ރޯމް (މެއި 16) - އިޓާލިއަން ކަޕްގެ ފައިނަލުގައި އެޓަލަންޓާ 1-0 އިން ބަލިކޮށް، ޔުވެންޓަސް އިން ތިން ސީޒަނުގެ ތެރޭގައި ހޯދި ފުރަތަމަ ތަށްޓާ އެކު، ހިތްހަމަޖެހުމެއް ހޯދައިފި އެވެ.

މެޗުގައި ފެނިގެންދިޔަ ހަމައެކަނި ލަނޑު ޖެހީ، ހަތަރު ވަނަ މިނިޓްގައި ޔުވެންޓްސްގެ ސާބިއާ ފޯވާޑް، ޑޫސާން ވްލާހޮވިޗް އެވެ. އޭނާ މި މެޗުގައި ރަނގަޅު ކުޅުމެއް ދެއްކިއިރު އިތުރު ލަނޑެއް ވެސް ޖެހި އެވެ. އެ ލަނޑު ބަލައިނުގަންނަން ނިންމީ އޮފްސައިޑް ވުމުންނެވެ.

ޔުވެންޓަސްގެ ޑިފެންޑަރު، ގްލެއިސަން ބްރެމާގެ މޮޅު ކުޅުމާ އެކު، އެޓަލަންޓާގެ އެޓޭކްތައް ހުއްޓުވުމުގައި ކާމިޔާބު ލިބުނެވެ. އެޓަލަންޓާ އަށް ލަނޑެއް ޖަހައިދޭން އަޑެމޯލާ ލުކްމަން ކުރި މަސައްކަތް ކާމިޔާބެއްނުވި އެވެ.

ދެ ޓީމުން ވެސް މެޗުގެ ފަހުކޮޅުގައި ބަދަލުތަކެއް ގެނެސްގެން ލަނޑެއް ޖެހޭތޯ ބެލި އެވެ. އެކަމަކު، އޭގެއިން މަސައްކަތެއް ދެ ވަނަ ހާފުގައި ކާމިޔާބެއްނުވި އެވެ.

މިއީ ޔުވެންޓަސް އިން އިޓާލިއަން ކަޕް ކާމިޔާބުކުރި 15 ވަނަ ފަހަރެވެ. ޔުވެންޓަސް އަކީ މި މުބާރާތް އެންމެ ގިނައިން ކާމިޔާބުކުރި ޓީމެވެ. އެންމެ ފަހުން އެ ޓީމުން މި މުބާރާތުގެ ތަށި އުފުލާލީ، 2021 ވަނަ އަހަރު އެވެ. ދެ ވަނަ އަށް އެންމެ ގިނަ ތަށި އޮތީ، ނުވަ ފަހަރު ކާމިޔާބުކުރި ރޯމާ އާއި އިންޓަ މިލާން އަތުގަ އެވެ.

މިއީ ޔުވެންޓަސްގެ ކޯޗު، މެސިމޯ އަލެގްރީ، އިޓަލީގެ ފުޓްބޯޅައިގައި ހޯދި 14 ވަނަ ތަށްޓެވެ.