އެމްޑީޕީގެ ޓިކެޓުގައި ކޮމަންޑޫ ދާއިރާގެ މެންބަރުކަމަށް ހޮވި ވަޑައިގެންނެވި މުހައްމަދު ރާޝިދު މިރޭ ޕީއެންސީއަށް ސޮއި ކުރަން ނިންމަވާފައިވާ ކަމަށް އޭނާ ވިދާޅުވެއްޖެ އެވެ.

އެމްޑީޕީގެ މަޖިލިސް މެންބަރުންތަކެއް މިރޭ ސަރުކާރު ހިންގާ ޕީއެންސީއާ ގުޅުމަށް ނިންމާފައިވާ ކަމަށް ބުނެ ފެތުރިފައިވާ ވާހަކަތަކާ ގުޅޭގޮތުން "އަދަދު" ނޫހުން ސުވާލު ކުރުމުން ރާޝިދު ވަނީ މިރޭ ޕީއެންސީއަށް ސޮއި ކުރައްވާނެކަން ކަށަވަރު ކޮށްދެއްވައިފަ އެވެ. އޭނާ ވިދާޅުވީ މިރޭ ޕީއެންސީން ބާއްވާ ޖަލްސާގައި ބައިވެރިވެވަޑައިގަންނަވާނެ ކަމަށެވެ.

ނަމަވެސް މިވަގުތާ ހަމައަށް ވެސް ރާޝިދު އެމްޑީޕީން ވަކިވާން އެދި ފޯމު ހުށަހަޅައިފަ އެއް ނުވެ އެވެ. "އަދަދު" އަށް އެނގިފައި ވާގޮތުގައި އެމްޑީޕީން ވަކިވުމަށް އެދި ފޯމު ހުށަހަޅާފައިވަނީ މަރަދޫ ދާއިރާގެ މެންބަރު އިބްރާހިމް ޝަރީފުގެ އިތުރުން ކުރެންދޫ ދާއިރާގެ މެންބަރު އަބްދުލް ގަނީ އަބްދުލްހަކީމް އެވެ.

ކޮމަންޑޫ ދާއިރާގެ މަޖިލިސް ގޮނޑި ރާޝިދު ކާމިޔާބު ކުރެއްވީ ވަރުގަދަ ކެމްޕޭނަކަށްފަހު ފެބްރުއަރީ 5، 2022 ގަ އެވެ. އޭނާގެ ކެމްޕޭނަށް އޭރުގެ ސަރުކާރުގައި އޮތް އެމްޑީޕީން ބުރަ މަސައްކަތްތަކެއް ކުރި އެވެ.

އެމްޑީޕީގެ މެންބަރެއްގެ ގޮތުގައި މިހާރު މަޖިލީހުގައި ރާޝިދު ހުންނެވި ނަމަވެސް އޭނާ އަކީ މީގެ ކުރިން ޑީއާރުޕީ އާއި ޖުމްހޫރީ ޕާޓީގައި ވެސް މަސައްކަތް ކުރެއްވި ބޭފުޅެކެވެ. އެމްޑީޕީއާ ގުޅިވަޑައިގަތުމުގެ ކުރިން ވަރަށް ފަހަކާ ހަމައަށް ވެސް ހުންނެވީ އެމްޑީޕީގެ ފިކުރާ ދުރު މެންބަރެއްގެ ގޮތުގަ އެވެ.