އޭއެފްސީ އޭޝިއަން ފުޓްސަލް ކަޕްގެ ކޮލިފައިންގައި ރާއްޖޭގެ ގައުމީ ފުޓްސަލް ޓީމު ކުޅުނު ދެ ވަނަ މެޗުން ލެބަނަން އަތުން 6-1 އިން ބަލިވެއްޖެ އެވެ.

މި މެޗުގައި ރާއްޖޭން ލީޑުނަގައި ފުރަތަމަ ހާފުގައި ރަނގަޅު ކުޅުމެއް ދެއްކި އެވެ. އެކަމަކު، ތަޖުރިބާގެ އަލީގައި ލެބަނަން އިން ދެ ވަނަ ހާފުގައި ކުޅުން ރަނގަޅުކޮށް، ފަރަގު .ބޮޑުކުރަން ލިބުނު ފުރުސަތުތަކުގެ ބޭނުންހިފައި، މޮޅެއް ހޯދައިގެން މުބާރާތުގައި ކުރިއަށް ދިއުމުގެ އުންމީދު ވަނީ ހޯދައިފަ އެވެ.

ފުރަތަަމަ ދެ މެޗުން ބަލިވުމުން، ގްރޫޕް ސްޓޭޖުގައި ބާކީ މެޗެއް އޮއްވައި، ރާއްޖެ އަށް ކުރިއަށް ދިއުމުގެ ފުރުސަތު ވަނީ ގެއްލިފަ އެވެ.

ކިރްގިސްތާންގެ ބިޝްކެކްގައި ކުރިއަށްދާ ކޮލިފައިން މެޗުތަކުގައި މިއަދު ރާއްޖޭން ވަނީ ފަށައިގެން ފަހަތުގައި މަޑުކޮށްގެން ތިބެ، ލިބޭ ފުރުސަތުތަކުގައި ކުރިއަށް ގޮސް ލެބަނަން އަށް ނުރައްކާ ކޮށްފަ އެވެ. އެ ގޮތުން، ރާއްޖެ އަށް ލިޑުނަގައިދޭން ހުސްކޮށް ލިބުނު ފުރުސަތެއްގައި އަލީ ޝިޔާހު (ޝިޔަޅޭ) ޖެހި ބޯޅަ އަމާޒުވީ ގޯލުގެ ދަނޑިއަށެވެ.

ރާއްޖޭން ލީޑުނެގީ ބަދަލަކަށް ކުޅެން އަރައި، އަލީ ހާފިޒް (ހާއްޕެ) ޖެހި ގޯލުންނެވެ. ހާއްޕެ މި ލަނޑު ޖެހީ ލެބަނަންގެ ކީޕަރު ކައިރިން ނައްޓާލުމަށް ފަހު، ކައިރީ ކަނަށް ބޯޅަ ފޮނުވާލައިގެންނެވެ. ކޮލިފައިންގައި ރާއްޖޭން ޖެހި ތިން ގޯލުގައި ވެސް ހާއްޕެގެ ހިއްސާ އެބައޮތެވެ. ފުރަތަމަ މެޗުގައި، އިރާން ކޮޅަށް ފުރަތަމަ ގޯލު ޖެހުމަށް ފަހު، ދެ ވަނަ ގޯލު ޖަހަން ފުރުސަތު ހޯދައިިދިނީ ހާއްޕެ އެވެ.

ލެބަނަން ކޮޅަށް ގޯލު ޖެހުމަށް ފަހު ހާއްޕެ އުފާފާޅުކުރަނީ.

ފުރަތަމަ ހާފުގެ ފަހުކޮޅުގައި ލެބަނަން އިން ދެ ގޯލު ޖަހައި، ނަތީޖާ އަނބުރާލި އެވެ. ދެ ގޯލު ވެސް ޖެހީ ރާއްޖެ އޭރިއާތެރެއިން ލިބުނު ޖާގައިގެ ބޭނުންކޮށްގެންނެވެ.

ރާއްޖެ އަތުގައި ލީޑު ބޭއްވުމަށް ފުރަތަމަ ހާފުގައި ކީޕަރު ޒައިދާން އަހުމަދު (އަސޫ) ވަނީ ގިނަ ބޯޅަތަކެއް ހުއްޓުވައިފަ އެވެ.

ލެބަނަން އިން ވަނީ ދެ ވަނަ ހާފުގައި ހަތަރު ގޯލު ޖަހައި، މުބާރާތުގެ ފުރަތަމަ ތިން ޕޮއިންޓް ހޯދައިފަ އެވެ.

ލެބަނަން ވަނީ ފުރަތަމަ މެޗުގައި 5-4 އިން ކިރްގިސްތާން އަތުން ބަލިވެފަ އެވެ. އިރާނުން ވަނީ 18-2 އިން ރާއްޖެ ބަލިކޮށްފަ އެވެ. އިރާނަށް އެއް މެޗުން ތިން ޕޮއިންޓް ލިބިފައިވާއިރު، ލެބަނަން އިން ދެ މެޗުން ތިން ޕޮއިންޓް ހޯދައި، އޮތީ ދެ ވަނައިގަ އެވެ. ތިން ވަނައިގައި އޮތް ކިރްގިސްތާނަށް އެއް މެޗުން ތިން ޕޮއިންޓް ލިބިފައިވާއިރު، ދެ މެޗު ކުޅެގެން ޕޮއިންޓެއް ނުލިބި ރާއްޖެ އޮތީ ގްރޫޕްގެ ފަހަތުގަ އެވެ.

މި ގްރޫޕްގައި މިިއަދު ކުޅޭ އަނެއް މެޗުގައި އިރާނާއި ކިރްގިސްތާން ބައްދަލުކުރާނެ އެވެ. ރާއްޖޭން ކޮލިފައިންގައި ކުޅޭ ފަހު މެޗުގައި ބުދަ ދުވަހު ބައްދަލުކުރާނީ ކިރްގިސްތާންއާ އެެވެ.