ކުރިއަށް އޮތް މަޖިލިސް އިންތިހާބުގައި ޕީއެންސީގެ ޓިކެޓުގައި ތިމަރަފުށީ ގޮނޑިއަށް ވާދަކުރާ ކެންޑިޑޭޓު ބާކީކޮށް ރައީސް ޑރ. މުހައްމަދު މުއިއްޒު ތާއީދު ކުރައްވާ ކެންޑިޑޭޓު، އަހުމަދު ރިޔާޒުގެ ކެމްޕޭނު ޖަގަހަ ހުޅުވުމަށް އެރަށަށް ސަރުކާރުގެ ދެ މިނިސްޓަރުން ދިޔުމުން އެރަށު ޕީއެންސީ މެންބަރުން ރުޅިގަދަވެ، މުޒާހަރާ ކުރަންފެށުމުން ވަލު ދޮރާށިން ވަދެ ޖަގަހަ ހުޅުވައިފި އެވެ.

ތިމަރަފުށީ ދާއިރާގެ މަޖިލިސް ޓިކެޓު ކާމިޔާބު ކުރި، އިބްރާހިމް ސަނާހު (ސަންޓޯ) އިސްކޮށް ހުރެ އޭނާގެ ސަޕޯޓަރުން އެރަށުގައި މުޒާހަރާ ކުރަންފެށީ ޕީއެންސީގެ ޖަގަހަ އަކީ ރިޔާޒުގެ ޖަގަހައިގެ ގޮތުގައި ހުޅުވައި، އެތަނުގައި ޖަލްސާ ބޭއްވުމަށް މަސައްކަތް ކުރުމުންނެވެ.

އަހުމަދު ރިޔާޒުއަށް ތާއިދު ހޯދުމަށާއި، އޭނާގެ ޖަގަހަ ހުޅުވުމަށް މިއަދު ތިމަރަފުއްޓަށް ވަޑައިގަތީ ފިޝަރީޒު މިނިސްޓަރު އަހުމަދު ޝިޔާމް އާއި ހެލްތު މިނިސްޓަރު ޑރ. އަބްދުﷲ ހަލީލު އެވެ.

ނަމަވެސް ތިމަރަފުށީގެ ގިނަ އަދަދެއްގެ ރައްޔިތުން ނުކުމެ އެކަމާ ދެކޮޅަށް އަޑު އުފުލައި މުޒާހަރާ ކުރަން ފެށުމުން ޖަގަހަ ހުޅުވާފައި ވަނީ ވަލު ދޮރާށިން ވަދެ ކަމަށް ސަނާހު ވިދާޅުވި އެވެ.

"މިތަނުގައި މުޒާހަރާ ކުރާތީ ޖަގަހަ ހުޅުވީ ވަލު ދޮރާށިން ވަދެ، އަސްލު ޖަގަހައަށް ވަންނަން ހުންނަ ދޮރަކުން ނޫން ވަނީ، ޖަގަހަ ހުޅުވުމަށްފަހު ޖަލްސާއެއް ވެސް އެތަނުގައި އެމީހުން ނުބާއްވާ،" ސަނާހު ވިދާޅުވި އެވެ.

"އަދަދު" އަށް މައުލޫމާތު ލިބިފައިވާ ގޮތުގައި އަހުމަދު ރިޔާޒުގެ ކެމްޕޭނު ޖަލްސާ ޕީއެންސީ ޖަގަހައިގެ ބޭއްވޭނެ މާހައުލެއް ނެތް ކަމަށް ގަބޫލުކޮށް ސަރުކާރުގެ ދެ މިނިސްޓަރުންނާއެކު ރިޔާޒުގެ ޖަގަހަ ހުޅުވަން ދިޔަ މީހުން ވަނީ އެ ރަށުގައި ހުންނަ އަހުމަދު ރިޔާޒުގެ އަމިއްލަ އިމާރާތަކަށް ގޮސް އެތަނުގައި ކުޑަ ޖަލްސާއެއް ބާއްވައިފަ އެވެ.

ޖެނުއަރީ މަހު އޮތް ޕީއެންސީ މަޖިލިސް ޕްރައިމަރީ ކާމިޔާބުކުރި ސަނާހު އަކީ ރިޔާސީ އިންތިހާބުގެ ޓިކެޓު ރައީސް މުއިއްޒުއަށް ހޯދައި ދިނުމަށް ޕީޕީއެމްގެ ތެރެއިން އެންމެ ފުރަތަމަ މަސައްކަތް ކުރި އެކެކެވެ. އަދި ރިޔާސީ އިންތިހާބުގެ ކެމްޕޭނުގައި ސަނާހު އަކީ ރައީސް މުއިއްޒުގެ ޕާސަނަލް އެސިސްޓެންޓު ވެސްމެ އެވެ.

އޭނާ ބާކީކޮށް ރައީސް ޑރ. މުހައްމަދު މުއިއްޒު ތާއީދު ކުރައްވާ އަހުމަދު ރިޔާޒަަކީ އެދާއިރާގެ މިހާރުގެ މެންބަރު، އަބްދުﷲ ރިޔާޒުގެ ބޭބެ އެވެ. އަމިއްލަ ކެންޑިޑޭޓެއްގެ ގޮތުގައި އިންތިހާބުގައި ވާދަކުރާ ރިޔާޒުއަކީ ޕީޕީއެމް/ޕީއެންސީ މަޖިލިސް ޕްރައިމަރީގައި ވާދަކުރި ކެންޑިޑޭޓެއް ވެސް ނޫނެވެ. ނަމަވެސް އޭނާ ކެމްޕޭނު ކުރަމުން ގެންދަނީ ސަރުކާރު ކެންޑިޑޭޓުގެ ނަމުގައި ޕީޕީއެމް ޕީއެންސީގެ ކުލަތަކާ ވެސް އެކު އެވެ.

ސަރުކާރުގެ ދެ ކެންޑިޑޭޓަކު ގޮސް އަހުމަދު ރިޔާޒުގެ ޖަގަހައިގެ ގޮތުގައި ހުޅުވި ޖަގަހަ އަކީ މިދިޔަ ރިޔާސީ އިންތިހާބުގައި ރައީސް މުއިއްޒުއަށް ތާއީދު ހޯދުމަށް ތިމަރަފުށީގައި ހުޅުވި ޖަގަހަ އެކެވެ. އެ ޖަގަހައިގެ އެތެރޭގައާއި ބޭރުގައި ވެސް މިހާރު ވަނީ އަހުމަދު ރިޔާޒުގެ ފޮޓޯ ޖަހައިފަ އެވެ.

ތިމަރަފުށްޓަކީ ޕާޓީގެ ޕްރައިމަރީ ކާމިޔާބުރި ކެންޑިޑޭޓަކު ހުއްޓައި އެހެން ކެންޑިޑޭޓަކަށް ތާއީދު ކުރަން ރައީސް މުއިއްޒު ނިންމެވި ފުރަތަމަ ދާއިރާއެއް ނޫނެވެ.

ޕީއެންސީގެ ކެންޑިޑޭޓުން ތިއްބައި އަމިއްލަގޮތުން ވާދަކުރާ ކެންޑިޑޭޓުންނަށް ރައީސް ތާއީދު ކުރައްވާއިރު، ޕީއެންސީގެ އަސާސީ ގަވާއިދުގައި ވަރަށް ސާފުކޮށް އެ ޕާޓީ މެންބަރުންގެ ވާޖިބުތައް ބަޔާންކޮށްފައިވެ އެވެ.