އޭއެފްސީ ފުޓްސަލް އޭޝިއަން ކަޕް ކޮލިފައިންގައި ވާދަކުރާ ގައުމީ ފުޓްސަލް ޓީމުގެ ސްކޮޑު ފައިނަލްކޮށްފި އެވެ.

އަންނަ މަހު ކިރްގިސްތާންގައި ބާއްވާ ފުޓްސަލް އޭޝިއަން ކަޕް ކޮލިފައިން ގްރޫޕްގެ މެޗުތަކަށް އެންމެ ފުރަތަަމަ އެކުލަވާލީ 40 ކުޅުންތެރިންގެ ޕްރިލިމިނަރީ ސްކޮޑެކެވެ. އޭގެ ފަހުން ޕްރެކްޓިސްތަކެއް ކުރުމަށް ފަހު ސްކޮޑު ވަނީ 20 އަށް ކުޑަކޮށްފަ އެެވެ. އަންނަ މަހު ކޮލިފައިންގައި ވާދަކުރަން ނަގާ 14 ކުޅުންތެރިންގެ ސްކޮޑު ފައިނަލްކޮށްފައިވަނީ އިއްޔެ ކުޅުނު ޕްރެކްޓިސް މެޗަށް ފަހު އެވެ.

އެ ގޮތުން، އެންމެ ފަހުން ގައުމީ ފުޓްސަލް ޓީމުން އޭޝިއާ ކޮލިފައިންގައި ވާދަކުރިއިރު، ނެގި ސްކޮޑަށް މި ފަހަރު ވަނީ ބަދަލުތަކެއް އަތުވެފަ އެވެ.

ގައުމީ ފުޓްސަލް ސްކޮޑު:

މުހައްމަދު އިމްރާން (އިންމި)، ސާމިން މުހައްމަދު ނަސީރު، އަލީ ހާފިޒް (ހާއްޕެ)، ހުޒައިފަތު ރަޝީދު (ހުޒޭ)، ހުސެއިން ޝަރީފް (އޮންލީ)، އަބްދުﷲ ޝާފިއު (ޝާއްޕެ)، އިޝާން އިބްރާހިމް (ސައްޓު)، ހުސެއިން ސުހައިލް (ސޮކޭ)، އިސްމާއިލް ވަޖީހު (ވައްޖެ)، ޔާމީން މުހައްމަދު (ޔާންޓެ)، އަލީ ޝިޔާހު (ޝިޔާ)، އަލީ މާއިސް (މައްޓު)، ޒައިދާން އަހުމަދު (އަސޫ)، ފައްޔާޒް ފަޔާޒް (ފައިއްޓެ)

ގައުމީ ފުޓްސަލް ޓީމުގެ ފަރިތަކުރުމެއްގެ ތެރެއިން ސައްޓު (ކ) ކައިރިން ހުޒޭ ބޯޅަހިފައިގެންދާން މަސައްކަތްކުރަނީ.--- ފޮޓޯ: އަބްދުﷲ ޔަޝައު/ ސިޑިބަރި

މި ފަަހަރު ވެސް ގައުމީ ފުޓްސަލް ޓީމުގެ ހެޑް ކޯޗަކީ އަބްދުﷲ ނަސީރު (އަބޯ) އެވެ. އެސިސްޓަންޓް ކޯޗުންގެ ގޮތުގައި އަހުމަދު ވިޝާލް އާއި އަހުމަދު ތޯހާ ހުރިއިރު، ގޯލްކީޕަރު ޓްރެއިނަރަކީ އިބްރާހިމް އަހުމަދު އެވެ. އޮފިޝަލަކަށް އަހުމަދު ޝަހުމް މުހައްމަދު ހުރިއިރު، ޓީމުގެ މެނޭޖަރަކީ އަލީ ނަދީމް (ކޮކޯ) އެވެ.

ފުޓްސަލް އޭޝިއަން ކަޕް ކޮލިފައިންގައި ރާއްޖޭން އަންނަ މަހު ހަތް ވަނަ ދުވަހު ކުޅޭނީ އީރާންއާ އެވެ. އޭގެ އެއް ދުވަސް ފަހުން ދެ ވަނަ މެޗުގައި ލެބަނަންއާ ބައްދަލުކުރުމަށް ފަހު، ތިން ވަނަ މެޗުގައި 11 ވަނަ ދުވަހު ކުޅެން ޖެހެނީ ކިރްގިސްތާންއާ އެެވެ.

މިދިޔަ އަހަރެކޭ އެއްގޮތަށް މި ފަހަރު ވެސް ގައުމީ ފުޓްސަލް ޓީމުން އޭޝިއަން ކަޕް ކޮލިފައިންގައި ވާދަކުރަން ދިޔައިރު އެންމެ ބޮޑު ގޮންޖެހުމަކަށްވީ ރާއްޖޭގައި ރަނގަޅު ފުޓްސަލް އިންޑޯ އެއް ނެތުމުން ތަމްރީން ކުރެވެން ނެތުމެވެ. މިދިޔަ އަހަރު ގައުމީ ފުޓްސަލް ޓީމަށް ވަނީ އޭޝިއަން ކަޕް ކޮލިފައިންގެ ކުރިން ތައިލެންޑްގައި ކުރިއަށްދިޔަ އިންވިޓޭޝަނަލް މުބާރާތެއްގައި ވާދަކުރަން ފުރުސަތު ލިބިފަ އެވެ.

މި ފަހަރުގެ މުބާރާތަށް ތައްޔާރުވުމުގެ ގޮތުން ގައުމީ ފުޓްސަލް ޓީމަށް އެންމެ ބޮޑަށް ބޭނުންވަނީ ރާއްޖޭން ބޭރުގައި ރަނގަޅު މެޗުތަކެއް ކުޅެވޭ ގޮތަށް ޓްރެއިނިން ކޭމްޕެއް ކަމަށް ޓީމުން ވަނީ ބުނެފަ އެވެ.