޯވޭ ހެއްޔެވެ؟ ސަބަބަކީ ކޮބައިހެއްޔެވެ. މި ކަންކަމަށް ސަރުކާރާއި، އެމްއެންޑީއެފުން ބަހެއް ބުނެލަދީ ބަލާށެވެ. މި ވާހަކަ އެ ފަރާތްތަކާ ހަމައަށް ގެންގޮސްދީބަލާށެވެ.

ދީދީ، އައްޑޫ ސިޓީ

ސިޓީބިޓީ

ސިޔާސަތާ މެދު ފާޑެއް ކިޔަން އޮތީ ހެއްޔެވެ؟ ކަމެއް އިސްލާހުކުރަން މުއައްސަސާއެއްގެ ސަމާލުކަމަށް ގެންނަން ބޭނުންވަނީ ހެއްޔެވެ؟ ޝަކުވާއެއް ބޮޑުވެ އާއްމުންނާ ހިއްސާކުރަން ބޭނުންވީ ހެއްޔެވެ؟ އެހެން ކަމެއްގައި ވިޔަސް ހިޔާލެއް ހިއްސާކުރަން ބޭނުން ހެއްޔެވެ؟

ކިޔުންތެރިންގެ ހިޔާލާއި ފިކުރު މުޖުތަމައުގެ ތެރެއަށް ދޫކޮށްލުމަށް "އަދަދު"ން ތަނަވަސްކޮށްދީފައި ވަނީ "ސިޓީބިިޓީ" އެވެ. ހިޔާލުތައް ލިޔުމަށް ތިރިކޮށްލުމަށް ފަހު، "އަދަދު"ގެ އެޑިޓަރަށް އެޑްރެސްކޮށް [email protected] އަށް އީމެއިލްކޮށްލާށެވެ.