ރާއްޖޭގެ ސިމްޑީ ގްރޫޕާއި ޔޫއޭއީގެ އަރަބެކްސް ގުޅިގެން އުފައްދާފައިވާ ފުރަތަމަ ލަގްޒަރީ އެއާލައިން، "ބިއޮންޑް" އިން ދިވެހިންނަށް ވަޒީފާގެ ފުރުސަތު ހުޅުވާލައިފި އެވެ.

ބިއޮންޑް އިން އިއުލާނުކޮށްފައި ވަނީ ޕައިލެޓުން، ކެބިން ކްރޫ އަދި ގްރައުންޑް ސްޓާފުންގެ މަގާމުތަކަށް ދިވެހިން ހޯދުމަށެވެ. މި މަގާމުތަކަށް ބޭނުންވަނީ ކިތައް ދިވެހިން ކަމެއް އެ ކުންފުނިން ހާމަކޮށްފައެއް ނުވެއެވެ.

ބިއޮންޑްގެ ޓީމާ ގުޅެން ޝައުގުވެރިވާ ފަރާތްތަކަށް އެ ކުންފުނީގެ ރަސްމީ ވެބްސައިޓް މެދުވެރިކޮށް ވަޒީފާއަށް ކުރިމަތިލެވޭނެ އެވެ. އަދި މި ވެބްސައިޓު މެދުވެރިކޮށް އެ މަގާމުތަކާ ބެހޭ އިތުރު މައުލޫމާތުވެސް ލިބޭނެ އެވެ.

ބިއޮންޑް އިން ބުނީ ވަޒީފާގެ އިތުރުން އެ އެއާލައިނާއެކު ކެރިއާ ޑިވެލޮޕްމަންޓަށް ފަހި ފުރުސަތުތައް ލިބޭނެ ކަމަށެވެ. އެގޮތުން ތަމްރީނުދީ ކެރިއަރު ކުރިއެރުވުމުގެ ފުރުސަތުތައް ފަހިކޮށްދީ، މުވައްޒަފުންނަށް އޭވިއޭޝަން ދާއިރާއިން ކުރިއެރުން ހޯދުމަށް ބޭނުންވާ ވަސީލަތްތައް ފޯރުކޮށްދޭނެ ކަމަށާއި އެ ކުންފުނީގެ ޓީމް މެމްބަރުންނަށް ކުރާ މި އިންވެސްޓްމަންޓަކީ ކުންފުނީގެ ކޮލިޓީ، އެކްސެލެންސް އަދި ޕްރިމިއަމް ޓްރެވަލް އެކްސްޕީރިއަންސެއް ފޯރުކޮށްދިނުމުގެ އަސާސްތަކާ އެއްގޮތްވާ އިންވެސްޓްމަންޓެއް ކަމަށް ދެކޭ ކަމަށް ބުންޏެވެ.

ބިއޮންޑްގެ ޗީފް އެގްޒެކެޓިވް އޮފިސަރު ޓެރޯ ޓަސްކިލާ ވިދާޅުވީ އޭވިއޭޝަން އިންޑަސްޓްރީގެ ތެރޭގައި އެ ކުންފުނީގެ ޓީމް މެމްބަރުން ކުރިއެރުމަށް މަގުފަހިކޮށްދިނުމަކީ ކުންފުންޏަށް ލިބޭ އުފަލެއް ކަމަށާއި ދިވެހިންނަށް ހުޅުވިގެން މިދާ ފުރުސަތުތަކާއެކު ރާއްޖޭގެ ފަތުރުވެރިކަމުގެ ސިނާއަތަށް ހެޔޮ ބަދަލުތަކެއް އަންނާނެ ކަމަށެވެ.

ބިއޮންޑް އެއާލައިނަކީ ލަގްޒަރީ ޓޫރިޒަމް މާކެޓަށް އަމާޒުކޮށްގެން، އެންމެ މަތީ ފަންތީގެ ވައިގެ ދަތުރުފަތުރުގެ ހިދުމަތް ދިނުމުގެ މަގުސަދުގައި ފަށާފައިވާ މަސައްކަތެކެވެ.

ބިއޮންޑުގެ ދަތުރުތައް މި އަހަރުގެ ފަހުކޮޅު ފަށަން ނިންމާފައިވާއިރު، އެއާލައިނަށް މިހާރު ވަނީ ސިވިލް އޭވިއޭޝަން އޮތޯރިޓީ (އެމްސީއޭއޭ)ގެ ކޮންޓިނިން އެއާވާދިނަސް މެނޭޖްމަންޓް އޯގަނައިޒޭޝަން (ކެމޯ)ގެ ހުއްދަވެސް ލިބިފަ އެވެ.

ބިއޮންޑުން ހާމަކޮށްފައިވަ ގޮތުގައި އެއާލައިންގެ ފުރަތަމަ ހަބަކީ ރާއްޖެއެވެ. ދާދި ފަހުން އެއާލައިންގެ މަތިންދާބޯޓެއް ރާއްޖެ ގެނެސް ޓެސްޓު ދަތުރެއްވެސް ވަނީ ކޮށްފައެވެ. މި ދަތުރު ކޮށްފައިވަނީ ވެލާނާ އިންޓަނޭޝަނަލް އެއާޕޯޓާއި ގަން އިންޓަނޭޝަނަލް އެއާޕޯޓާއި ދެމެދު އެވެ.