އެފްއޭއެމް ވެޓެރަންސް ލީގުގެ ސެމީ ފައިނަލް ފުރަތަމަ މެޗުގައި ދިވެހި ސިފައިންގެ ކްލަބް 1-0 އިން ބަލިިކުރުމަށް ފަހު، މުއިވެޔޮ ފްރެންޑްސް އިން ފައިނަލުގެ ފުރަތަމަ ޖާގަ ހޯދައިފި އެވެ.

ނައިބު ރައީސް ހުސެއިން މުހައްމަދު ލަތީފް (ސެމްބެ)ގެ ކެޕްޓަންކަމުގައި ކުޅޭ މުއިވެޔޮއާ ދެކޮޅަށް ފައިނަލުގައި ކުޅޭ ޓީމެއް ކަނޑައަޅާނީ މިއަދު ހަވީރު ކުޅޭ ދެ ވަނަ ސެމީ ފައިނަލް މެޗުންނެވެ. ދެ ވަނަ ސެމީ ފައިނަލުގައި ކުޅޭނީ ކ. މާފުށްޓަށް ނިސްބަތްވާ ކުޅުންތެރިން ހިމެނޭ، ދަ ގްރާންޑޭ ސްޕޯޓްސް ކްލަބާއި މިދިޔަ ދެ އަހަރުގެ ޗެމްޕިއަން، ހުޅުމާލެ ވެޓެރަންސް ކްލަބް އެވެ. މިދިޔަ އަހަރު، ހުޅުމާލެ ވެޓެރަންސް އިން ތަށި އުފުލާލީ ފައިނަލުގައި، ދަ ގްރާންޑޭ އަތުން 5-2 އިން މޮޅުވެގެންނެވެ.

ކުރީގެ ކުޅުންތެރިންނަށް ހާއްސަ ވެޓެރަންސް ފުޓްބޯޅަ މުބާރާތް، މި ފަހަރު ކުރިއަށްދަނީ ހެންވޭރު ދަނޑުގަ އެވެ.

އިއްޔެ ހަވީރު ކުޅުނު މެޗު ފަށައިގެން ދެ ޓީމުން ވެސް ބޯޅަ ހިފަހައްޓައިގެން ކުޅެ، އެޓޭކަށް ދެވޭ ފުރުސަތުތަކުގައި ލަނޑެއް ޖެހޭތޯ ބެލި އެވެ. އެކަމަކު، ފުރަތަމަ ހާފުގައި ދެ ޓީމުން ކުރެ އެއް ޓީމަކަށް ވެސް ގޯލެއް ޖެހޭ ގޮތެއްނުވި އެވެ.

ލަނޑެއް ޖަަހަން ކުރި މަސައްކަތް މުއިވެޔޮ އިން ކާމިޔާބުކުރީ މެޗުގެ ފުރިހަމަ ވަގުތު ހަމަވާން އަށް މިނިޓަށް ވެފައި ހުއްޓަ އެވެ. އޭރިއާތެރެއަށް މަތިން އައި ބޯޅައެއް، މުއިވެޔޮގެ ކެޕްޓަން، ސެމްބެ، ކޮންޓްރޯލް ކޮށްލުމަށް ފަހު، ހުރަސްކޮށްދިން ބޯޅަ އޭރިއާ ރޮނގުކައިރިން ފެނުގައި ޖެހި މައްޗަށް އެރި ވަގުތު، ބޯޅަ އަށް އައި، އަބްދުﷲ ސުޖާއު (ސުޖާ) އެއް ފަހަރުން ފޮނުވާލި ބޯޅަ އަމާޒުވީ ގޯލުގެ ކަނަށެވެ.

ފައިނަލާ ހަމައަށް ކުރި ދަތުރުގައި މުއިވެޔޮ ވަނީ ފަސް މެޗުގެ ތެރެއިން ހަތަރު މެޗުން މޮޅުވެފަ އެވެ. އެ ޓީމު ބަލިވީ، ގްރޫޕް ސްޓޭޖުގައި ދަ ގްރާންޑޭއާ ދެކޮޅަށް ކުޅުނު މެޗުން އެކަންޏެވެ.

ދަ ގްރާންޑޭ އާއި ހުޅުމާލެ ވެޓެރަންސް ކުޅޭ ސެމީ ފައިނަލް ދެ ވަނަ މެޗު ފަށާނީ މިއަދު ހަވީރު، 16:10 ގަ އެވެ.