މިއަދުގެ އިންތިހާބު ކުރިއަށް ދަނިކޮށް ގދ. ވާދޫގައި ފަޅާލި ވޯޓު ފޮށީގެ ނަތީޖާ އިއުލާންކޮށްފި އެވެ.

މިއަދު ހަވީރު އެ ހާދިސާ ހިނގީ ވާދޫގައި ވޯޓުލުން ބަންދުކޮށްފައި ހުއްޓާ މީހަކު އޭނާއަށް އައިޑީ ކާޑު ނުލިބުނު ކަމަށް ބުނެ ވޯޓުލާ މަރުކަޒު ތެރެއަށް ވަދެ ރުޅި އައިސްގެންނެވެ. ފުލުހުން ވަނީ މިހާރު ވޯޓު މަރުކަޒު ބަންދުކޮށް، ތަން ރައްކާތެރިކުރި އެވެ.

އެ ފޮށީގެ ނަތީޖާ އިއުލާންކޮށްފައިވާއިރު އެ ފޮށި ކާމިޔާބު ކުރީ 312 ވޯޓާއެކު ރައީސް އިބްރާހިމް މުހައްމަދު ސޯލިހު އެވެ. އިދިކޮޅު ކެންޑިޑޭޓު ޑރ. މުހައްމަދު މުއިއްޒުއަށް ލިބުނީ 141 ވޯޓެވެ. އެ ފޮށްޓަށް 13 ބާތިލް ވޯޓުލާފައިވެ އެވެ.

"އަދަދު" އަށް އެނގިފައިވާ ގޮތުގައި، ވޯޓުލުން ބަންދުކޮށްފައި ހުއްޓާ ފޮށި ފަޅާލި މީހާ ވަނީ ވޯޓު ފޮށި ނަގައި ވަރަށް ބާރަށް ތަޅުންގަނޑު މައްޗަށް ޖަހައިފަ އެވެ.

އެއާއެކު ފޮށި ފަޅައިގެން ގޮސް އޭގައި ހުރި ވޯޓުތައް ބިންމައްޗަށް ވެއްޓިފައި އޮތް މަންޒަރު މި ނޫޫހަށް ލިބިފައިވާ ފޮޓޯތަކުން ފެނެ އެވެ.

ފުލުހުން ބުނީ އެ މައްސަލަ ރިޕޯޓު ކުރުމުން އެ މީހާ މިހާރު ހައްޔަރުކޮށްފައިވާ ކަމަށެވެ.