ކިޔެވް، ޔޫކްރެއިން (ޖޫން 16) - މިހާރު އޮތް ހާލަތު ބަދަލު ނުވަނީސް ރަޝިއާއާ އެކު މަޝްވަރާ ނުކުރެވޭނެ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.

ހުކުރު ދުވަހު ކިޔެވްގައި އެފްރިކާ ގައުމުތަކުގެ ވެރިންގެ ވަފުދަކާ އެކު ބޭއްވި ބައްދަލުވުމުގައި ޒެލެންސްކީ ވިދާޅުވީ މި ވަގުތު މަޝްވަރާ ކުރެވެން ނެތް ކަމަށެވެ.

"އެ ބައްދަލުވުމުގައި ތަކުރާރުކޮށް ވަރަށް ސާފުކޮށް އަޅުގަނޑު ދެންނެވީ ރަޝިއާއިން އަޅުގަނޑުމެންގެ ބިމުގެ ބައެއް ހިފާފައި ވާތީ، ހަނގުރާމަ ހުއްޓާލުމުން ނޫނީ މަޝްވަރާ ނުކުރެވޭނެ ކަމަށް،" ޒެލެންސްކީ ނޫސްވެރިންނަަށް ވިދާޅުވި އެވެ.

ދެކުނު އެފްރިކާގެ ރައީސް ސިރިލް ރަމަފޯސާ އާއި އެފްރިކާގެ ހަތް ގައުމެއްގެ ބައެއް ލީޑަރުން ހިމެނޭ ވަަފުދުން ރަޝިއާގެ ރައީސް ލެޑިމިއަ ޕުޓިންއާ ބައްދަލުކުރާނީ އާދީއްތަ ދުވަހު އެވެ.

ހުކުރު ދުވަހު ޔޫކްރެއިނަށް ވަޑައިގެން ރަމަފޯސާ ގޮވާލެއްވީ ހަމަލާތައް މަޑުޖައްސާލައި ސުލްހަ އިސްކުރުމަށެވެ.

"މި ހަނގުރާމަ ނިންމާލައި، މަޝްވަރާ މެދުވެރިކޮށް ސުލްހަ ގާއިމްކުރަން ޖެހޭ،" ރަމަފޯސާ ނޫސްވެރިންނަށް ވިދާޅުވި އެވެ.

އެފްރިކާ ގައުމުތަކުން ޔޫކްރެއިނާއި ރަޝިއާއަށް ފެށި ދަތުރުގެ މަގުސަދަކީ ހަނގުރާމަ ނިމުމަކަށް ގެނެސް، ސުލްހަ ހޯދޭނެ ގޮތެއް މަގުފަހިކުރުމެވެ.