ސިޑްނީ، އޮސްޓްރޭލިއާ (އޮގަސްޓް 7) - މިހާރު ކުރިއަށްދާ ފީފާ ވިމެންސް ވޯލްޑް ކަޕް ފުޓްބޯޅަ މުބާރާތުގެ ކުއާޓާ ފައިނަލުން އިންގްލެންޑާއި އޮސްޓްރޭލިއާ އިން ފުރުސަތު ހޯދައިފި އެވެ.

އިންގްލެންޑުން ޕެނަލްޓީ ޖަހައިގެން 4-2 އިން ނައިޖީރިއާ ބަލިކުރިއިރު، މި ފަހަރުގެ މުބާރާތް ބާއްވާ އެއް ގައުމު ކަމަށްވާ އޮސްޓްރޭލިއާ އިން ވަނީ ރަނގަޅު ކުޅުމަކާ އެކު، 2-0 އިން ޑެންމާކުގެ މައްޗަށް ކުރިހޯދައިފަ އެވެ.

ގަދަ 16 ބުރުގައި އިންގްލެންޑުން ކުޅުނު މެޗުގައި އެ ޓީމުން މެޗުގެ ޕްރެޝަރު ވަގުތުތަކުގައި ކުޅެން ޖެހުނީ އެއް ކުޅުންތެރިއަކު މަދުކޮށެވެ. އެއީ މެޗުގެ 87 ވަނަ މިނިޓްގައި އިންގްލެންޑްގެ ލޯރެން ޖޭމްސް އަށް ސީދާ ރަތް ކާޑެއް ދެއްކުމުންނެވެ. ޗެލްސީގެ ރީސް ޖޭމްސްގެ ކޮއްކޮ، ލޯރެން އަށް ރަތް ކާޑު ދެއްކީ ނައިޖީރިއާގެ މިޝޭލޭ އަލޯޒީ ފައި މައްޗަށް ފައިން އެރުމުންނެވެ. ފުރަތަމަ ލޯރެން އަށް ރީނދޫ ކާޑެއް ދެއްކި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީގައި ބަލާފައި ނިންމީ ރަތް ކާޑެއް ދެއްކުމަށެވެ.

ޕެނަލްޓީގައި އިންގްލެންޑުގެ ފުރަތަމަ ޕެނަލްޓީ ފޮނުވާލި ޖޯޖިއާ ސްޓޭންވޭ އަތުން ވަނީ ނާކާމިޔާބުވެފަ އެވެ. އެކަމަކު، ދެން އެ ޓީމުން ޕެނަލްޓީ ޖެހި ބެތަނީ އިންގްލެންޑް، ރޭޗަލް ޑޭލީ، އަލެކްސް ގްރީންވުޑް އަދި ކްލޯއި ކެލީ ވަނީ ޕެނަލްޓީ ކާމިޔާބުކޮށްފަ އެވެ. ނައިޖީރިއާގެ އުގޯޒީ އުޕަރަނޯޗީ އާއި އަލޯޒީ ޖެހި ޕެނަލްޓީ ނާކާމިޔާބުވިއިރު، ރަޝީދަތު އަޖްބާދު އާއި ކްރިސްޓީ އުޗެއިބޭ ޖެހި ޕެނަލްޓީ ވަނީ ކާމިޔާކޮށްފަ އެވެ.

އޮސްޓްރޭލިއާ އިން ޑެންމާކް ބަލިކުރިއިރު، އެ ޓީމުން ގޯލުތައް ޖެހީ ކެއިޓްލިން ފޫޑް އާއި ހޭލީ ރަސޯ އެވެ. އަނިޔާގެ ސަބަބުން މި ފަހަރުގެ ވޯލްޑް ކަޕްގެ ގްރޫޕް ސްޓޭޖު ގެއްލުނު އޮސްޓްރޭލިއާގެ ތަރި ސޭމް ކާ ވަނީ މި މެޗުގައި ބަދަލަކަށް ކުޅެން ނުކުމެފަ އެވެ.

ކުއާޓާ ފައިނަލްގެ މެޗުތަކަށް ބަލާއިރު، ސްޕެއިން ކުޅެން ޖެހޭނީ ނެދަލެންޑްސްއާ އެވެ. ޖަޕާން ބައްދަލުކުރާނީ އެންމެ ފަހުން ދެ ފަހަރުގެ ޗެމްޕިއަން، އެމެރިކާ ކަޓުވާލި ސްވިޑެންއާ އެވެ. އޮސްޓްރޭލިއާ އާއި އިންގްލެންޑް ކުއާޓާގައި ކުޅޭ ޓީމުތައް އެނގޭނީ ގަދަ 16 ބުރުގެ ފަހު މެޗުތަކަށް ފަހު އެވެ. ފަހު މެޗުތަކަކީ ފްރާންސާއި މޮރޮކޯ ކުޅޭ މެޗާއި ކޮލަމްބިއާ އާއި ޖެމެއިކާ ބައްދަލުކުރާ މެޗެވެ.