ދިހަ އަހަރު ވަންދެން ވާދަކުރި ކޮންމެ މުބާރާތެއްގެ ތަށި ހޯދުމަކީ ފަސޭހަކަމަށް ނުވާނެ އެވެ. އަނެއްކޮޅުން 10 އަހަރު މެދުކެނޑުމެއް ނެތި ޗެމްޕިއަންގެ ތަހުތުގައި ހުރި އެތުލީޓަކު ފަހަތަށް ޖައްސާލުމަކީވެސް އުނދަގޫ ޗެލެންޖަކަށްވާނެ އެވެ. ނަމަވެސް މިދިޔަ މަހުގެ ފަހުކޮޅު ނިމުނު ބުރުނު ޝިކާރު ބޮޑީބޯޑިން ޗެލެންޖުގެ ޗެމްޕިއަންކަން ހޯދައި މި ޗެލެންޖު އަޝްރަފް ހަސަން ވަނީ ފުރިހަމަކޮށްފަ އެވެ.
ދިވެހިރާއްޖޭގެ ބޮޑީބޯޑިން "ރަސްގެފާނު" އަލީ ހުޝްރުވާން އަހުމަދު (ކުޑަ އައްޔަ)ގެ ކާމިޔާބީތަކަށް ހުއްޓުން ގެނައި ހަމައެކަނި އެތުލީޓުގެ ޝަރަފް ފުވައްމުލަކުގެ އަޝްރަފް ހޯދީ ވާދަވެރި އަދި ފޯރިގަދަ ފައިނަލަކަށްފަހުގަ އެވެ.
ފައިނަލްގެ ވާހަކަދެއްކުމުގެ ކުރިން މީގެ ހަތަރުވަރަކަށް އަހަރު ކުރިއަށް ޖެހިލާނަމެވެ. ޒުވާން އާ ބޮޑީބޯޑަރުން ތަރައްގީކުރުމަށް "ރާއްޖެ ބޮޑީބޯޑިން"ގެ ނަމުގައި ރާއްޖޭގެ ތިން ސަރަހައްދެއްގައި ޕްރޮގްރާމްތައް އޭރު އެމްބީބީއޭ އިން ހިންގި އެވެ. އެ ޕްރޮގްރާމްގެ ތެރެއިން ފުވައްމުލަކުގައި މި ކުޅިވަރަށް ޝައުގުހުރި ކުދިން ފާހަގަކޮށް އެކުދިންނަށް ތަމްރީން ދެވުނެވެ. އެ ތަމްރީން ޕްރޮގްރާމްގައި އެދުރެއްގެ ގޮތުން އެންމެ އިސްކޮށް ހުރީ ކުޑަ އައްޔަ އެވެ. އޭރު ފުވައްމުލަކުގައި ތަމްރީން ކުރި ބޮޑީބޯޑަރުންގެ ތެރޭގައި ބުރުނުޝިކާރު ޗެލެންޖު ކާމިޔާބުކުރި އަޝްރަފްވެސް ހިމެނެ އެވެ.
"އަޝްރަފްގެ ކާމިޔާބީ އެންމެ ހާއްސަވާ އެއް ސަބަބަކީ، އޭނާ އައިސް އެ ބަލިކުރީ އޭނާއަށް މިކަން ދަށްކޮށްދިން އެދުރު" ބުރުނު ޝިކާރު ޗެލެންޖުގެ ފައިނަލަށްފަހު ރާއްޖޭގެ ބޮޑީބޯޑިން އެސޯސިއޭޝަންގެ ޖެނެރަލް ސެކެޓްރީ ހަސަން ރަޝީދު (ރަޝް) ބުންޏެވެ.
ހަގީގަތުގަވެސް އަޝްރަފް މި ހޯދީ އާދައިގެ ކާމިޔާބެއް ނޫނެވެ. އޭނާގެ ނަން އެންމެ ބޮޑަށް ފާހަގަވީ ބުރުނު ޝިކާރު ޗެލެންޖު ކާމިޔާބުކުރުމާއެކު އެކަންޏެއް ނޫނެވެ. މިދިޔަ އަހަރުގެ ގައުމީ މުބާރާތުގައިވެސް އަޝްރަފް ވަނީ ތަފާތު މޮޅު ހުނަރެއް ދައްކާފަ އެވެ. އެ މުބާރާތުގެ ހަތަރު ވަނަ ބުރުގެ ހީޓެއްގައި އަޝްރަފް ވަނީ ކުޑަ އައްޔަ ބަލިކޮށްފަ އެވެ. އެ ފަހަރުގެ ތަފާތަކީ 0.43 ސްކޯއެކެވެ. ނަމަވެސް އެ މުބާރޔުގެ ސެމީ ފައިނަލުގައި އަނެއްކާވެސް ކުޑަ އައްޔައާ ވާދަކޮށް އަޝްރަފް ވަނީ ބަލިވެފަ އެވެ.
ބުރުނު ޝިކާރު ޗެލެންޖުގެ ފައިނަލް ހީޓުގައި އަޝްރަފް ރާޅާ އަޅަނީ - ފޮޓޮ: މުހައްމަދު ޝާބިން/އަދަދު
އެ މުބާރާތުގައި އަޝްރަފް ހުރި ރަނގަޅު ފޯމެއްގަ އެވެ. ނަމަވެސް ސެމީގައި ކުޑަ އައްޔަ އަތުން ބަލިވެ ލިބުނު މާޔޫސްކަމާއިއެކު އޭނާ ރަށަށް އެނބުރިގޮސް އިތުރަށް ޕްރެކްޓިސް ކުރި އެވެ. މިފަހަރުގެ ބުރުނު ޝިކާރު ޗެލެންޖަށް އޭނާ އައީ މުބާރާތުގެ ތަށި ނޫން އެހެން އެއްޗަކުން ފުއްދާނުލަން އަޒުމް ކަނޑައަޅައިގެންނެވެ.
ފައިނަލާ ހަމައަށް އަޝްރަފް ދިޔައީ ރަނގަޅު ފޯމެއްގައި ހުރެ އެވެ. ސެމީ ފައިނަލުގައިވެސް ވާދަވެރި ހީޓަކަށްފަހު އޭނާ ފައިނަލުން ޖާގަ ހޯދި އެވެ. ފައިނަލް ހީޓުގެ ފެށި ގޮތަށް އަޝްރަފް ރަނގަޅު ލީޑެއް ނެގި އެވެ. ހަތަރު ބޮޑީބޯޑަރުން ވާދަކުރި ހީޓަކަށްވުމާއިއެކު އަޅަން ލިބޭނީ މަދު ރާޅުތަކެއްގައިކަން އެނގި އޭނާ ހުރީ ރަނގަޅު ރާޅަށް ތައްޔާރުވެގެންނެވެ. ހީޓުގެ ފަހުކޮޅަށް ދިޔައިރުވެސް ރަނގަޅު ލީޑެއް އޮތެވެ. ފަހު މިނެޓުގައި ކުޑަ އައްޔަ ރަނގަޅު ރާޅެއް ދުއްވާލި އެވެ. ނަމަވެސް އޭރު އައްޔައަށް އަޝްރަފް ބަލިކުރަން 8.67ގެ ސްކޯއެއް ބޭނުންވެ އެވެ. ވަގުތު ހަމަވިއިރު ކުޑަ އައްޔަ ދުއްވާލި ރާޅުގެ ސްކޯ ނުލިބެ އެވެ. ބޯޑަރުން އެއްގަމަށް އަރައި އިންތިޒާރުގައި ތިބީ އެ ނަތީޖާއަށެވެ.
"އަލީ ހުޝްރުވާން އަހުމަދުގެ ފަހު ރާޅަށް ލިބުނީ 8.00ގެ ސްކޯއެއް. މި ނަތީޖާއިން 0.66ގެ ފަރަގަކާއިއެކު ޗެމްޕިއަންކަން ހޯދީ އަޝްރަފް ހަސަން" އެމްސީ ނިޒާމް މިހެން އިއުލާންކޮށްލުމާއިއެކު އަޝްރަފް ދޫކޮށްލީ ހަމަޖެހުމުގެ ނޭވާއެކެވެ. އުފާވެރިކަމުގެ ނޭވާއެކެވެ. އޭނާގެ ހުވަފެން ހަގީގަތަކަށްވީ އެވެ.
އެ ވަގުތު އަޝްރަފް އަށް އެންމެ ފުރަތަމަ މަރުހަބާ ކީ މީހުންގެ ތެރޭގައި ކުޑަ އައްޔަ ހިމެނެ އެވެ. ޗެމްޕިއަންކަން ހޯދުމަށްފަހު އަޝްރަފް ޝުކުރު އަދާކުރި މީހުންގެ ލިސްޓުގެ ކުރީގައިވެސް އޮތީ އޭނާގެ މުދައްރިސް ކުޑަ އައްޔަގެ ނަމެވެ.
ބުރުނު ޝިކާރު ޗެލެންޖުގެ ފައިނަލަށްފަހު ކުޑަ އައްޔަ ޗެމްޕިއަންކަން ހޯދީ އަޝްރަފް އަށް މަރުހަބާ ކިޔަނީ - ފޮޓޮ: މުހައްމަދު ޝާބިން/އަދަދު
"އައްޔަ އަށް ވެސް ވަރަށް ބޮޑަށް، ވަރަށް ބޮޑަށް ޝުކުރު އަދާކުރަން ބޭނުން. އައްޔަ މިކަން އަސްލު ކޮށްދިނީ. އައްޔަގެ ދަރިވަރެއް އަޅުގަނޑަކީ، އަދިވެސް ހުންނާނީ ހަމަ އައްޔަގެ ދަރިވަރެއްގެ ގޮތުގައި. ފުވައްމުލަކު ސާފިން އެސޯސިއޭޝަނަށް ވެސް ވަރަށް ބޮޑަށް ޝުކުރު އަދާ ކުރަން. އަދި ދެން ވެސް އެހީވި ބޭފުޅުންނަަށް ވެސް ވަރަށް ބޮޑަށް ޝުކުރު އަދާ ކުރަން." ޗެމްޕިއަންކަން ހޯދުމަށްފަހު މީޑިއާއަށް ދިން އިންޓަވިއުގައި އަޝްރަފް ބުންޏެވެ.
ކުޑަ އައްޔަ އަތުން އަޝްރަފް މޮޅުވުމަކީ ހަގީގަތުގައިވެސް ފާހަގަކޮށްލަން ޖެހޭ ކާމިޔާބެކެވެ. އެވަރުގެ ހިތްހެޔޮ އެންމެނާ ގުޅޭ ޗެމްޕިއަނެއް ބަލިކުރެވޭނީ ބުރަ މަސައްކަތަކުންނެވެ. އަޝްރަފް ބުނާ ގޮތުން މިއީ ކުރިއަށް ހުރި މުބާރާތްތަކަށް އޭނާއަށް ލިބުނު ބޮޑު ހިތްވަރެކެވެ.
އަޝްރަފްގެ މި ކާމިޔާބާއިއެކު ރާއްޖޭގެ ޒުވާން އެހެން އެތުލީޓުންނަށްވެސް މި ދެވުނީ ވަރުގަދަ މެސެޖެކެވެ. ހިތްވަރާއިއެކު ވަރުގަދަ އަޒުމެއްގައި މަސައްކަތްކޮށްފި ނަމަ ކާމިޔާބު ހޯދޭނެކަމެވެ. ކުޑަ އައްޔައާ ދެކޮޅަށް ވާދަކުރަން ޖެހުނީމަ "ބިރު" ގަންނަ އެތުލީޓުންނަށް މިހާރު އެ ބިރު ފަހަނައަޅާ ދާން މިއޮތީ ހިތްވަރު ލިބިފަ އެވެ.
