ޕެރިސް (ނޮވެމްބަރު 28) - ޗެލްސީ އާއި އާސެނަލަށް ކުރިން ކުޅެފައިވާ މަޝްހޫރު ގޯލްކީޕަރު، ޕީޓަ ޗެކް، މި ހަފްތާގައި ރަސްމީކޮށް ޕްރޮފެޝަނަލް އައިސް ހޮކީ ލީގުގައި ފުރަތަމަ ފަހަރަށް ކުޅެފި އެވެ.

އިނގިރޭސި ޕްރިމިއާ ލީގުގެ ޗެމްޕިއަންކަމާއި ޗެމްޕިއަންސް ލީގު ވެސް ކާމިޔާބުކޮށްފައިވާ ޗެކް، 41، މިދިޔަ ހޮނިހިރު ދުވަހު ވަނީ ނެޝަނަލް އައިސް ހޮކީ ލީގުގައި ބެލްފާސްޓް ޖަޔަންޓްސްގެ މެޗުގައި ބަދަލަކަށް ކުޅެން އަރައިފަ އެެވެ.

ޗެކް، އެ މެޗުގައި ކުޅެން އެރިިއިރު ބާކީ 4 މިިނިޓް 43 ސިކުންތު ހުއްޓެވެ. އެ މެޗުން ބެލްފާސްޓް ޖަޔަންޓްސް މޮޅުވީ 5-1 އިންނެވެ.

ފުޓްބޯޅަ ކުޅުމުން 2019 ވަނަ އަހަރު ރިޓަޔާ ކުރުމަށް ފަހު، ޗެކް، އިނގިރޭސި އައިސް ހޮކީ ލީގުގެ ދެ ވަނަ ޑިވިޝަނުގައި ގިލްޑްފޯޑް ފީނިކްސް ކުޅުނެވެ. އެ ޓީމުން ފުރަތަމަ ޑިވިޝަނަށް ޕްރޮމޯޓްވާން އެހީތެރިވެދިނުމަށް ފަހު، ޗެކް، ވަނީ މި މަހު، ނޮދަން އަޔަލެންޑްގެ ބެލްފާސްޓް ޖަޔަންޓްސް އަށް ބަދަލުވެ، އެ ޓީމަށް ޕްރޮފެޝަނަލްކޮށް ކުޅެން ފަށައިފަ އެވެ.

"މިއީ ވަރަށް ހާއްސަ ވަގުތެއް. އަބަދުވެސް މި މެޗު ހަނދާން ހުންނާނެ، އެންމެ ބޮޑު އުފަލަކީ މެޗުން މޮޅުވުން،" ޕްރޮފެޝަނަލް ލެވަލްގެ ފުރަތަމަ މެޗަށް ފަހު ޗެކް ބުންޏެވެ.

ޗެކް ވަނީ މީގެ ކުރިން ބެލްފާސްޓް ޖަޔަންޓްސް އަށް ޗެރިޓީ މެޗެއްގައި ވެސް ކުޅެދީފަ އެވެ. އެއީ، ޔޫކްރެއިން މީހުންނަށް އެހީވާން ކުޅުނު ފަންޑް ރެއިޒިން މެޗެކެވެ.

މިދިޔަ ހަފްތާގައި އިނގިރޭސި މީޑިއާ އަކަށް ދިން އިންޓަވިއުއެއްގައި ޗެކް ބުނީ އަބަދުވެސް އައިސް ހޮކީ ކުޅެން ޝައުގުވެރިވާ ކަމަށެވެ.