"މާލެ" އޭ ބުނެފި ނަމަ އަހަރުމެންގެ ސިކުނޑިއަށް އެއްވެސް ބުރަކަމެއް ނެތި ތަސައްވުރުކޮށްލެވޭނީ، މިގައުމުގެ ވެރިކަން ކުރާ ރަށުގެ, އުސް އިމާރާތްތަކާއި ތޮއްޖެހިފައިވާ ހަލަބޮލި މަގުތައްކަން ކަށަވަރެވެ. އެކަމަކު "މާލެ" ގެ ނަން ދެވިފައިވާ އެހެން ސަރަހައްދެއް ވާކަން ދެނަހުރީ ރާއްޖޭގެ ކިތައް މީހުންބާވައެ؟ މިއީ އިޓަލީގައި ވާ ކުޑަ ނަމަވެސް ރީތި ސަރަހައްދެކެވެ. މިއަދު މި މަސައްކަތްކޮށްލަނީ މި ދިވެހިރާއްޖެއާއި އެތައް މޭލެއް ދުރުގައި އޮތް، އެހެންނަމަވެސް ނަމުން ގުޅިފައިވާ މި މާލެ ސިފަކޮށްލަދިނުމަށެވެ.

ވިސްނުމަށް ގެންނަވާށެވެ. ގަސްގަހާއި މާމެލާމެލިން ތަނަވަސްކަން ގެނެސްދޭ މަގުތަކެކެވެ. އެ މަގުތަކުގައިވާ އެކި ކުލަކުލައިގެ ދެތިން ބުރީގެ އިމާރާތްތަކެވެ. އަދި ރީއްޗަށް ފަރުމާކުރެވިފައިވާ ފުރާޅުތަކުގެ މަތިން ފެންނަ ސާފު ނޫ އުޑެވެ. މިއީ އިޓަލީގެ މާލެ އެވެ. އިޓަލީގެ "ވަލް ޑި ސޯލް" ނުވަތަ އިރުގެ ވާދީގައި ވާ ޓައުނެކެވެ. މި ވާދީ އޮންނަނީ އުތުރު އިޓަލީގެ ތްރެންތީނޯ-އަލްޓޯ އާދިޖެ ޝުދްތިރޮލް ސަރަހައްދުގަ އެވެ.

މާލޭގެ މަގެއް. ފޮޓޯ: ލިބަޓީ ހޮޓެލް

އަހަރުމެންގެ ހަލަބޮލި މާލެއާ ހިލާފަށް އިޓަލީގެ މާލެ އަކީ އަމާންކަމުގެ ރޯޅިތަކުން މަގުތައް ފަޅުފިލުވާލާފައިވާ ތަނެކެވެ. މިތަނަށް ޒިޔާރަތްކުރާ ކޮންމެ މީހަކަށް ވެސް މިތަނުގެ ރީތިކަމުން ހިތަށް ފިނިކަން ލިބޭނެކަން ކަށަވަރެވެ. ފަތުރުވެރިންގެ މެދުގައި އެހާ މަގުބޫލު މަންޒިލަކަށް ވެސް މި މާލެވެފައިވާ ސަބަބަކީ، މި އަމާންކަމާއި ގުދުރަތީ އަދި ބިނާރުގެ ރީތިކަމެވެ. ހަމައެއާ އެކު އިޓަލީގެ މުއްސަދި ސަގާފަތުން ވެސް މާލޭގެ ފޮނިކަން އިތުރުކޮށްދެ އެވެ.

ބޮޑުމިނުގައި ގާތްގަނޑަށް 27 ކިލޯމީޓަރު ހުންނަ މި މާލޭގައި ދިރިއުޅެނީ ދެ ހާހެއްހާ މީހުންނެވެ. ކުޑަ ޓައުނެއް ނަމަވެސް މާލެގައި ހަ އަވަށް އޮވެ އެވެ. އެއީ މަގްރާސް، އަރަންގޯ، ބޮލެންޓީނާ، މޮންޓޭސް، ޕޮންޑާސިއޯ އަދި މޮލީނީ އެވެ. މިފަދަ ކުޑަ ތަނެއްގެ ކުޑަ އާބާދީއާ އެކުވެސް މާލޭގެ އިގްތިސޯދު މިއަދާ ހަމައަށް ވެސް އޮތީ ވަރަށް ވަރުގަދަކޮށެވެ. އެގޮތުން އިގްތިސޯދުގެ އެންމެ މައިގަނޑު ތިން އަސާސަކަށް ވެފައިވަނީ ފަތުރުވެރިކަމާ، ދަނޑުވެރިކަމާ އަދި އަތްތެރިމަސައްކަތްތަކެވެ.

މާލެ

މީގެ ތެރެއިން ވެސް އެންމެ ބޮޑު އާމްދަނީއެއް މާލެއަށް ގެނެސްދެނީ ފަތުރުވެރިކަމުންނެވެ. އެގޮތުން ގިނަ އަދަދެއްގެ ފަތުރުވެރިން މާލޭއާ މާލޭގެ ވަށައިގެންވާ މާހައުލުގެ ރީތިކަން ދެކިލުމަށާ، ސަގާފަތް ތަޖުރިބާކޮށްލުމަށް އެތަނަށް ޒިޔާރާތްކުރެ އެވެ. ދެލައްކަ މީހުންގެ އާބާދީއެއްވާ ޓެރެންޓޯ ސިޓީއާ މާލެއާ ދެމެދު އޮންނަ ރެއިލްވޭގެ ސަބަބުން ފަތުރުވެރިކަމަށް ވަނީ އިތުރު މުއްސަދިކަމެއް ލިބިފަ އެވެ.

މާލޭގެ ވަށައިގެންވާ ގުދުރަތީ ރީތިކަމަކީ އެންމެ ގިނަ ފަތުރުވެރިން ޒިޔާރާތްކުރާ ސަބަބެވެ. މާލޭގެ ކައިރީގަވާ ސްޓެލްވިއޯ ނޭޝަނަލް ޕާކަކީ އިޓަލީގެ އެންމެ ބޮޑު އެއް ގުދުރަތީ ޕާކެވެ. މީގެ އިތުރުން ޔުނެސްކޯ ވޯލްޑް ހެރިޓޭޖެއްކަމަށްވާ ބްރެންޓާ ގްރޫޕްގެ ނަންދެވިފައިވާ ފަރުބަދަތަކެއް ވެސް އެ ސަރަހައްދުގައިވެ އެވެ. ގުދުރަތުގެ މި އަޖައިބުތަކާ އެކު މާލޭގައި ކުރިއަށްދާ އެކި ހަރަކާތްތަކުން ދަތުރުކުރާ ފަރާތްތަކުގެ ވަގުތާއި ހިތްތައް ފަޅުފިލުވާލަ އެވެ. މާލެއަކީ ބައެއް ކުޅިވަރުތަކަށް ވެސް މަގުބޫލުވެފައިވާ ތަނެކެވެ. އެގޮތުން މާލޭގައި ވަނީ މައުންޓެއިން ބައިކްގެ ބައެއް މަގުބޫލު މުބާރާތްތައް ބާއްވާފަ އެވެ.

ސްޓެލްވިއޯ ނޭޝަނަލް ޕާކް

އަހަރުމެންގެ ރާއްޖެއާ ކިތަންމެ ދުރުގައި އޮތް ތަނެއްކަމުގައި ވިޔަސް، ދިވެހިންގެ މެހެމާންދާރީކަމާއި، ފަތުވެރިކަމަށް މަގުބޫލު މަންޒިލަކަށް ވުން ފަދަ ބައެއް ކަންކަން މި މާލެއިން ވެސް ފެނެ އެވެ. އިޓަލީގެ މާލޭގެ ރައްޔިތުން، އެތަނަށް ޒިޔާރާތްކުރާ ފަރާތްތަކަށް މަރުހަބާ ކިޔަނީ ހަމަ އަހަރުމެންވެސް މަރުހަބާ ކިޔާހާ ހޫނުކޮށެވެ. އަމިއްލަ ސަގާފަތާއި ވަސީލަތްތައް ހިއްސާކުރުމަށް ތައްޔާރު ހާލަތުގަ އެވެ. އެހެންކަމުން ދެން މާލޭ ގެ އަޑު އިވެއްޖިނަމަ، އަހަރުމެންގެ ހަލަބޮލި މާލޭގެ އިތުރަށް، ހިތް ފަސޭހަ މާލެއެއްވާ ކަންވެސް ހަނދާންވާނެ ކަމަށް އުންމީދުކުރަމެވެ.