ދީނީ ހިޔާލު ތަފާތުވުންތަކުގެ ސަބަބުން ކުރިން އުފެދުނު ހަމަނުޖެހުންތައް ހައްލުކުރީ މުއިއްޒު ހިމެނޭ ރައީސް ޔާމީނުގެ ސަރުގާއި ކަމަށާއި، އެކަންކަން އަދިވެސް ހައްލުވާނީ ޕީޕީއެމް/ޕީއެންސީގެ ސަރުކާރަކަށް ކަމަށް ކުރީގެ އިސްލާމިކް މިނިސްޓަރު ޝަހީމް ވިދާޅުވެއްޖެ އެވެ.

ރައީސް ޔާމީނުގެ ސަރުކާރުގައި ދީނީ ގޮތުން ހިޔާލުތަފާތުވުމާއި ހަރުކަށި ފިކުރުގެ ހަރަކާތްތައް މުޅި ރާއްޖޭގައި ފެތުރިފައި އޮތް މިންވަރު ފާހަގަކުރައްވަމުން ޝަހީމް ވިދާޅުވީ، ރައީސް ޔާމީނުގެ ވެރިކަން ނިމުމަކަށް އައި އިރު ހަރުކަށި ފިކުރާއި ވަކި ޖަމާއަތް ހަދައިގެން ނަމާދުކުރުމުގެ މައްސަލަ އޮތީ ވަރަށް ބޮޑަށް ހައްލުވެފައި ކަމަށެވެ.

ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު އަކީ ހަރުކަށި ފިކުރަށް ތާއީދުކުރާ އެ ފިކުރުގެ ބޭފުޅެއް ކަމަށް ދައްކާ ވާހަކަތަކަށް ވެސް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ރައްދު ދެއްވާފަ އެވެ.

އަރިއަތޮޅު އުތުރުބުރީގެ ރަށްރަށަށް ކުރައްވާ ކެމްޕޭން ދަތުރުގެ ތެރެއިން އެއަތޮޅު ހަންޏާމީދޫގައި ބޭއްވި ބައްދަލުވުމުގައި ވާހަކަ ދައްކަވަމުން ޑރ. ޝަހީމް ވިދާޅުވީ، އެންޓި ކެމްޕޭނުގެ ގޮތުގައި މުއިއްޒަކީ ހަރުކަށިފިކުރަށް ތާއީދުކުރާ ބޭފުޅެއް ކަމަށް ބަޔަކު ވާހަކަ ފަތުރާކަމަށެވެ.

"ދީނީ ހަމަނުޖެހުންތަކާ ތަފާތު ހިޔާލުތަކުގެ ސަބުން އެރަށުގައި [ހިމަންދޫގައި] އުފެދުނު ނުރައްކާތެރި ކަންތައްތައް ވިސްނާލައްވާ. އެކަންތައްތައް ހައްލުކުރީ ކޮންބައެއްތޯ. އާދެ އެކަންތައްތައް ހައްލުކުރީ ރައީސް ޔާމީނުގެ ސަރުކާރުން. އެކަންތައްތައް ހައްލުކުރުމުގައި އިސްކޮށް އުޅުނު ފަރާތްތައް މިއަދު ޑރ. މުއިއްޒުގެ އަރިހުގައި މިތިބީ" ޝަހީމް ވިދާޅުވި އެވެ.

"އަސްކަރީ ބާރުވެރިކަމެއް ނެތި އިލްމުގެ ޒަރިއްޔާއިން އެކަންތައްތައް ހައްލުކުރީ. އެކަންތައްތައް ހައްލުކުރި މީހުން މިއަދު ޑރ. މުއިއްޒުގެ އަރިހުގައި މިތިބީ. އެއީ އަޅުގަނޑުމެން އެކަންތައްތައް ހައްލުކުރީ" ޝަހީމް ވިދާޅުވި އެވެ.

އއ. ހިމަންދޫގައި ވަކި ޖަމާއަތް ހަދައިގެން ބަޔަކު ނަމާދުކުރާ މައްސަލަ ހޫނުވެ، އެކަން ހައްލުކުރުމަށް ދިޔަ ފުލުހުންނާ ކުރިމަތިލައި ދިވެހި ތާރީހުގައި ނުދެކޭފަދަ ބޮޑު ހަމަނުޖެހުމަކަށް އެކަން ބަދަލުވެގެން ދިޔައީ 2007 ވަނަ އަހަރުގަ އެވެ.

އެ މީހުން، ސަލާމަތީ ހިދުމަތްތަކާ ކުރިމަތިލީ ކޮޅު ތޫނުކޮށްފައި ހުރި ލަކުޑިބުރި އާއި ދަނޑިބުރި އާއި ކަނޑި ހިފައިގެން ބޮލުގައި ހެލްމެޓް އަޅައި މޫނު ނިވާކޮށްގެންނެވެ. ޖުމްލަ 53 މީހަކު ނިކުމެ ހިންގި އެ ހަމަނުޖެހުމާއި ގުޅިގެން 37 މީހެއްގެ މައްޗަށް ދައުވާ އުފުލި އެވެ. އެ މައްސަލާގައި ބަޔަކު ހައްޔަރުކޮށް ދިގު މުއްދަތަށް ޖަލަށް ވެސް ލިއެވެ.