ހޮނިހިރު ދުވަހު އޮންނަ މާލެ ސިޓީ މޭޔަރު އިންތިހާބުގައި ވާދަކުރާ އެމްޑީޕީގެ ކެންޑިޑޭޓު އާދަމް އާޒިމަށް ތާއީދުކުރެއްވުމަށް އެމްއާރުއެމްގެ ރައީސް ފާރިސް މައުމޫނު ނިންމަވައިފި އެވެ.

އެމްޑީޕީގެ ކެންޑިޑޭޓަށް ފާރިޝްގެ ތާއީދު އޮތްކަން ހާމަކުރެއްވީ އާޒިމްގެ ކެމްޕޭން ނިންމުމަށް މިރޭ ސަލްޓަން ޕާކުގައި ބޭއްވި ޖަލްސާއެއްގައި ދެއްވި ހާއްސަ ވީޑިއޯ މެސެޖެއްގަ އެވެ.

"އަޅުގަނޑަށް ގަބޫލުކުރެވޭ ގޮތުގަ މާލެ ސިޓީ މޭޔަރުގެ ކުރިމަތިލައްވާފަ ތިބި ބޭފުޅުންގެ ތެރެއިން، އެންމެ ރަނގަޅު ބޭފުޅަކީ އަލްފާޟިލް އާދަމް އާޒިމް، އެހެންވީމަ އަޅުގަނޑު ތާއީދުކުރަނީ އާދަމް އާޒިމް އަށް، ކެންޑިޑޭޓު ނަމްބަރު ހަތަރެއް" ފާރިސް ވިދާޅުވި އެވެ.

ފާރިސް މައުމޫނު މިރޭ ވީޑިއޯ މެސެޖު ދެއްވަނީ - ފޮޓޯ: އެމްޑީޕީ

ނިމިދިޔަ ރިޔާސީ އިންތިހާބުގައިވެސް ވާދަކުރެއްވި ފާރިސް ވިދާޅުވީ، މާލެ ސިޓީގައި ހައްލުކުރަން ޖެހޭ ކަންކަން ވަރަށް ގިނަ ކަމަށާއި އެކަންކަމަކީ ރޭވުންތެރިކަމާއެކު ތަޖުރިބާހުރި ތައުލީމީ ބޭފުޅަކަށް ނޫނީ ނުކުރެވޭނެ ކަންކަން ކަމަށެވެ. އަދި، އެއީ އޭނާ އާޒިމަށް ތާއީދުކުރާ އެންމެ މައިގަނޑު ސަބަބު ކަމަށްވެސް ވިދާޅުވި އެވެ.

އާޒިމްގެ އިތުރުން ދެން މޭޔަރު އިންތިހާބުގައި ވާދަކުރައްވަނީ ވެރިކަންކުރާ ޕީއެންސީއިން އާޒިމާ ޝުކުރޫ، ދަ ޑިމޮކްރެޓްސްއިން ސައިފު ފާތިހު އަދި ކުރީގެ ރައީސް ޔާމީނުގެ ތާއީދާއެކު ވާދަކުރައްވާ ކުރީގެ ސީޕީ ހުސެއިން ވަހީދުގެ އިތުރުން އަމިއްލަ ގޮތުން ވާދަކުރައްވާ ޝުއައިބު އެވެ.

މިއީ މިދިޔަ ސެޕްޓެމްބަރު ބޭއްވި ރިޔާސީ އިންތިހާބަށްފަހު ރާއްޖޭގެ ސިޔާސީ މަޝްރަހު ވަޒަންކޮށްލުމަށް ލިބޭ ފުރަތަމަ ފުރުސަތެވެ.