އެމްޑަބްލިޔުއެސްސީއިން ހއ. މުރައިދޫގައި ގާއިމުކުރި ފެނުގެ ނިޒާމު ރަސްމީކޮށް އިފްތިތާހްކޮށް ހިދުމަތް ދޭން ފަށައިފި އެވެ.

މުރައިދޫގައި އިއްޔެ ބޭއްވި ރަސްމިއްޔާތެއްގައި ފެނުގެ ނިޒާމު އިފްތިތާހު ކޮށްދެއްވީ ރައީސް އިބްރާހިމް މުހައްމަދު ސޯލިހެވެ. މި ރަސްމިއްޔާތުގައި އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު، ދައުލަތުގެ ވަޒީރުންނާއި ފެނަކަ ކޯޕަރޭޝަންގެ އިސްވެރިންނާއި އަދި އެމްޑަބްލިއުއެސްސީގެ މުވައްޒަފުން ބައިވެރިވި އެވެ.

މުރައިދޫގެ ފެނުގެ މަޝްރޫއަކީ ޕްލޭނިން މިނިސްޓްރީން އެމްޑަބްލިޔުއެސްސީއާއި ހަވާލުކޮށްގެން ކުރިޔަށްގެންދިޔަ މަޝްރޫއުއެކެވެ.

މުރައިދޫގެ ފެނުގެ ނިޒާމު ގާއިމުކުރުމަށް 46.85 މިލިއަން ރުފިޔާ ހަރަދުކޮށްފައިވެ އެވެ.

މި މަޝްރޫއުގެ ދަށުން މުރައިދޫގައި ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިން ގާއިމްކޮށް، ފެން ހޮޅީގެ މައިނެޓްވޯރކް އަޅައި އަދި ގޭގެޔަށް ފެނުގެ ކަނެކްޝަން ވަނީ ގުޅައިދީފަ އެވެ.

މީގެ އިތުރުން، ފެން އުފެއްދުމަށްޓަކައި ފެން ޕްލާންޓް ބަހައްޓައި ބޯހޯލް ތޮރުފައި އަދި ރިޖެކްޓް ލައިންވެސް ވަނީ އަޅާފައިވާކަމަށް އެމްޑަބްލިއުއެސްސީން ބުނެ އެވެ. އަދި ފެން ރައްކާކުރުމަށްޓަކައި ފެންތާނގީ ވެސް ވަނީ ބަހައްޓާފަ އެވެ.

މި މަޝްރޫއުގެ ދަށުން ފެން ތަހުލީލު ކުރުމަށް ބޭނުންވާ ސަމާނު ވެސް ވަނީ ފޯރުކޮށްދީފަ އެވެ.