ވިލިމާލެ ޔުނައިޓެޑް އަތުން 8-0 އިން ބޮޑު މޮޅެއް ހޯދައި ހުއްރިއްޔާ ވެޓެރަންސް (ހުރާ) އިން އެފްއޭއެމް ވެޓެރަންސް ލީގުގެ ސެމީ ފައިނަލުގެ އުންމީދު ދަމަހައްޓައިފި އެވެ.

މި މޮޅާ އެކު ހުރާ ވަނީ ގްރޫޕް އޭގެ ދެ ވަނަ އަށް ޖެހިލައިފަ އެވެ. މި ގްރޫޕްގެ އެއް ވަނައިގައި އޮތީ ތިން މެޗުން ވެސް މޮޅުވެ، ނުވަ ޕޮއިންޓް ހޯދައިފައިވާ ހުޅުމާލެ ވެޓެރަންސް ކްލަބް އެވެ. ދެ ވަނައިގައި އޮތް ހުރާ އާއި ތިން ވަނައިގައި އޮތް ދިވެހި ސިފައިންގެ ކްލަބަށް ވަނީ ހަތް ޕޮއިންޓް ލިބިފަ އެވެ. ހުރާ އަށް މެޗު ހަމަވެފައިވާއިރު، ސިފައިންނަށް ބާކީ އޮތީ، ހުޅުމާލެ ވެޓެރަންސްއާ ކުޅޭ މެޗެވެ. އެ މެޗުން، ޕޮއިންޓެއް ހޯދައިގެން ވެސް ސިފައިންނަށް ސެމީ އަށް ދެވޭނެ އެވެ. ހުރާ އަށް ސެމީގެ ފުރުސަތެއް ލިބެން އޮތީ، ހުޅުމާލެ ވެޓެރަންސް އަތުން ސިފައިން ބަލިވެގެންނެވެ.

ހެންވޭރު ދަނޑުގައި އިއްޔެ ހަވީރު ކުޅުނު މެޗުގައި ހުރާ އިން ފުރަތަމަ ހާފުގައި ވަނީ ފަސް ގޯލު ޖަހައިފަ އެވެ. ބާކީ ތިން ގޯލު ކާމިޔާބުކުރީ ދެ ވަނަ ހާފުގަ އެވެ.

ހުރާ އަށް މި މެޗުގައި ގޯލުތައް ޖަހައިދިނީ، އިސްމާއިލް މުހައްމަދު އާއި އަލީ ނަޒްމީން ކޮންމެ ކުޅުންތެރިއަކު ދެ ގޯލާއި އަލީ ޝިޔާމް، އަލީ ޝިހާމް (އައްޔަ)، މުހައްމަދު އަބްދުﷲ އަދި އަހުމަދު ސަމާއު ކޮންމެ ކުޅުންތެރިއަކު ގޯލެކެވެ.

މި މެޗުގައި ހުރާ އަށް އިތުރު ގޯލު ޖަހަން ވެސް ވަނީ ފުރުސަތު ލިބި ބޭނުންނުކުރެވިފަ އެވެ.

ގްރޫޕް އޭގެ ހަތަރު ވަނައިގައި އޮތް ޕޮލިހަށް ހަތަރު މެޗުން ތިން ޕޮއިންޓް ލިބިފައިވާއިރު، ފުލުގައި އޮތް ވިލިމާލެ ޔުނައިޓެޑް ވަނީ ހަތަރު މެޗުން ވެސް ބަލިވެފަ އެވެ.

ވެޓެރަންސް މުބާރާތުގައި މިއަދު ހަވީރު، 16:30 ގައި ފަށާ މެޗުގައި ބައްދަލުކުރާނީ، މޯލްޑިވްސް ސޮކަ މޭޓްސް (އެމްއެސް މޭޓްސް) އާއި ލެގޫންސް ސްޕޯޓްސް ކްލަބް އެވެ. މި ދެ ޓީމު ވެސް ވަނީ ގްރޫޕް ސްޓޭޖުން ކަޓައިފަ އެވެ.