ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ރައީސް އަދި އެ ޕާޓީގެ އެއް ބާނީ، ކުރީގެ ރައީސް މުހައްމަދު ނަޝީދު މިއަދު އެ ޕާޓީން ވަކިވެވަޑައިގެންފި އެވެ.
އެމްޑީޕީން ވަކިވެވަޑައިގެންނެވުމަށްފަހު ނަޝީދު ވަނީ އެމަނިކުފާނު ޕާޓީއަށް ފޮނުއްވި ސިޓީ ސޯޝަލް މީޑިއާ ޕްލެޓްފޯމް ޓުވިޓާގައި އާންމު ކުރައްވައިފަ އެވެ. ސިޓީގައި ނަޝީދު ވިދާޅުވީ އެމްޑީޕީން ވަކިވާން ނިންމީ ރާއްޖޭގައި މިވަގުތު ކަންކަން ހިނގަމުންދާ ގޮތަށް ބަލައި, އެމަނިކުފާނު އެމްޑީޕީގައި ހުންނެވުމަކީ އެންމެ ރަނގަޅު ގޮތް ކަމަށް ފެނިވަޑައިނުގަންނާތީ ކަމަށެވެ.
"ދިވެހި ރައްޔިތުންގެ ޑިމޮކްރެޓިކް ޕާޓީގެ ޗެއާޕާސަނަށް ވެދުން ސަލާމަށްފަހު ދަންނަވަން. ރާއްޖޭގައި މިވަގުތު ކަންކަން ހިނގަމުންދާ ގޮތަށް ބަލައި، އަޅުގަނޑު ތިޔަ ޕާޓީގައި ހުރުމަކީ އެންމެ ރަނގަޅު ގޮތް ކަމަށް ނުދެކޭ ކަމުން އަޅުގަނޑު ތިޔަ ޕާޓީން ވަކިވި ވާހަކަ ދެންނެވިން،" ނަޝީދުގެ އަތުލިޔުމުން ލިޔުއްވައި ފޮނުވި އެ ސިޓީގައި އެމަނިކުފާނު ވިދާޅުވެފައިވެ އެވެ.
ނަޝީދު އެމްޑީޕީން ވަކިވާން އެމަނިކުފާނު ފޮނުއްވި ސިޓީ
ރައްޔިތުންގެ މަޖިލީހުގެ ރައީސްގެ މަގާމުގައި ވެސް ހުންނެވި ނަޝީދު 18 އަހަރަށްފަހު މިއަދު އެމްޑީޕީން ވަކިވެވަޑައިގަތުމުން އެ ޕާޓީގެ ރައީސްގެ މަގާމު ހުސްވީ އެވެ.
ބެލެވޭ ގޮތުގައި ނަޝީދު ދެން ގުޅިވަޑައިގަންނަވާނީ އެމަނިކުފާނުގެ ސަޕޯޓަރުން މިވަގުތު އުފައްދަން މަސައްކަތް ކުރާ ދި ޑިމޮކްރެޓްސްއާ އެވެ. ނަޝީދަށް އިހުލާސްތެރި އެމްޑީޕީގެ ރައްޔިތުންގެ މަޖިލީހުގެ މެމްބަރުން ވަނީ މީގެ ކުރިން މެއި 17، ގައި އެމްޑީޕީން ވަކިވެފަ އެވެ.
2008 ގައި ބޭއްވި ރިޔާސީ އިންތިހާބުގައި އެމްޑީޕީގެ ކެންޑިޑޭޓުގެ ހައިސިއްޔަތުން ނަޝީދު ކެމްޕޭން ކުރައްވަނީ. އެމަނިކުފާނު މި އިންތިހާބު ކާމިޔާބު ކުރެއްވި
ޕާޓީ އުފައްދަން ހަމަކުރަންޖެހޭ 3000 ސޮއި ހޯދުމަށްފަހު ޑިމޮކްރެޓްސްގެ ފަރާތުން ވަނީ ޖޫން 1، ގައި އިލެކްޝަންސް ކޮމިޝަނަށް ހުށަހަޅައިފަ އެވެ. ނަމަވެސް އެ ޕާޓީގެ ފަރާތުން ހުށަހެޅި ފޯމުތައް އަލުން ޗެކް ކުރަން ބައެއް ކޮމިޝަނުގެ މެމްބަރުން ބޭނުންވާތީ މިހާތަނަށް އެ ޕާޓީ ރަޖިސްޓްރީކޮށްދީފައެއްނުވެ އެވެ.
ނަޝީދަކީ އެމްޑީޕީ އުފައްދަން 2003 ވަނަ އަހަރު ސަރުކާރަށް ޕެޓިޝަން ކުރެއްވި ބޭފުޅުންގެ ތެރެއިން އެކަކެވެ. ނަޝީދަކީ އެ އެމްޑީޕީގެ ފުރަތަމަ ރިޔާސީ ކެންޑިޑޭޓް އަދި އެ ޕާޓީގެ ޓިކެޓެއްގައި ރައީސުލްޖުމްހޫރިއްޔާގެ މަގާމަށް ވަޑައިގެންނެވި ފުރަތަމަ ބޭފުޅާ އެވެ.
