ލަންޑަން (ޖެނުއަރީ 21) - އަށް މަހުގެ ސަސްޕެންޝަނެއްގައި ހުރުމަށް ފަހު އައި ފޯވާޑް އައިވާން ޓޯނީ ޖެހި ގޯލާ އެކު، އިނގިރޭސި ޕްރިމިއާ ލީގުގައި ރޭ ބްރެންޓްފޯޑް އިން 3-2 އިން ނޮޓިންހަމް ފޮރެސްޓް ބަލިކޮށް، ހަތް މެޗަށް ފަހު މޮޅެއް ހޯދައިފި އެވެ.

ބެޓިންގެ 232 ގަވާއިދަކާ ހިލާފުވެގެން، މިދިޔަ މެއި މަހު ސަސްޕެންޑްކުރި ޓޯނީ، 27، އަދަބުން ސަލާމަތްވީ މީގެ ފަސް ދުވަސް ކުރިންނެެވެ. ކުޅުމަށް އެނބުރި އައިތާ 19 މިނިޓް ތެރޭ ޓޯނީ ވަނީ ހިލޭ ޖެހުމަކުން ގޯލެއް ޖަހައި، ބްރެންޓްފޯޑަށް އެއްވަރުކޮށްދީފަ އެވެ. މިއީ 266 ދުވަސް ތެރޭ ޓޯނީ ޖެހި ފުރަތަމަ ގޯލެވެ. އެންމެ ފަހުން ވެސް ޓޯނީ ލަނޑު ޖެހީ ފޮރެސްޓް ކޮޅަށެވެ.

"މިއީ ސަސްޕެންޝަނުގައި އަހަރެން ހޭދަކުރި ކޮންމެ ދުވަހަކު ހެން ދެކުނު ހުވަފެނެއް. އޮތް ޔަގީންކަން ވެސް އެނބުރި އައިސް ގޯލު ޖަހައި، ޓީމު މޮޅުކޮށްދޭން އެހިވާނަމޭ، އެކަން ކުރެވުމުން އިތުބާރު ބޮޑުވެއްޖެ،" ސްކައި ސްޕޯޓްސް އަށް ޓޯނީ ބުންޏެވެ.

ޓޯނީ މި ލަނޑު ޖެހީ، ފޮރެސްޓަށް މެޗުގެ ތިން ވަނަ މިނިޓްގައި ޑަނީލޯ ލީޑުނަގައިދީފައިވަނިކޮށެވެ.

މެޗުގައި ބްރެންޓްފޯޑުން ފުރަތަމަ ފަހަރަށް ލީޑުނެގީ 58 ވަަނަ މިނިޓްގައި ބެން މީ ޖެހި ލަނޑުންނެވެ. ކަލުމް ހަޑްސަން އޮޑޯއި ދިން ބޯޅައަކުން މެޗުގެ 65 ވަަނަ މިނިޓްގައި ކްރިސް ވުޑް ވަނީ ލަނޑެއް ޖަހައި ފޮރެސްޓަށް އެއްވަރުކޮށްދީފަ އެވެ. އެކަމަކު، އޭގެ ތިން މިނިޓް ފަހުން، ނީލް މޯޕޭ ވަނީ ލަނޑެެއް ޖަހައި، ބްރެންޓްފޯޑް މެޗުން މޮޅުކޮށްދީފަ އެވެ.

މޯޕޭ މި ގޯލު ޖެހީ އަތުން ބޯޅަައިގައި ޖެހުނު ފަހުން ކަމަށް ބުނެ، އެކަން ވީޑިއޯ އެސިސްޓަންޓް ރެފްރީ (ވީއޭއާރް) މެދުވެރިކޮށް ރަނގަޅަށް ބަލަން ފޮރެސްޓްގެ އޮފިޝަލުން ވަނީ ރެފްރީ އަށް އެޕީލްކޮށްފަ އެވެ. އެކަމަކު، އެ އަށް ރެފްރީގެ މާ ބޮޑު ފަރުވާލެއް ނެތެވެ.

ބްރެންޓްފޯޑް އޮތީ 20 މެޗުން 22 ޕޮއިންޓާ އެކު، ލީގުގެ 14 ވަނައިގަ އެވެ. ފޮރެސްޓުން 21 މެޗު ކުޅުނުއިރު، ލިބުނު 20 ޕޮއިންޓާ އެކު އޮތި ލީގުގެ 16 ވަނައިގަ އެވެ.