ރ. ފުއްގިރި ކުއްޔަށް ދޫކުރުމުގައި ހިޔާނާތްތެރިވި ކަމަށް ބުނާ މައްސަލައިގައި، ސަން ކުންފުނިތަކުގެ ވެރިޔާ އަދި އެމްޑީއޭގެ ރައީސް އަހުމަދު ސިޔާމް މުހައްމަދާއި އެމްޑީއޭގެ ނައިބު ރައީސް އަލީ މައުރޫފް ހެކިބަސް ދޭން ބޭނުން ނުވާ ކަމަށް ސިޓީއެއް ފޮނުވުމުން، އެ މީހުންގެ ހެކިބަސް ނުނަގަން ނިންމައިފި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގި އެމްއެމްޕީއާރުސީ ބޮޑު ހިޔާނާތުގައި ހިމެނޭ އެ މުއާމަލާތުގެ މައްސަލާގައި އެމަނިކުފާނާއި ކްރިކް ރިޒާގެ އިތުރަށް ސަން ކޮންސްޓްރަކްޝަން އެންޑް އިންޖިނިއަރިން، އަދި ސަން އިންވެސްޓްމަންޓްގެ މައްޗަށް ދައުވާ ކޮށްފައިވެ އެވެ.

ޔާމީންގެ މައްޗަށް އުފުލީ މަނީ ލޯންޑަރިންގެ ދައުވާ އަދި ރިޝްވަތު ގަބޫލު ކުރުމުގެ ދައުވާ އެވެ. ރިޒާގެ މައްޗަށް ކުރަނީ މަނީ ލޯންޑަރިންގެ ދައުވާ އަދި ރިޝްވަތު ހިފުމުގައި މެދުވެރިއަކަށް ވުމުގެ ދައުވާ އެވެ. ސަންގެ ދެ ކުންފުނީގެ މައްޗަށް މަނީ ލޯންޑަރިންގެ ދައުވާ އުފުލާފައިވެ އެވެ.

ކްރިކް ފިޔަވައި އެހެން މީހުންގެ ދައުވާތަކުގެ ޝަރީއަތް މިހާރު ކުރިއަށްދާއިރު، ފުއްގިރި ހިޔާނާތުގެ މައްސަލާގައި ދައުލަތުގެ ފަރާތުން ހެކިބަސް ދޭނެ މީހުންގެ ލިސްޓުގައި ސިޔާމާއި މައުރޫފްގެ ނަން އޮތެވެ.

ނަމަވެސް, ދެ މީހުން ވަނީ ހެކިބަސް ދޭން ބޭނުން ނުވާ ކަމަށް ބުނެ ކްރިމިނަލް ކޯޓަށް ސިޓީއެއް ފޮނުވައިފަ އެވެ. މިއަދު ބޭއްވި ޝަރީއަތުގެ އަޑުއެހުމުގައި މައްސަލަ ބައްލަވާ ގާޒީ އަލީ ނަދީމް ވަނީ އެ މީހުންގެ ހެކިބަސް ނަގަން ބޭނުންވޭތޯ ދައުލަތާ ސުވާލުކޮށްފަ އެވެ. ދައުލަތުގެ ވަކީލުން ބުނީ އެ މީހުންގެ ހެކިބަސް ނުނަގަން ދައުލަތުން މިހާރު ނިންމާފައިވާ ކަމަށެވެ.

ސިޔާމާއި މައުރޫފްގެ އިތުރުން މުހައްމަދު ޝާކިރާއި އަދީބުގެ ޑްރައިވަރަކަށް އުޅުނު މުހައްމަދު ހުސައިން ވެސް ވަނީ ހެކިބަސް ދޭން ބޭނުން ނުވާ ކަމަށް ބުނެ ކޯޓަށް ސިޓީއެއް ފޮނުވައިފަ އެވެ. އެހެންވެ އެ ދެ މީހުންގެ ހެކިބަސް ވެސް ނަގަން ބޭނުން ނުވާ ކަމަށް ދައުލަތުން މިއަދު ބުންޏެވެ.

އެހެންކަމުން ދެން ބާކީ އޮތީ ދައުލަތުން ހުށަހަޅާފައިވާ ދެ ހެއްކެއްގެ ހެކިބަހެވެ. އެ ދެ މީހުންގެ ހެކިބަސް ނެގުން އަންނަ ބުރާސްފަތި ދުވަހަށް ތާވަލު ކުރައްވާނެ ކަމަށް ގާޒީ ނަދީމް ވިދާޅުވި އެވެ.

މިއަދު ކުރިއަށް ދިޔައީ އަދީބު ނައިބު ރައީސް ކަމުގައި ހުންނެވި އޭނާގެ ބޮޑީގާޑެއްގެ ގޮތުގައި މަސައްކަތްކުރި އަހުމަދު އާމިރުގެ ހެކިބަސް ނެގުމެވެ. އޭނާ ބުނި ގޮތުގައި، ފުއްގިރި މުއާމަލާތުގެ ތެރެއިން އެމްއެމްޕީއާރުސީގައި ކުރި ބައްދަލުވުމެއް އޭނާ ދެކިފައިވެ އެވެ.

އެއީ އަދީބާއި، ޒިޔަތާއި މައުރޫފާއި، ސިޔާމްގެ ކޮއްކޮ ސާލިމާއި، ކްރިކް ރިޒާާގެ އިތުރުން އެމްއެމްޕީއާރުސީގައި މަސައްކަތް ކުރާ އިތުރު މީހަކު ބައިވެރިވި ކަމަށް އަދީބު ވެސް ބުނެފައިވާ ބައްދަލުވުމެކެވެ. އަދީބު ބުނި ގޮތުގައި ރަށުގެ އަގު 2.5 މިލިއަން ޑޮލަރުން 1.55 މިލިއަން ޑޮލަރަށް ތިރިކުރަން އެއްބަސްވީ އެ ބައްދަލުވުމުގެ ތެރެއިންނެވެ.

އާމިރު މިއަދު ހެކިބަސް ދެމުން ބުނި ގޮތުގައި އޭނާއަށް އެ ބައްދަލުވުން ފެނުނު ގޮތަކީ، އަދީބު ކާރުކޮޅުގައި ދަބަހެއް ބޭއްވިފައި އޮތުމުން އެ ދަބަހެއް ނަގައިގެން ގެނެސްދޭން އޭނާ އެދުމުން، ދަބަސް ދޭން ވެގެން ބައްދަލުވުން އޮތް މީޓިން ރޫމަށް ވަންނަން ޖެހުމުންނެވެ.

ކޯޓްގައި މި މައްސަލަ ހިނގަމުންދާއިރު، ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.

ވ. އާރަށް ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލާގައި އެމަނިކުފާނަށް އިއްވި ޖަލު ހުކުމް ހައި ކޯޓުގައި އިސްތިއުނާފުކޮށްފައިވެ އެވެ. ނަމަވެސް ހައި ކޯޓުގައި މައްސަލަ ބައްލަވާ ފަނޑިޔާރަކު ޗުއްޓީގައި ހުންނެވުމުން މި ވަގުތަށް އިސްތިއުނާފު މައްސަލަ ވަނީ ހުއްޓުމަކަށް އައިސްފަ އެވެ.

ޖަލު ހުކުމް ދެމިއޮތްހާ ހިނދަކު، ޕީޕީއެމްގެ ރިޔާސީ ކެންޑިޑޭޓުކަން އަރުވާފައިވާ ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތެއް ނުލިބޭނެ އެވެ.

ފުއްގިރި މައްސަލައިގެ ފަސްފަހަތް

ދައުލަތުން ތުހުމަތުކުރާ ގޮތުގައި ނުފޫޒު ބޭނުންކުރައްވައިގެން ޔާމީން، މއ. ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަތުގެ ގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން އެ ފައިސާ ލޯންޑާކުރުމަށްޓަކައި ބޭނުން ކޮށްފައިވެ އެވެ.

އެމްއެމްޕީއާރްސީގެ ތެރެއިން ފުއްގިރި ކުއްޔަށް ދޫކުރީ ބިޑަކާ ނުލާ ދުބާއީ ކުންފުންޏެއް ކަމަށްވާ ކްލެސިކް ސިޓީ އައިލެންޑް ހޯލްޑިންގްސްއާ އެވެ. އެ ކުންފުންޏަށް ފުއްދިރި ދިނީ 1.55 މިލިއަން ޑޮލަރަށެވެ. ފުއްގިރި ކުއްޔަށް ދިނުމުގައި ރިޝްވަތުގެ ކަންތައްގަނޑެއް ހިންގާފައިވާއިރު, ޕެންޑޯރާ ޕޭޕާސްގައި ހާމަވި ގޮތުގައި އޭގެ ފަހަތުގައި ތިބީ އިންޑިއާގެ ނުޒޫފުގަދަ ވިޔަފާރިވެރިންތަކެވެ.

ރިޒާގެ ނަމުގައި ބޭންކު އޮފް ސިލޯނުގައި ހުޅުވާފައިވާ އެކައުންޓަކުން ސަން ކޮންސްޓްރަކްޝަނަށް 1.1 މިލިއަން ޑޮލަރު ދޫކޮށްފައިވަނީ މެއި 29، 2016 ގަ އެވެ. "އިންހައުސް ޓްރާންސްފާ" އެއް ގޮތަށް ސަން އިންވެސްޓްމަންޓުން ބޭންކް އޮފް އިންޑިއާގައި ހުޅުވާފައިވާ އެކައުންޓަކަށް ޖަމާކުރީ ޖޫން 7، 2016 ގަ އެވެ.

އަދި ހަމަ އެ ތާރީހުގައި އެ ފައިސާއަށް އަށްސަތޭކަ ޑޮލަރު އިތުރުކޮށްފައި އިސްލާމިކް ބޭންކުގައި ޔާމީންގެ ނަމުގައި ހުޅުވާފައިވާ އެކައުންޓަށް ޖަމާކޮށްފައިވެ އެވެ.

ޔާމީނާއި ކްރިކް ރިޒާ އަދި ސަންގެ ކުންފުނިތަކުން ބުނާ ގޮތުން ރ. ފުއްގިރި ކުއްޔަށް ދިނުމަށް ހިނގާފައިވާ މުއާމަލާތާއި ޔާމީނާއި ސަންގެ ކުންފުނިތަކާ މެދު ހިނގާފައިވާ މުއާމަލަތަކީ މުޅިން އެހެން މުއާމަލާތެއް ކަމަށެވެ. އެއީ ސަންގެ ކުންފުންޏަކާ ދެމެދު ހިނގި ޑޮލަރު މާރު ކުރުމުގެ މުއާމަލާތެއް ކަމަށް އެ ފަރާތްތަކުން ބުނެ އެވެ. އެ ކަން ސާބިތު ކުރަން ދިފާއީ ހެކިތަކެއް ވެސް ހުށަހަޅާފައިވެ އެވެ.