ރައީސް އިބްރާހީމް މުހައްމަދު ސޯލިހު ވައުދުވެވަޑައިގެންނެވި ގޮތަށް ރ.މަޑުއްވަރީ ކައިރީ އޮންނަ ފަޅުރަށެއް ކަމަށްވާ އުފުލަންދޫ، މަޑުއްވަރީ ކައުންސިލާ މިއަދު ހަވާލުކޮށްފި އެވެ.

ކުރިން މީހުން އުޅުމަށް ފަހު ފަޅުކޮށްފައިވާ އުފުލަންދޫ ކުރީގެ ރައީސް އަބްދުﷲ ޔާމީނުގެ ސަރުކާރުން ޓޫރިޒަމަށް ދޫކުރި އެވެ. އެން ނަމަވެސް އެރަށް ކުއްޔަށް ހިފި ފަރާތަަށް އޭގެ ބަދަލުގައި އެހެން ރަށެއް ދިނުމަށް ފަހު މަޑުއްވަރީ ކައުންސިލާ އެރަށް ހަވާލުކޮށްދޭން އެކައުންސިލުން ކުރިއްސުރެ އައީ އެދެެމުންނެވެ.

އުފުލަންދޫ ސަރުކާރަށް ނަގާފައިވާ ކަން ރައީސް އިބްރާހީމް މުހައްމަދު ސޯލިހު ހާމަކުރެއްވީ މިދިޔަ ޖެނުއަރީ މަހު ރ. އަތޮޅު ކައުންސިލްގެ މެމްބަރުންނާ އެކު ބޭއްވެވި ބައްދަލުވުމެއްގަ އެވެ.

ޕްލޭނިން މިނިސްޓްރީން މިއަދު ބުނީ ރ. އުފުލަންދޫ ފަޅުރަށް ރ. މަޑުއްވަރީ ކައުންސިލާ ހަވާލުކުރަން ރައީސް ނިންމެވުމާ ގުޅިގެން، މަޑުއްވަރީ ކައުންސިލާ އެކު އެއްބަސްވުމެއްގައި ސޮއިކޮށް، އެރަށް ބެލެެހެއްޓުން އެ ކައުންސިލާ މިއަދު ހަވާލުކޮށްފައިވާ ކަމަށެވެ.

އުފުލަންދޫ ފަޅުކުރީ ހުކުރު ހަމަނުވާ ކަމަށް ކުރިން ބަލާ (ބޮޑެތި ފިރިހެނުންގެ 40 މީހުން ހަމަނުވާ) ރަށްރަށުގެ މީހުން އެހެން ރަށްރަށަށް ބަދަލުކުރަން 1960ގެ އަހަރު ތަކުގައި ނިންމި ނިންމުމެއްގެ ދަށުންނެވެ. އެރަށު މީހުން ބަދަލުކުރީ އަލިފުށްޓަށެވެ.