އދ. މަހިބަދޫ ރައްޔިތުންނަށް ބޯހިޔާވަހިކަން ހޯދައިދިނުމަށް އެ އަތޮޅު މާފަރު ފަޅު ހިއްކަން ރައީސް އިބްރާހިމް މުހައްމަދު ސޯލިހު ނިންމަވައިފި އެވެ.

މާފަރު ފަޅު ހިއްކައިގެން މަހިބަދޫ ރައްޔިތުންނަށް ގޯތި ދޫކުރުމަށް ރައީސް ސޯލިހު މިއަދު ނިންމަވާފައިވާއިރު، އެރަށުން ގޯތި ދޫނުކުރާތާ 30 އަހަރަށްވުރެ ގިނަ ދުވަސް ވަނީ ވެފަ އެވެ.

އދ. މަހިބަދޫގެ ބިމުގެ ބޮޑު މިނަކީ 22.3 ހެކްޓަރެވެ. އެރަށުގެ އާބާދީގައި 2413 މީހުން ރަޖިސްޓްރީވެފައި ވެ އެވެ.

މިއީ ރަށުގެ ބިން މުޅިންހެން ފުރިފައި އޮތް ރަށެކެވެ. ދިރުއުޅުމަށް ގޯތި ދޫކުރާނެ ބިމެއް ނެތެވެ. އަދި ސިނާއީ މަސައްކަތްތަކާއި އެނޫންވެސް އިގްތިސާދީ އެކިއެކި މަސައްކަތްތަކަށް ދޫކުރެވޭނެ ބިމެއް ވެސް އެރަށުގައި ނެތެވެ.

މަހިބަދޫއިން މައުލޫމާތުދިން ބައެއް މީހުން ބުނި ގޮތުގައި، އެރަށުގައި އަމިއްލަ ބިމެއް ނެތުމުގެ ސަބަބުން ކުރިން ދޫކޮށްފައިވާ ގޯތިތަކުގައި ގިނަ އާއިލާތަކެއް އުޅެން ވަނީ މަޖުބޫރުވެފަ އެވެ.

މީގެ ކުރިން މަހިބަދޫގައި ފްލެޓު އަޅަން ނިންމައި ބިން ވެސް ހުސްކުރި އެވެ. ނަމަވެސް އަދި އެ މަސައްކަތް ފެށިފައެއް ނުވެ އެވެ.

މަހިބަދޫއަކީ ކަންނެލީގެ މަސްވެރިކަން، ވަޑާމާއި އަދި ފުޅާ ދާއިރާއެއްގައި ލޯކަލް ޓޫރިޒަމް ހިންގަމުން އަންނަ ރަށެކެވެ.