ރިޔާސީ އިންތިހާބަށް ފަހު ރައީސް އިބްރާހީމް މުހައްމަދު ސޯލިހު މިއަދު ކެބިނެޓާ ބައްދަލު ކުރައްވައިފި އެވެ.

ސަރުކާރުގެ އޮފިޝަލަކު "އަދަދު" ނޫހަށް ވިދާޅުވީ މިއަދު ބޭއްވި ކެބިނެޓް ބައްދަލުުވުމަށް ޓްރާންސްޕޯޓް މިނިސްޓަރު އައިޝަތު ނަހުލާ ފިޔަވައި ހުރިހާ މިނިސްޓަރުން ވަޑައިގެންނެވި ކަމަށެވެ. އެ ބައްދަލުވުމުގައި މަޝްވަރާ ކުރެއްވީ ސަރުކާރު ހިންގުމުގައި މިހާތަނަށް ކުރެވިފައިވާ ކަންތައްތަކާއި ރަނގަޅުކުރަން ޖެހިފައި ހުރި ކަންތައްތަކާ ބެހޭ ގޮތުން ކަމަށް އޭނާ ވިދާޅުވި އެވެ.

ރައީސް ސޯލިހުގެ ވެރިކަމުގައި އެމަނިކުފާނު އެޅުއްވި މުހިއްމު ފިޔަވަޅުތަކާއި ކުރެއްވި ރަނގަޅު ކަންތައްތަކަށް ޓަކައި މިއަދުގެ ބައްދަލުވުމުގައި ވަޒީރުން އެމަނިކުފާނަށް ޝުކުރު އަދާކުރެއްވި އެވެ.

ރިޔާސީ އިންތިހާބު، ޕީއެންސީގެ ކެންޑިޑޭޓު އަދި މާލޭ ސިޓީގެ މޭޔަރަކަށް ހުންނެވި ޑރ. މުއިއްޒު ކާމިޔާބު ކުރެއްވީ 54 ޕަސެންޓު ވޯޓުންނެވެ. އިއްޔެ ބޭއްވި އިންތިހާބުގެ ދެ ވަނަ ބުރުގައި 243،000 އަށް ވުރެ ގިނަ މީހުން ވޯޓުލާފައިވެ އެވެ. އެއީ ވޯޓުލުމުގެ ހައްގު ލިބިގެންވާ 282,804 މީހުންގެ ތެރެއިން 86 ޕަސެންޓެވެ.

މުއިއްޒަށް ލިބިވަޑައިގަތީ 127,000 އަށް ވުރެ ގިނަ ވޯޓު ލިބިވަޑައިގެންނެވިއިރު، ރައީސް ސޯލިހަށް 108,000 އަށް ވުރެ ގިނަ ވޯޓު ލިބިވަޑައިގައި ގެންފައިވެ އެވެ.