ކޮވިޑުގެ ބަލިމަޑުކަމުގެ ދުވަސްވަރު ރާއްޖެއިން އޯޑަރު ކުރި ވެންޓިލޭޓަރުތަކުގެ ބަދަލުގެ ގޮތުގައި ދެ މިލިއަން ޑޮލަރު އަދި އެ ބަދަލު ހޯދުމަށް ޓަކައި އާބިޓްރޭޝަނަށް ހުށަހެޅި މައްސަލައަށް ދައުލަތުން ހަރަދުވި އެއްލައްކަ ޑޮލަރު ދިވެހި ސަރުކާރަށް ދައްކަން، އެ ތަކެތި ގެނައުމަށް ހަވާލުކުރި ދުބާއީ ކުންފުނި، އެގްޒެކިއުޓާސްއަށް ދިވެހި އާބިޓްރޭޝަނުން ހުކުމްކޮށްފި އެވެ.
ދުބާއީ ކުންފުނި އެގްޒެކިއުޓާސްއަށް ކުރީގެ ސަރުކާރުން ހަވާލުކުރީ 75 ވެންޓިލޭޓަރު ރާއްޖެ ގެނައުމަށެވެ. އެކަމަށް އެދުނު މުއްދަތު ހަމަވިތާ އެތައް ދުވަހެއް ފަހުން އެ ކުންފުނިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ 60 ވެންޓިލޭޓަރު ނުލިބެ އެވެ.
އެ ތަކެތީ ޖުމުލަ އަގު 31,052,025ރ. އަށް އަރާއިރު، ތަކެތި ނުލިބުމުގެ ސަބަބުން ލިިބިފައިވާ ގެއްލުމުގެ ބަދަލާ އެކު ޖުމުލަ 32,574,750ރ. އަށްވާ 2،112،500 އެމެރިކާ ޑޮލަރު ހޯދުމަށް ދިވެހި ސަރުކާރުން އާބިޓްރޭޝަނުގައި އެދުނެވެ.
މޯލްޑިވްސް އާބިޓްރޭޝަނުން ނެރުނު ފައިނަލް އެވޯޑުގައި އެ ފައިސާ ދިވެހި ސަރުކާރަށް ދެއްކުމަށް އަންގާފައިވެ އެވެ. އަދި އާބިޓްރޭޝަން ފީއަށް ހަރަދުވި 132،865.56ރ. ދެއްކުމަށް ވެސް އަންގާފައިވެ އެވެ. އެ ފައިސާ ދެއްކުމާ ހަމައަށް އަހަރަކު ދެ ޕަސެންޓުގެ ރޭޓުން އިންޓްރެސްޓް ދައްކަން ވެސް އާބިޓްރޭޝަނުން އެންގި އެވެ.
ދުބާއީ ކުންފުނިން، އާބިޓްރޭޝަންގެ އަޑުއެހުންތަކަށް ހާޒިރުވެފައެއް ނުވެ އެވެ.
އެޓާނީ ޖެނެރަލްގެ އޮފީހުން ނޫސް ބަޔާނެއް މެދުވެރިކޮށް ބުނީ އާބިޓްރޭޝަނުން ނެރުނު ފައިނަލް އެވޯޑަކީ ގާނޫނީ ގޮތުން ތަންފީޒު ކުރަން ޖެހޭނެ އެވޯޑަކަށް ވާތީވެ، އޭގައި ކަނޑައަޅާފައިވާ ފައިސާ ހޯދުމުގެ މަސައްކަތް ދިވެހި ސަރުކާރުން ކުރަމުން އަންނަ ކަމަށެވެ.
އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏާ އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފައެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.
އެ ހިޔާނާތުގެ ސަބަބުން ދިވެހި ދައުލަތަށް ގިނަ ގެއްލުންތަކެއް ލިބިފައިވާތީވެ، އިތުރަށް އަޅަން ޖެހޭ ފިޔަވަޅުތައް ވެސް ދައުލަތުގެ ކަމާ ބެހޭ އިދާރާތަކާ ގުޅިގެން ކުރިއަށް ގެންދާ ކަމަށް އެޓާނީ ޖެނެރަލްގެ އޮފީހުން ބުންޏެވެ.
ވެންޓިލޭޓަރުތައް ގެނައުމުގައި ވެފައިވާ ހިޔާނާތުގެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރުމަށް ފަހު، އެ ފައިސާ އަނބުރާ ހޯދުމަށް އަންގާފައިވެ އެވެ.
ތަހުގީގުކުރުމަށް ފަހު އެންމެ ފުރަތަަމަ ކުރީގެ ހެލްތު މިނިސްޓަރ އަބްދުﷲ އަމީން ހިމެނޭ ގޮތަށް ހެލްތު މިނިސްޓްރީގެ 11 މުވައްޒަފެއްގެ މައްޗަށް ދައުވާކުރަން ހުށަހެޅި އެވެ. ނަމަވެސް ތަހުގީގު ފުރިހަމަ ނުވާކަމަށް ބުނެ ހަތަރު ފަހަރެއްގެ މަތިން އެ މައްސަލަ އަނބުރާ ފޮނުވާލީ އެވެ.
އެއާއެކު އޭސީސީން ވަނީ އެ މައްސަލަތަކުގެ ތެރެއިން އަށް މީހެއްގެ މައްސަލަ ފައިލްކޮށްފަ އެވެ. އޭގެ ފަހުން ދެން ފޮނުވީ ތިން މީހެއްގެ މައްޗަށް ދައުވާކޮށްދިނުމަށެވެ. އޭގެ ތެރޭގައި މިނިސްޓަރު އަމީން ނުހިމެނެ އެވެ.
