ނ. ވެލިދޫ ވޭސްޓް މެނޭޖްމަންޓް ސެންޓަރުގައި ރޯވެ، އިމާރާތުގެ ބޮޑު ބަޔަކާއި އެ ތަނުގައި ހުރި މެޝިންތަކެއް ބޭނުން ނުކުރެވޭ ވަރަށް އަނދައިފި އެވެ.

މީގެ ދެ އަހަރު ކުރިން ބިނާކުރި އެ ސެންޓަރުގައި އަލިފާން ރޯވީ މިއަދު މެންދުރުގެ ވަގުތެއްގަ އެވެ. އަލިފާން ރޯވި ސަބަބެއް އަދި ނޭނގެ އެވެ.

ވެލިދޫ ކައުންސިލުން ބުނީ އަލިފާން ރޯވިތާ ދެ ގަޑިއިރެއްހާ އިރު ތެރޭ ނިއްވާލާފައިވާ ކަމަށެވެ.

"ސެންޓަރުގައި ބޭނުންކުރަމުން ގެންދާ ބައެއް މެޝިނަރީޒް އާއި ފުޓުބޯޅަދަނޑުގައި ބޭނުން ކުރަމުންގެންދާ ޑްރެގް ބްރަޝް މެޝިންވެސް ވަނީ ހަލާކުވެފަ،" އެ ކައުންސިލުން ކުރި ޕޯސްޓެއްގައިވެ އެވެ.

ވެލިދޫ ވޭސްޓް މެނޭޖްމަންޓް ސެންޓަރުގައި އަނދާފައި މެޝިނަރީއެއް - ފޮޓޯ: ވެލިދޫ ކައުންސިލް

އަލިފާން ނިއްވާލީ ރަށު މީހުންގެ އިތުރުން އެ ރަށް ކައިރީ އޮންނަ ޝެވަލް ބްލޮންކް ރަންދެލި ރިސޯޓުންނާއި ވެލާ ޕްރައިވެޓް އައިލެންޑް ރިސޯޓުންނާއި ސިޔާމް ވޯލްޑުން ދިން އެހީތެރިކަމާ އެކު ކަމަށް ރަށު ކައުންސިލުން ބުންޏެވެ.