މިހާރު ކުރިއަށްދާ އޭއެފްސީ އޭޝިއަން ފުޓްސަލް ކަޕް ކޮލިފައިންގައި ރާއްޖޭގެ ގައުމީ ފުޓްސަލް ޓީމަށް އެންމެ ބޮޑު ދިމާވާ މައްސަލަ އަކީ މި ލެވަލްގެ ތަޖުރިބާ މަދުވުން ކަމަށް ޓީމުގެ ހެޑް ކޯޗު އަބްދުﷲ ނަސީރު (އަބޯ) ވަނީ ބުނެފައި ބުނެފި އެވެ.

ކިރްގިސްތާންގެ ބިޝްކެކްގައި ކުރިއަށްދާ ކޮލިފައިންގައި ގައުމީ ފުޓްސަލް ޓީމު ކުޅުނު ފުރަތަމަ މެޗުން 18-2 އިން އިރާން އަތުން ބަލިވިއިރު، ދެ ވަނަ މެޗުން ވަނީ އިއްޔެ 6-1 އިން ލެބަނަަން އަތުން ބަލިވެފަ އެވެ. ކޮލިފައިން ގްރޫޕް ސީގެ ކުރީގައި އޮތީ ރޭ ކިރްގިސްތާން އަތުން 10-2 އިން މޮޅުވި އިރާން އެވެ.

ދުނިޔޭގެ ރޭންކިން ހަ ވަނައިގައި އޮތް އިރާން މި ގްރޫޕްގެ އެއް ވަނައިގައި ހަ ޕޮއިންޓާ އެކު އޮތްއިރު، ދެ ވަނައިގައި އޮތީ ތިން ޕޮއިންޓާ އެކު ލެބަަނަން އެވެ. ތިން ވަނައިގައި އޮތް ކިރްގިސްތާނަށް ވެސް ތިން ޕޮއިންޓް ލިބިފައިވާއިރު، ރާއްޖެ ފަހަތުގައި އޮތީ ޕޮއިންޓެއް ނުލިބި އެވެ.

ފުރަތަމަ ދެ މެޗުން ބަލިވުމުން ގަދަ ދެ ޓީމުގެ ތެރޭގައި ހިމެނިގެން އޭޝިއަން ފުޓްސަލް ކަޕަށް ކޮލިފައިވުމުގެ ފުރުސަތު ރާއްޖެ އަށް ވަނީ ގެއްލިފަ އެވެ.

ލެބަނަންއާ ދެކޮޅަށް އިއްޔެ ކުޅުނު މެޗުގައި ރާއްޖޭން ވަނީ އަލީ ހާފިޒް (ހާއްޕެ)ގެ ގޯލުން ލީޑުނަގައިފަ އެވެ. އެކަމަކު، ފަހަތުން އަރައި އެ ޓީމުން ފުރަތަމަ ހާފުގައި ނަތީޖާ އަނބުރާލައި، ދެ ވަނަ ހާފުގައި އިތުރު ގޯލުތަކެއް ޖަހައި ފަރަގު ބޮޑުކުރި އެވެ.

މެޗަށް ފަހު މީޑިއާއާ ވާހަކަ ދައްކަމުން އަބޯ ބުނީ މެޗަށް ބަލާއިރު ރަނގަޅަށް ކުޅެން މަސައްކަތްކުރިތަން ފެނިގެންދިޔަ ކަމަށެވެ.

"އަހަރެމެންގެ ތަޖުރިބާ މި ފެންނަނީ ވަރަށް ދަށްކޮށް. އެހެންވެ މިހެން މި މެޗުގައި މި ދިމާވީ ވެސް، ލެބަނަން އަކީ ވަރަށް ތަޖުރިބާހުރި ކުޅުންތެރިން ގިނަ ޓީމެއް. މެޗު ރަނގަޅު، އަހަރެމެން ޓީމު ކުޅޭގޮތް ވެސް ރަނގަޅު، ތަޖުރިބާ ހަމަ މަދީ،" އަބޯ ބުންޏެވެ.

ގްރޫޕްގެ ފަހު މެޗުގައި ރާއްޖޭން ބުދަ ދުވަހު ކުޅޭނީ ކިރްގިސްތާންއާ އެވެ. އެ މެޗާ ބެހޭގޮތުން އަބޯ ބުނީ ކިރްގިސްތާން އަކީ ވެސް ވަރުގަދަ ޓީމެއް ކަމަށާއި ފުރަތަމަ މެޗުގައި ލެބަނަން އަތުން 5-4 އިން މޮޅުވި މެޗު ބެލި ކަމަށާއި މިއީ އުނދަގޫ މެޗަކަށްވާނެ ކަމަށެެވެ.

"ކިރްގިސްތާން އަކީ ހޯމް ޓީމު. ވަރަށް ރަނގަޅަށް ޑިފެންސްކޮށްގެން ރަނގަޅަށް ކުޅެން ޖެހޭނީ،" އަބޯ ބުންޏެވެ.

މިދިޔަ އަހަރުގެ ކޮލިފައިން ގްރޫޕްގައި ކިރްގިސްތާން އަތުން ރާއްޖެ ވަނީ 7-1 އިން ބަލިވެފަ އެވެ.

އެންމެ ފަހުން ބޭއްވި ކޮލިފައިން އަށް ވުރެ މި ފަހަރު މިހާތަނަށް ގައުމީ ފުޓްސަލް ޓީމުގެ ނަތީޖާތަށް ޖުމްލަ ގޮތެއްގައި ފެންނަނީ ރަނގަޅަށެވެ. އެ ގޮތުން، މިދިޔަ އަހަރަށް ވުރެ، މި އަހަރު ވެސް ޓީމުން އެޓޭކިންގައި އިތުބާރާ އެކު ކުޅޭތަން އަންނަނީ ފެންނަމުންނެވެ.

ގައުމީ ފުޓްސަލް ޓީމަށް ދިމާވާ އެންމެ ބޮޑު މައްސަލަ އަކީ މާލޭގައި ޓާފް ފުޓްސަލް ދަނޑުގައި ކުޅުމަށް ފަހު ބައިނަލްއަގުވާމީ ލެވަލްގައި އިންޑޯގައި ކުޅެން ޖެހޭއިރު، އެކަށީގެންވާ މިންވަރަށް ފަރިތަވެފައި ނެތުމެވެ.