ފްލޮރެންސް، އިޓަލީ (ސެޕްޓެމްބަރު 12) - ލޯން ޑީލެއްގެ ދަށުން ޓްރާންސްފާގެ ފަހު ވަގުތު މެންޗެސްޓާ ޔުނައިޓެޑަށް މޮރޮކޯގެ މިޑްފީލްޑަރު، ސޯފްޔަން އަމްރަބަތު ދޫކޮށްލިއިރު، އެ ޑީލްގައި ފިއޮރެންޓީނާ އިން ބޭނުންވި މާއްދާއެއް ހިމަނާފައިވާކަން ހާމަވެއްޖެ އެވެ.

ގަތަރުގައި މިދިޔަ އަހަރު ބޭއްވި ފީފާ ވޯލްޑް ކަޕްގައި މޮރޮކޯ ޓީމުން ވިދާލި އަމްރަބަތު، 27، ހޯދަން ގިނަ ކްލަބްތަކަކުން މަސައްކަތް ކުރި ނަމަވެސް ފިއޮރެންޓީނާ އިން ބޭނުންވާ އަގުދޭން ގިނަ ޓީމުތަކަކުން ބޭނުމެއް ނުވި އެވެ. ޖެނުއަރީ ޓްރާންސްފާގައި އަމްރަބަތު، ބާސެލޯނާ އަށް ބަދަލުވުމާ ގާތަށް ޖެހިލި އެވެ. އެކަމަކު، ބާސެލޯނާ އަށް އޭރު ޓްރާންސްފާ ފީއެއް ދެއްކޭ ގޮތްނުވި އެވެ.

ޔުނައިޓެޑުން މި ފަހަރުގެ ޓްރާންސްފާގައި އަމްރަބަތު ޑީލް ނިންމީ، އެއް އަހަރު ދުވަހުގެ ލޯން ފީއެއްގެ ގޮތުގައި 10 މިލިއަން ޑޮލަރު ދައްކާ ގޮތަށެވެ. އަދި މި ސީޒަނަށް ފަހު ކޮންޓްރެކްޓް ދާއިމީ ކުރާނަމަ އިތުރު 30 މިލިއަން ޑޮލަރު ދޭން ވަނީ އެއްބަސްވެފަ އެެވެ.

ފިއޮރެންޓީނާ އިން ވަނީ ޔުނައިޓެޑަށް އަމްރަބަތު ދޫކޮށްލި ޑީލްގައި ހާއްސަ މާއްދާއެއް ހިމަނައިފަ އެވެ. އެ ގޮތުން، އަމްރަބަތު މި ވަގުުތު ފިއޮރެންޓީނާއާ އެކު ކޮންޓްރެކްޓްގައި ހުރީ 2025 ވަނަ އަހަރުގެ ޖޫން މަހުގެ ނިޔަލަށެވެ. އެކަމަކު، މި ސީޒަނަށް ފަހު ޔުނައިޓެޑުން އަމްރަބަތުގެ ޑީލް ދާއިމީ ނުކުރަން ނިންމައިފިނަމަ، ފިއޮރެންޓީނާ އަށް އަމްރަބަތު، އެ ކްލަބާ އެކު ހަދާފައިވާ ކޮންޓްރެކްޓް، 2026 ވަނަ އަހަރުގެ ޖޫން މަހުގެ ނިޔަލަށް އާ ކުރަން ފުރުސަތު ލިބޭނެ އެވެ.

ޔުނައިޓެޑަށް ބަދަލުވި ފަހުން ލިބުނު އަނިޔާއަކާ ހެދި އަމްރަބަތު ވަނީ މޮރޮކޯ ގައުމީ ޓީމުގެ މެޗުތަކަށް ނެގި ސްކޮޑުން ވަކިވެފަ އެވެ.