ލަންޑަން (މާޗް 7) - ޓެނިސް ކުޅުންތެރިން މިހާރަށް ވުރެ ބޮޑަށް މެޗު އޮފިޝަލުންނަށް އިހުތިރާމް އަދާކުރަން ޖެހޭ ކަމަށް އިނގިރޭސި ޓެނިސް ތަރި، އެންޑީ މަރޭ ބުނެފި އެވެ.

އިންޑިއަން ވެލްސްގެ ދެ ވަނަ ބުރުގައި، މަރޭއާ ދެކޮޅަށް ކުޅޭ ރަޝިއާގެ އަންޑްރޭ ރުބްލޭފް ވަނީ ދާދި ފަހުން ދުބާއީ މުބާރާތުގައި ރެފްރީއާ ދިމާލަށް ހުތުރު ބަހުން މުއާމަލާތުކޮށްފައިވާތީ، ޑިސްކޮލިފައިކޮށްފަ އެވެ. ދުބާއީ މުބާރާތުގެ ސެމީ ފައިނަލުގައި، ރުބްލޭފް ވަނީ، ލައިން ޖަޖާ ދިމާލަށް ހަޅޭލަވައި، އަޑުގަދަކޮށްފަ އެވެ. މުބާރާތުން ޑިސްކޮލިފައި ކުރި ނަމަވެސް، ރުބްލޭފް ވަނީ މޮޅުވި މެޗުތަކަށް ދޭ އިނާމް ފައިސާ ހޯދުމުގެ އެޕީލްގައި ކާމިޔާބު ހޯދައިފަ އެވެ.

ރުބްލޭފާ ދެކޮޅަށް މަރޭ ކުޅޭ މެޗުގެ ކުރިން އޭނާއާ އަމާޒުވި ސުވާލަކީ، މެޗު އޮފިޝަލުންނާ ދިމާލަށް ކުޅުންތެރިން ޝުއޫރުފާޅުކުރުމުގެ ގޮތުން ދައްކާ ވާހަކަތަކާ މެދު ދެކޭ ގޮތެއް ކިޔައިދިނުމަށެވެ.

"އަހަރެން ވެސް ހިމެނޭގޮތަށް ހުރިހާ ކުޅުންތެރިން ވިސްނަން ޖެހޭ މި ކަަމާ މެދު، އަހަރެމެން މެޗު އޮފިޝަލުންނާ މި މުއާމަލާތު ކުރާ ގޮތް. ގިނަ ފަހަރު މީގެ ސަބަބުން ގެއްލުންވަނީ ކުޅުންތެރިންނަށް. އެހެންވީމަ އަހަރެމެން އެބަޖެހޭ ކުޅިވަރުގެ ރިވެތި އުސޫލުގެ ތެރެއިން ކަންކަން ކުރަން،" މަރޭ ބުންޏެވެ.

"ފުޓްބޯޅަ އާއި ރަގްބީ އަށް ބަލާނަމަ މީގެ އޮތް ތަފާތު ބޮޑު، އެ ދެ ކުޅިވަރުގައި ރެފްރީންގެ ހިމާޔަތުގައި މި އަންނަ ކަންކަން ވަރަށް ރަނގަޅަށް އޮތީ، ކުޅުންތެރިންނަށް ވެސް މީގެ ކަންކަން ސާފުވެފައި އޮތީ، އެ ރަނގަޅު ކަންކަން ޓެނިހަށް ވެސް އަންނަން އެބަޖެހޭ،"

ދުބާއީ މުބާރާތުގައި ހިނގި ކަންތައްތަކަށް ބަލައި، ރުބްލޭފް ވަނީ 36،400 ޑޮލަރުން ޖޫރިމަނާކޮށްފަ އެވެ.

މި ފަހުގެ ތާރީހެއްގައި މެޗު އޮފިޝަލަކާ ދިމާކޮށްގެން އެންމެ ބޮޑު ކަންތައްތަކެއް ހިނގީ 2022 ވަނަ އަހަރުގެ މެކްސިކަން އޯޕަންގަ އެވެ. އެ މުބާރާތުގައި، ރަޝިއާގެ އަލެކްސަންޑަ ޒްވެރެވް ހިތްހަަމަނުޖެހިގެން ގިނަ ފަހަރުތަކެއް ވަންދެން، އަމްޕަޔަރުގެ ގޮނޑިއާ އަމާޒުކޮށް ޝޮޓްތަކެއް ފޮނުވާލި އެވެ. އެއް ފަހަރު، އަމްޕަޔަރުގެ ފައިގައި ނުޖެހި ދިޔައީ ކިރިޔާ އެވެ. އެ މެޗުގައި ޒްވެރެވްގެ ފަރާތުން ފެނުނު ކަންތައްތަކަށް ބަލައި، އޭނާ އަށް ވަނީ އަށް ހަފްތާގެ ސަސްޕެންޝަނެއް އަތުވެފަ އެވެ.