ސްވިޑަންގައި ގުރުއާން އަަންދާ މައްސަލައާ ގުޅިގެން އިރާގުގައި ހުންނަ އެ ގައުމުގެ އެމްބަސީގައި ހުޅުޖަހައި ސަފީރު ފޮނުވާލައިފި އެވެ.

އިރާގު ސަރުކާރުން ނެރުނު ބަޔާނެއްގައި ބުނީ ސްވިޑަންގެ ސަފީރު ފޮނުވާލުމުގެ އިތުރުން ސްވިޑަންގައި ހުންނަ އިރާގުގެ ޗާޖް ޑި އެފެއާޒް ވެސް އަނބުރާ ގެންނާނެ ކަމަށެވެ.

އޭގެ އިތުރުން ސްވިޑަންގެ އެރިކްސަން ކުންފުނިން އިރާގުގައި މަސައްކަތް ހިންގުމަށް ދިން ވޯކް ޕާމިޓް ބާތިލްކޮށްފައިވާ ކަމަށް އިރާގުގެ ދައުލަތުގެ ނޫހުން ބުންޏެވެ.

ސްވިޑަންގެ ސްޓޮކްހޯމްގައި ހުންނަ އިރާގު އެމްބަސީގެ ކުރިމަތީގައި ގުރުއާން އެންދުމުގެ ހުއްދަ ދިނީ ސްވިޑަންގެ ފުލުހުންނެވެ.

ބުރާސްފަތި ދުވަހު އެ ހުއްދައިގެ ދަށުން ގުރުއާންގައި ކޮޅުފައިން ޖަހައި، ގެއްލުން ދޭން މަސައްކަތް ކުރި އެވެ. އެކަމަކު އެ ތަނުގައި ގަޑިއެއްހާ އިރު ތިބުމަށް ފަހު އެނބުރި ދިޔައިރު ގުރުއާން އަންދާފައެއް ނުވެ އެވެ.

ސްވިޑަންގެ ފޮރިން މިނިސްޓަރު ޓޯބިއަސް ބިލްސްޓްރޮމް ވިދާޅުވީ އިރާގު އެމްބަސީގައި އުޅޭ މުވައްޒަފުން ތިބީ ރައްކާތެރިކަމާ އެކު ކަމަށެވެ. އެކަމަކު އިރާގުގެ އިދާރާތަކުން މަސްއޫލިއްޔަތު އަދާކޮށްފައި ނުވާ ކަމަށް ބުންޏެވެ.

ސްވިޑަންގެ އެމްބަަސީއަށް ގެއްލުންދީ ހުޅުޖެހުން، އެ ގައުމުގެ ސަރުކާރުން ކުށްވެރި ކުރި އެވެ. އެކަމަކު ގުރުއާން އެންދުން ފަދަ ކަންކަން ތަކުރާރު ކުރާ ނަމަ ގުޅުން ކަނޑާލާނެ ކަމުގެ އިންޒާރު ދިނެވެ.