ކަނޑު ދިރާސާ ކުރަ ޗައިނާގެ އުޅަނދު ރާއްޖެ އަންނަކަން ކަށަވަރު ކޮށްދިނުމަށްފަހު އެ އުޅަނދު އަންނަނީ ދިރާސާ ކުރަން ނޫން ކަމަށް ފޮރިން މިނިސްޓަރީން ބުނެފި އެވެ.

ފޮރިން މިނިސްޓަރީން ނޫސްތަކަށް މިއަދު ފޮނުވި ކުރު ބަޔާނެއްގައި ބުނީ ދިރާސާ ކުރާ ޗައިނާގެ އުޅަނދެއް ރާއްޖެ އަންނަނީ ކުރޫއިން ބަދަލު ކުރުމާއި ސްޓޮކު އައު ކުރުމަށް ކަމަށެވެ. އަދި އެކަން ކުރަނީ އެ ބޯޓު ރާއްޖޭގައި ބަނދަރު ކޮށްދިނުމުގެ ހުއްދައަކަށް ޗައިނާގެ ސަރުކާރުން ރާއްޖޭގައި ރަސްމީކޮށް އެދިގެން ކަމަށެވެ.

ނަމަވެސް އެ ބޯޓުން ރާއްޖޭގެ ސަރަހައްދުގައި ދިރާސާގެ އެއްވެސް މަސައްކަތެއް ކުރިއަށް ނުގެންދާނެ ކަމަށް އެ ބަޔާނުގައި ބުންޏެވެ.

"ޗައިނާ ސަރުކާރުން ވަނީ އެ އުޅަނދުގައި ތިބި ކުރޫއިން ބަދަލު ކުރުމާއި ސްޓޮކު އައު ކުރުމަށް ރާއްޖޭގައި ބަނދަރުކޮށްދިނުމުގެ ހުއްދައަކަށް ދިވެހި ސަރުކާރުގައި ރަސްމީކޮށް އެދިފައި، އެ އުޅަނދުން ރާއްޖޭގައި އެއްވެސް ދިރާސާއެއް ނުކުރާނެ،" ބަޔާނުގައި އެވެ.

ރާއްޖެ އައުމަށް ހަމަޖެހިފައިވާ ބޯޓަކީ ޗައިނާ ސަރުކާރުގެ ޝިޔެންގް ޔެންގް ހޮންގް 3 ނަމަކަށް ކިޔާ އުޅަނދެކެވެ. ކަނޑު އުޅަނދުތައް ޓްރެކްކުރާ ސައިޓުތަކުން ދައްކާގޮތުން އެ އުޅަނދު މިހާރު ދަނީ ޖާވާ ކަނޑުން ރާއްޖެއާ ދިމާލަށް ދަތުރުކުރަމުންނެވެ. އެ އުޅަނދު މާލެއަށް ބަނދަރުކުރާނެ ކަމަށް ލަފާކޮށްފައިވަނީ މި މަހުގެ 30 ގަ އެވެ.

ފޮރިން މިނިސްޓަރީން ބުނީ ރާއްޖެއާ ގާތް ގުޅުން އޮންނަ ގައުމުތަކުގެ މިލިޓަރީ އަދި ސިވިލް އުޅަނދުފަހަރަށް ރާއްޖޭގައި ބަނދަރުކޮށް ސުލްހަވެރި ހަރަކާތްތެރިކަން ހިންގުމުގެ ހުއްދަ ދޭ ކަމަށެވެ. އަދި އެކަމުގެ ސަބަބުން ގައުމުތަކާއި ރާއްޖެއާ ދެމެދު އޮންނަ ގުޅުން އިތުރަށް ވަރުގަދަވެ ބަދަހިވެގެންދާ ކަމަށް ފޮރިން މިނިސްޓަރީގެ ބަޔާނުގައި ބުނެފައިވެ އެވެ.

ބައިނަލްއަގުވާމީ ގޮތުން އެފަދަ ކަންކަމުގައި ދުނިޔޭގައި އަމަލު ކުރާ ބެސްޓު ޕްރެކްޓިސްއާއި މެރިޓައިމް ގާނޫނުގައި އެކަމާ ގުޅުންހުރި މާއްދާތައް ރާއްޖެއިން ނަގަހައްޓާނެ ކަމަށް ވެސް އެ ބަޔާނުގައި ބުންޏެވެ.

ގާތްގަނޑަކަށް 100 މީޓަރުގެ ޝިޔެންގް ޔެންގް ހޮންގް 3 އަކީ ޗައިނާގެ ސްޓޭޓް އޯޝަނިކް އެޑްމިނިސްޓްރޭޝަން (އެސްއޭއޯ) ގެ ފްލީޓަށް 2016 ގައި އިތުރުކުރި އުޅަނދެކެވެ. މިއީ މިވަގުތު ޗައިނާގައި އޮތް 4،500 ޓަނުގެ އެންމެ ބޮޑު އުޅަނދެވެ.

2019 އިން ފެށިގެން ޗައިނާގެ ޕައިލެޓް އޯޝެން ލެބޯރެޓަރީގެ "ޑިސްޓަންޓް ވޯޓާ" އަދި "ޑީޕް ސީ" ސާވޭ ކުރުމަށްވެސް ޗައިނާއިން މި އުޅަނދު ބޭނުންކުރަމުންދެ އެވެ. އެގޮތުން ކަނޑުގެ ލޮނުގަނޑުގެ ދިރާސާތަކާއި، މައިކްރޯބިއަލް ޖެނެޓިކްގެ ދިރާސާތައް، ކަނޑު އަޑިން މައުދަން ހޯދުން، އަދި ކަނޑު އަޑީގެ ދިރުންތަކާއި ވެށީގެ ދިރާސާތަކަށްވެސް މި އުޅަނދު ބޭނުންކުރެވޭނެ އެވެ.

ޗައިނާގެ ރިސާޗު އުޅަނދެއް ރާއްޖެއަށް އައުމަށް ދިވެހި ސަރުކާރުން ހުއްދަ ދީފައިވާއިރު، ޗައިނާގެ އުޅަނދުތައް އިންޑިއާ ކަނޑުގެ ސަރަހައްދުގައި ހަަރަކާތްތެރިވުމާ ދެކޮޅަށް އިންޑިއާއިން އަންނަނީ ވަރަށް އަޑުހަރުކޮށް ބަސް ބުނަމުންނެވެ. އިންޑިއާގެ އިތުރުން، ޗައިނާގެ ރިސާޗު އުޅަނދުތައް ސްރީލަންކާގެ ސަރަހައްދަށް ވަނުން އެގައުމުގެ ސަރުކާރުންވެސް ވަނީ އެއް އަހަރު ދުވަހުގެ މުއްދަތަށް މަނާކޮށްފަ އެވެ.

އެޕްރީލް 2022, ގައި ލަންކާގެ މުޅި އިގްތިސާދު ފުނޑިގެންދިޔުމުގެ ކުރިން އެ ގައުމުން ޗައިނާއިން ގިނަ އަދަދެއްގެ ލޯނުތައް ނެގި އެވެ. ލަންކާގެ ދަރަނީގެ ޖުމުލަ 10 އިންސައްތައަށްވުރެ ގިނައިން ހިއްސާކުރަނީ ޗައިނާއިން ނަގާފައިވާ ލޯނުތަކެވެ. އޭގެ ތެރެއިން ބައެއް ލޯނުތައް ނުދެއްކި ހަމްބަންޓޯޓާގައި އޮންނަ ބަނދަރު މިހާރު ކޮންޓްރޯލް ކުރަނީ ޗައިނާއިންނެވެ.

އެމެރިކާއިން އަންދާޒާކުރާ ގޮތުގައި 2019 އިން ފެށިގެން ޗައިނާގެ ސައިންޓިފިކް ރިސާޗުގެ 48 އުޅަނދެއް އިންޑިއާ ކަނޑުގެ ސަރަހައްދުގައި ހަރަކާތްތެރިވެފައިވެ އެވެ.