ޕާކިސްތާނުގެ އާންމު އިންތިހާބު ބާއްވަން ހަފްތާއެއް އޮއްވައި އެ ގައުމުގެ އެންމެ ތާއީދު ބޮޑު ސިޔާސީ ލީޑަރު އަދި ކުރީގެ ބޮޑުވަޒީރު އިމްރާން ހާން 10 އަހަރަށް ޖަލަށްލާން އަސްކަރިއްޔާގެ ކޯޓަކުން މިއަދު ހުކުމްކޮށްފި އެވެ.

އެމަނިކުފާނު ޖަލަށް ލުމަށް ހުކުމް ކުރީ ދައުލަތުގެ ސިއްރުތަކެއް ލީކު ކުރި ކަމަށް ބުނެ އަސްކަރީ ކޯޓެއްގައި ހިންގި ދައުވާތަކެއް ސާބިތުވުމާ ގުޅިގެންނެވެ.

މިދިޔަ އަހަރުގެ އޮގަސްޓު މަހުން ފެށިގެން އެމަނިކުފާނު ހުންނެވީ ޖަލުގަ އެވެ. އެއީ ކޮރަޕްޝަންގެ ދައުވާއެއް ސާބިތުވެ ތިން އަހަރަށް ޖަލަށްލުމާ ގުޅިގެންނެވެ.

އެ ތުހުމަތަކީ އެމަނިކުފާނު ބޮޑުވަޒީރަކަށް ހުންނެވިއިރު ޕާކިސްތާނުގެ އެމްބެސެޑަރަކު އެމެރިކާއަށް ފޮނުވި ސިއްރު ޑޮކިއުމެންޓަކާ ގުޅޭ ތުހުމަތެކެވެ. އެ ދައުވާތަކާއި ތުހުމަތުތަކަށް އެމަނިކުފާނު އިންކާރު ކުރައްވަ އެވެ.

އޮގަސްޓް 2018 އިން ފެށިގެން އެޕްރީލް 2022 އާ ހަމައަށް ޕާކިސްތާނުގެ ބޮޑުވަޒީރަކަށް ހުންނެވި އިމްރާން ހާންގެ މަގާމު ގެއްލުނީ އިތުބާރު ނެތް ކަމުގެ ވޯޓު ނެގުމުންނެވެ.

އެ ޑޮކިއުމެންޓްގައި އެމަނިކުފާނާ ދެކޮޅަށް އެ ވޯޓު ނެގި ސަބަބުތަކާއި އަދި އެއީ ޕާކިސްތާނުގެ އަސްކަރިއްޔާ އާއި ސިޔާސީ ވާދަވެރިން އަދި އެމެރިކާ ސަރުކާރު ގުޅިގެން ހިންގި ބަގާވާތެއްކަން ސާބިތުވާނެ ހެކި ހުންނާނެ ކަމަށް އިމްރާން ހާން ގެންދަވަނީ ވިދާޅުވަމުންނެވެ. މި ތުހުމަތުތައް ޕާކިސްތާންގެ އަސްކަރިއްޔާ އާއި އެމެރިކާގެ ސަރުކާރުން ދޮގުކުރެ އެވެ.