ޖޫން 14, ގައި ބޭއްވި ރައްޔިތުންގެ މަޖިލިހުގެ ޖަލްސާ ނިންމަވައިލެއްވުމުގެ ކުރިއަށް ރިޔާސަތުގައި އިންނެވި ވިލުފުށި ދާއިރާގެ މެންބަރު ހަސަން އަފީފަށް ލިބިވަޑައިގަތީ ރައްޓެއްސެއްގެ ކޯލެއް ކަމަށް އޭނާ މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ރިޔާސަތު އަފީފު ބަލަހައްޓަވަނީ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ވެސް ތަޅުމުގައި ވަޑައިގެން ނެތުމުންނެވެ. އެފަދަ ހާލަތްތަކުގައި ރިޔާސަތު ބަލަހައްޓަވަން އަފީފާ ހަވާލުކުރެއްވީ މަޖިލީހުގެ ރައީސް މުހައްމަދު ނަޝީދެވެ.

ނަޝީދު އަދި އީވާގެ އިތުބާރު ނެތް ކަމުގެ މައްސަލަތައް ވެސް ވައްދާފައިވަނިކޮށް މިދިޔަ ހަފުތާގެ ބުދަ ދުވަހު ބޭއްވި ޖަލްސާ ނިންމަވައިލެއްވުމުގެ ކުރިއަށް އަފީފަށް ފޯނު ކޯލެއް ލިބިވަޑައިގަތެވެ. އޭރު ރިޔާސަތުގެ މައިކު ނިއްވާލައްވާފައި ނެތުމުން އަފީފްގެ އަޑު ލައިވް ފީޑަށް ވަނީ އަރައިފަ އެވެ.

ފޯނަށް ޖަވާބު ދެއްވައި އަފީފް ވިދާޅުވީ "އާދެ، މި ނިންމާލަނީ، މި ނިންމާލަނީ, ނިންމާލަނީ،" ކަމަށެވެ. އެއަށް ފަހު މަޖިލީހުގެ ނިޒާމު ގެއްލިފައިވާ ކަމަށް ވިދާޅުވެ އަފީފް ޖަލްސާ ނިންމާލެއްވި އެވެ.

މިއަދު ކުރިއަށްދާ މަޖިލިހުގެ ޖަލްސާގައި އިންތިހާބުތަކުގެ ގާނޫނަށް ގެންނަން ހުށަހަޅާފައިވާ ބިލު މަޖިލިހުގެ މުޅި ކޮމިޓީން ނިންމި ގޮތުގެ ރިޕޯޓަށް ބަހުސް ކުރެއްވަމުން، އެމްޑީޕީގެ ގިނަ މެންބަރުން ގެންދެވީ ރިޔާސަތުގައި އިންނެވި އަފީފަށް ފާޑުވިދާޅުވަމުންނެވެ.

އެ ގޮތުން އެންމެ ފަހުން ބޭއްވި މަޖިލިހުގެ ޖަލްސާ ނިންމަވައިލައްވަން ކޮންމެވެސް ބޭފުޅެއްގެ އޯޑަރު އަފީފަށް ލިބިވަޑައިގަތް ކަމަށް ވިދާޅުވެ ބައެއް މެންބަރުން އަޑުގަދަ ވެސް ކުރެއްވި އެވެ. އެހެންވެ އޭނާއަށް ލިބިވަޑައިގަތީ ކޮން ކޯލެއް ކަން މިއަދު ވިދާޅުވެދެއްވި އެވެ.

"އަޅުގަނޑަށް އެ ދުވަހު ގުޅުއްވީ މަޖިލިހުގެ ރައީސެއް ވެސް ނޫން، އަދި ރައީސުލްޖުމްހޫރިއްޔާއެއް ވެސް ނޫން، ރައްޓެއްސަކު ގުޅުއްވީ، އޭރު އަޅުގަނޑު ޖަލްސާ ނިންމާލަން އުޅެނިކޮށް، ރައްޓެއްސަކު ގުޅުއްވީ، އެހެންވެ އަޅުގަނޑު މި އުޅެނީ ޖަލްސާ ނިންމާލަން ކަމަށް ވެސް ބުނީ،" އަފީފް ތަފްސީލުކޮށްދެއްވި އެވެ.

މަޖިލީހުގައި މެމްބަރުން ވާހަކަ ދައްކަވަނިކޮށް މައިކް އަތުލައި ހަޅޭލަވަމުން ގެންދެވި އިރު ވެސް އެއްވެސް މެމްބަރެއްގެ ނަން މިއަދު އަފީފް އިއްވާފައި ނުވެ އެވެ. އަފީފު އަޅައިނުލައްވާތީ، އެމްޑީޕީގެ ބައެއް މެމްބަރުން ތަކުރާރުކުކޮށް އެކަމާ ކަންބޮޑުވުން ވެސް ފާޅުކުރައްވާފައިވެ އެވެ.

މަޖިލިސް ޖަލްސާތައް އާދައިގެ މަތިން ކުރިއަށް ނުދާތާ ދުވަސްކޮޅެއް ވަނީ ވެފަ އެވެ. ނަޝީދާއި އީވާ ވެސް ރިޔާސަތާއި ހަވާލު ނުވާތީ އިންނަވަނީ އަފީފެވެ. އޭގެ ސަބަބުން, އެމްޑީޕީގެ މެމްބަރުން ތަކުރާރުކޮށް މަޖިލިސް ތެރޭގައި އިހުތިޖާޖު ކުރެ އެވެ.