މިހާރު ކުރިއަށްދާ އެފްއޭއެމް ވެޓެރަންސް ލީގުގެ ސެމީ ފައިނަލުގެ ފަހު ޖާގަ ދިވެހި ސިފައިންގެ ކްލަބުން ހޯދައިފި އެވެ.

ސިފައިންގެ ކްލަބުން ސެމީން ފުރުސަތު ހޯދީ އިއްޔެ ކުޅުނު މެޗުން، މުބާރާތުގެ އެންމެ ފަހުގެ ޗެމްޕިއަންް، ހުޅުމާލެ ވެޓެރަންސް ކްލަބް އަތުން 3-1 އިން މޮޅުވެގެންނެވެ.

އިއްޔެގެ ނަތީޖާއާ އެކު، ގްރޫޕް އޭގެ އެއް ވަނަ ޓީމުގެ ގޮތުގައި ސެމީގެ ޖާގަ ހޯދީ ކުޅުނު ހަތަރު މެޗުން 10 ޕޮއިންޓް ހޯދި ސިފައިންނެވެ. ދެ ވަނަ އަށް ދިޔަ ހުޅުމާލެ ވެޓެރަންސް އަށް ވަނީ ހަތަރު މެޗުން ނުވަ ޕޮއިންޓް ލިބިފަ އެވެ. ތިން ވަނައިގައި ނިންމި ހުއްރިއްޔާ ވެޓެރަންސް (ހުރާ) އަށް ހަތަރު މެޗުން ލިބުނީ ހަތް ޕޮއިންޓެވެ.

ހަތަރު ވަނަ އަށް ދިޔަ، ޕޮލިސް ކްލަބަށް ހަތަރު މެޗުން ތިން ޕޮއިންޓް ލިބުނުއިރު، ފުލުގައި ނިންމި ވިލިމާލެ ޔުނައިޓެޑަށް ހަތަރު މެޗުން ޕޮއިންޓެއް ވެސް ނުލިބެ އެވެ.

ހެންވޭރު ދަނޑުގައި އިއްޔެ ހަވީރު ކުޅުނު މެޗު ފަށައިގެން، 10 ވަނަ މިނިޓްގައި އޭރިއާތެރެއިން ލިބުނު ފުރުސަތެއްގައި ހުސެއިން ނަޝީދު އެވެ.

ސިފައިން ފަހަތުން އަރައި މޮޅުވިއިރު، އެ ޓީމުގެ އަހުމަދު ފަޒަލް ވަނީ ހެޓްރިކެއް ހަދައިފަ އެވެ.

އެ ގޮތުން، ސިފައިންގެ ޓީމު އެއްވަރުކުރި ލަނޑު ޖެހީ، 23 ވަނަ މިނިޓްގައި ޕެނަލްޓީ އަކުން ފަޒަލް އެވެ. މިއީ ފަޒަލް އަށް ހުޅުމާލެ ވެޓެރަންސް ޓީމުގެ ފައިރޫޒް ކުރި ފައުލަކަށް ރެފްރީ ދިން ޕެނަލްޓީ އެކެވެ. ފަޒަލް، ވަނީ މެޗުގެ 48 ވަނަ މިނިޓްގައި އޭރިއާތެރެއިން ލިބުނު ބޯޅައެއް ގޯލަށް ވައްދާލައި، ސިފައިންނަށް ލީޑުނަގައިދީފަ އެވެ.

މެޗުގެ 51 ވަަނަ މިނިޓްގައި ފަޒަަލް ވަނީ ޕެނަލްޓީއެއް ކާމިޔާބުކޮށް ސިފައިން ސެމީ އަށް ގެންގޮސްދީފަ އެވެ.

ވެޓެރަންސް މުބާރާތުގައި މިއަދު ހަވީރު ކުޅޭ މެޗުގައި ދަ ގްރާންޑޭ ސްޕޯޓްސް ކްލަބް ކުޅޭނީ ސްޓެލްކޯ ކްލަބްއާ އެވެ. ދަ ގްރާންޑޭ ވަނީ ސެމީން ޖާގަ ޔަގީންކޮށްފަ އެވެ. އެކަމަކު، މިއަދުގެ މެޗުން ޕޮއިންޓެއް ހޯދައިގެން އެ ޓީމަށް ގްރޫޕްގެ އެއް ވަނަ ހޯދޭނެ އެވެ. މެޗު ފަށާނީ 16:30 ގަ އެވެ.