ފޮޓޯނެގުމަށް ޝައުގުވެރިވާ ފަރާތްތަަކަށް އަމާޒުކޮށްގެން ސިމްޑީން ފޮޓޯ ނެގުމުގެ ހުނަރު ދަސްކޮށްދޭ ވޯކްޝޮޕެއް ބާއްވަން އިއުލާނުކޮށްފި އެވެ.

ސިމްޑީން ބުނީ މި ކުރު ވޯކްޝޮޕްގެ އަމާޒަކީ ކެނޮން ކެމެރާތައް ބޭނުންކޮށްގެން ފޮޓޯ ނެގުމުގެ ހުނަރު އުގަންނައިދިނުން ކަމަށެވެ. އަދި ފޮޓޯގްރަޕީގެ ދާއިރާއަށް އަލަށް ތައާރަފުވާ މީހަކަށް ވިޔަސް، ނުވަތަ ފޮޓޯގްރަފީގެ ހުނަރުތައް އިތުރު ހަރުފަތަކަށް ގެންދަން ބޭނުންވާ މީހުންނަށްވެސް މި ވޯކްޝޮޕްގައި ބައިވެރިވެވޭނެ ކަމަށް ބުންޏެވެ.

މި ވޯކްޝޮޕްގައި ޖުމްލަ ފަސް މޮޑިއުލް އެއް ކިޔަވަދޭނެ އެވެ. އޭގެ ތެރޭގައި އެންމެ ބޭސިކުން ފެށިގެން، ކްރިއޭޓިވް ކޮންޓްރޯލްސް، ސްޓޫޑިއޯ ލައިޓިން، އަދި ފޮޓޯ އެޑިޓުކުރުމަށް ލައިޓް ރޫމް އާއި ފޮޓޯޝޮޕް ބޭނުންކުރާނެ ގޮތް ދަސްކޮށްދިނުން ހިމެނެ އެވެ.

ބައިވެރިން ބޭނުންނަމަ ފަސް މޮޑިއުލްވެސް ކިޔެވޭނެ އެވެ. އަދި ވަކި ވަކި މޮޑިއުލްތައް ހިޔާރުވެސް ކުރެވޭނެ އެވެ. ފަސް މޮޑިއުލް އެއްކޮށް ހިޔާރުކުރާ މީހުންނަށް ކޯސްފީން 10 ޕަސެންޓާ ހަމަޔަށް ޑިސްކައުންޓް ލިބޭނެ އެވެ.

ސިމްޑީން ބުނީ މި ވޯކްޝޮޕްގައި ކިޔަވައިދޭނީ ކެނޮން ސެޓިފައިޑް އެކްސްޕާޓް އިންސްޓްރަކްޓަރެއް ކަމަށްވާ ޔާސީން ހަމީދު ކަމަށެވެ. އަދި ކްލާސްތައް ކުރިއަށްދާނީ ކޮންމެ ހަފްތާއަކު ހޮނިހިރު، ހޯމަ އަދި ބުދަ ދުވަހު ކަމަށާއި ކްލާސްތައް ބާއްވާނީ އެ ދުވަސްތަކުގެ ހެދުނު 10:00 އިން 11:00 އަށް އަދި ހަވީރު 3:00 އިން 4:00 ކަމަށެވެ.

މި ވޯކްޝޮޕް ފެށުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ ފުރަތަމަ ހަފްތާގަ އެވެ. ސިމްޑީން ބުނީ އެ މުއްދަތާ ހަމަޔަށް އެޕްލިކޭޝަން ބަލައިގަންނާނެ ކަމަށެވެ. ވޯކްޝޮޕްގައި ބައިވެރިވުމަށް ހުށަހަޅަންޖެހޭނީ އޮންލައިންކޮށެވެ.

ސިމްޑީން ބުނީ މި ވޯކްޝޮޕް ނިންމާ ބައިވެރިންނަށް ސެޓްފިކެޓް ދިނުުގެ އިތުރުން އެކުންފުނިން ކެމެރާ ގަންނަ ނަމަ ހާއްސަ ޑިސްކައުންޓުވެސް ލިބޭނެ ކަމަށެވެ. ސިމްޑީ އަކީ ކެނޮންގެ ރާއްޖޭގެ އޮތޮރައިޒްޑް ޕާޓްނަރެވެ.