ފީފާ އިން ފުރަތަމަ ފަހަރަށް ނެރުނު ފުޓްސަލް ރޭންކިންގައި ރާއްޖޭގެ ފިރިހެން ގައުމީ ޓީމު، 110 ވަނައިގައި ހިމެނިފައިވާއިރު، ދެކުނު އޭޝިއާގެ ގައުމުތަކުގެ ތެރެއިން ތިން ގައުމެއް ރޭންކްކޮށްފައިވެ އެވެ. އޭގެ ތެރެއިން، އެއް ވަނައިގައި އޮތީ ރާއްޖެ އެވެ.

ރާއްޖޭގެ ގައުމީ އަންހެން ފުޓްސަލް ޓީމެއް މެޗެއް ވެސް ނުކުޅޭތީ ރޭންކިންގައި ނެެތެވެ.

އިއްޔެ، ފީފާ ރަސްމީ ވެބްސައިޓުގައިވަނީ މުޅިން އަލަށް ފުޓްސަލް އިން ގައުމުތަށް ރޭންކްކޮށްފަ އެވެ. އެ ގޮތުން، ޖުމްލަ އެކު، 139 ގައުމެއް ވަނީ ރޭންކްކޮށްފަ އެވެ.

މި ރޭންކިންގައި ރާއްޖޭގެ ފިރިހެން ގައުމީ ފުޓްސަލް ޓީމު، ހިމެނެނީ 110 ގަ އެވެ. އެއީ އޭޝިއާ އަށް ބަލާއިރު، 27 ވަނައިގަ އެވެ.

ރޭންކިންގައި، ދެކުނު އޭޝިއާ (ސާފް)ގެ ގައުމުތަކަށް ބަލާއިރު، ރާއްޖެ ފަހަތުން، ނޭޕާލް، 121 ވަނައިގައި އޮތްއިރު، އިންޑިއާ އޮތީ 135 ވަަނައިގަ އެވެ. މި ސަރަހައްދުން އިތުރު ގައުމެއް ރޭންކްކޮށްފައިނުވެ އެވެ.

ރާއްޖެ ރޭންކިންގައި ސަރަހައްދުގެ ކުރީގައި އޮތީ ވޭދުވެދިޔަ ދެތިން އަހަރު އޭޝިއަން ފުޓްސަލް ކަޕް ކޮލިފައިންގައި ނެރެފައިވާ ނަތީޖާތަކާ އެކު އެވެ.

ރާއްޖޭން އޭޝިއާގެ ކޮލިފައިން މެޗުތަކުގައި ސްކޯ އިން ހޯދި ކުރިއެރުމާއި އެހެނިހެން ކަންކަމަށް ބަލާފައި، ނެގި ކޯއެފިޝެންޓް ރޭންކިން ޕޮއިންޓްސް އަށް ބަލާއިރު ތަފާތު ދައްކާފައިވެ އެެވެ. ޖުމްލަ ޕޮއިންޓްގެ ގޮތުގައި، ރާއްޖެ އަށް ވަނީ 905.56 ޕޮއިންޓް ލިބިފަ އެވެ.

ރޭންކިން ކަނޑައެޅިފައި އޮތްގޮތަށް ބަލާއިރު،މ ދުނިޔޭގެ ފުޓްސަލް އެއް ވަނައިގައި އޮތީ ބްރެޒިލް އެވެ. ދެ ވަނައިގައި ޕޯޗުގަލް އޮތްއިރު، ތިން ވަނައިގައި އޮތީ ސްޕެއިން އެވެ، ހަތަރެއްގައި އޭޝިއާގެ ގަދަބާރު އިރާން އޮތްއިރު، ފަސް ވަނައިގައި އޮތީ އާޖެންޓީނާ އެވެ. ގަދަ ދިހައެއްގައި ހިމެނޭ ބާކީ ފަސް ގައުމަކީ، މޮރޮކޯ، ރަޝިއާ، ކަޒަކްސްތާން، ތައިލެންޑް އަދި ފްރާންސް އެވެ.