އިދިކޮޅު ފަރާތްތަކުން "ނުވާނެޔޭ" ބުނި އެތައް ކަމެއް މި ސަރުކާރުން ކޮށް ނިންމައި، އެ ވައުދުތައް ފުއްދާފައިވާކަމަށް ރައީސުލްޖުމުހޫރުއްޔާ އިބްރާހީމް މުހައްމަދު ސޯލިހު ވިދާޅުވެއްޖެ އެވެ.

ސެޕްޓެމްބަރު 9، ގައި އޮންނަ ރިޔާސީ އިންތިހާބުގެ ކެމްޕެއިނަށް ދ. މީދޫއަށް ވަޑައިގަތް ވާހަކަފުޅުދައްކަވަމުން ރައީސް ވިދާޅުވީ، 2018 ވަނަ އަހަރު އެމަނިކުފާނު ވެރިކަމާއި ހަވާލުވެވަޑައިގަތީ ސިޔާސަތުތަކާއި އެކީގައި ކަމަށެވެ. އެ ސިޔާސަތުތަކާމެދު އޭރު ވެސް އިދިކޮޅު ފަރާތްތަކުން "ތިކަމެއް ނުވާނެޔޭ" ބުނަމުން ގެންދިޔަ ނަމަވެސް، އެ ސިޔާސަތުތަކާއި ވައުދުތައް ފުއްދާފައިވާކަން ރައީސް ސޯލިހު ފާހަގަކުރެއްވި އެވެ.

"އަޅުގަނޑުމެން [2018 ވަނަ އަހަރު] ދެއްކިން މިނިމަމް ވޭޖް ކަނޑައަޅާނެ ވާހަކަ. ކީކޭތޯ ބުނީ؟ ތިކަމެއް ނުވާނެޔޭ. ސަރުކާރުގެ މުއައްޒަފުންގެ މުސާރަ ބޮޑުކޮށްދޭނަމޭ އަޅުގަނޑުމެން ބުނިން. ކީކޭތޯ އެމީހުން ބުނީ؟ ތިކަމެއް ވެސް ނުވާނެޔޭ،" ރައީސް ސޯލިހު މިސާލުޖައްސަވަމުން ވިދާޅުވި އެވެ.

ހުރިހާ ރަށެއްގައި ފެނާއި ނަރުދަމާ އަޅައިދިނުމުގެ އިތުރުން ދަތުރުފަތުރު އަވަސް ސްޕީޑުގައި ކޮށްދިނުން އަދި ކޮވިޑުގެ އާލަމީ ވަބާއިން އަރައިގަނެ ރިސޯޓުތައް އަލުން ހުޅުވުމަކީ ވެސް ނުވާނެ ކަންކަން ކަމުގައި އިދިކޮޅުން ވިދާޅުވިކަން ރައީސް ފާހަގަކުރެއްވި އެވެ.

"އެހެންނަމަވެސް އިރާދަކުރެއްވިއްޔާ ކޮވިޑު ވެސް ކޮންޓްރޯލް ކުރެވިއްޖެ. ބޯޑަރު ވެސް ހުޅުވިއްޖެ. ރިސޯޓުތައް ވެސް ހުޅުވިއްޖެ. މީހުން ވެސް އަންނަން ފަށައިފި. އިގްތިސާދު ވެސް ކުރިއަރަން ފަށައިފި،" ރައީސް ވިދާޅުވި އެވެ.

ރައީސް އިތުރަށް ވިދާޅުވީ ރިޔާސީ އިންތިހާބަށް ވަގުތު ކުޑަތަން ވެފައި ވާއިރު ރާއްޖޭގެ ސިޔާސީ މަޝްރަހު ބަދަލުވަމުންދާގޮތާއި މެދު ކަންބޮޑުވާކަމަށެވެ. އެގޮތުން ޕީޕީއެމްއަށް އެންމެ ފަހުވަގުތާއިޖެހެންދެން ކެނޑިޑޭޓެއް ނުނެރެވުމަކީ އެ ޕާޓީގެ މެމްބަރުންނަށާއި ގައުމަށް ވެސް ލިބުނު ބޮޑު ދެރައެއް ކަމުގައި ވެސް ވިދާޅުވިއެވެ.

"ރާއްޖޭގަ އޮތް އެންމެ ބޮޑު އެއް ސިޔާސީ ޕާޓީ، އަޅުގަނޑުމެންގެ ވާދަވެރި ސިޔާސީ ޕާޓީއަށް އެންމެ ފަހު ވަގުތާއި ޖެހޭއިރު ވެސް ކެންޑިޑޭޓަކު ކަނޑަނޭޅި އޮތުމަކީ އެ ޕާޓީގެ މެމްބަރުންނަށް ލިބިގެންދާ ދެރައެއް. މުޅި ގައުމަށް ވެސް ލިބިގެންދާ ދެރައެއް،"ރައީސް ފާހަގަކުރެއްވި އެވެ.

މީގެ އިތުރުން އިދިކޮޅު ފެނިގެންދަނީ ވަކި މީހެއްގެ މަސްލަހަތު ހިމާޔަތްކުރާން އުޅޭ ޕާޓީއެއްގެ ގޮތުގައި ކަމަށް ވެސް ރައީސް ވިދާޅުވި އެވެ. އަދި އެމްޑީޕީއިން ވެސް އެފަދަ ދުވަސްތަކެއް ތަޖުރިބާ ކުރިކަން ފާހަގަކުރެއްވި އެވެ.

"މިއަދު މަސައްކަތް ކުރަމުން އެގެންދަވަނީ އިންތިހާބު ބޯއިކޮޓް ކުރަން. ވަކި މީހެއްގެ މަސްލަހަތު ހިމާޔަތްކޮށް، ވަކި މީހެއްގެ ފަހަތުން އެނބުރޭ ސިޔާސީ ޕާޓީއެއް ގޮތުގަ ފެނިގެން މިދަނީ،" ރައީސް ވިދާޅުވި އެވެ.

އަދި ރައީސް ވަނީ ވަކި މީހެއްގެ ފަހަތުގައި ނުތިބެ ކެންޑިޑޭޓަކު ނެރެ ކުރިއަށް ދިއުމަށް ޕީޕީއެމްއަށް ގޮވާލާފަ އެވެ.