މިހާރު ކުރިއަށްދާ އެފްއޭއެމް 13 އަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގެ ފައިނަލުގައި އަހުމަދިއްޔާ އިންޓަނޭޝަނަލް ސްކޫލާއި ކަލާފާނު ސްކޫލް ވާދަކުރަން ޖެހިއްޖެ އެވެ.

ޖުމްލަ އެކު، 36 ސްކޫލް ވާދަކުރި މި ފަހަރުގެ އިންޓަ ސްކޫލް 13 އަހަރުން ދަށުގެ މުބާރާތުގެ ދެ ސެމީ ފައިނަލް ކުޅެފައިވަނީ ރޭ ގަލޮޮޅު ދަނޑުގަ އެވެ.

ކަލާފާނު ސްކޫލުން ފައިނަލުގެ ޖާގަ ހޯދީ ސެމީ ފައިނަލުގައި މަޖީދިއްޔާ ސްކޫލް އަތުން ފަސޭހަކަމާ އެކު 5-0 އިން މޮޅުވެގެންނެވެ. މި މެޗުގައި ކަލާފާނު ސްކޫލްގެ ގޯލުތައް ޖެހީ އީހާން އިބްރާހިމް، ހުސެއިން އިލްހާމް އިބްރާހިމް ދެ ގޯލާއި، ޔޫސުފް ރަޔާން ރިޔާޒްގެ އިތުރުން މަޖީދިއްޔާ ސްކޫލްގެ އައިހަމް އަބްދުލް ފައްތާހު އަތުން ބައިކޮޅަށް ވަން ގޯލެކެވެ.

ސެމީ ފައިނަލް އަނެއް މެޗުގައި އަހުމަދިއްޔާ އާއި މާފުށީ ސްކޫލްގެ މެޗުގެ ފުރިހަަމަ ވަގުތު ހަމަވިއިރު، ދެ ޓީމު އޮތީ ލަނޑެއް ނުޖެހި 0-0 އިން އެއްވަރުވެފަ އެވެ. ނަތީޖާ ނެރުމަށް ޕެނަލްޓީ ޖެހިއިރު، އަހުމަދިއްޔާ އިން ފަސް ޕެނަލްޓީ ވެސް ކާމިޔާބުކުރި އެވެ. އެކަމަކު، މާފުށީ ސްކޫލް އަތުން ވަނީ އެއް ޕެނަލްޓީ ނާކާމިޔާބުވެފަ އެވެ.

އަހުމަދިއްޔާ ޓީމުން ޕެނަލްޓީތައް ފޮނުވާލީ ލޫކް އަބްދުﷲ ޖަމީލް، އަހުމަދު އަޝްހަމް އާތިފް، އާޔަން މުހައްމަދު އިބްރާހިމް، އަހުމަދު ރަޒާން ރަމްޒީ އަދި އަހުމަދު އަޒާން އަބްދުލް ރަހީމް އެވެ. މާފުށީ ސްކޫލުން ޕެނަލްޓީތައް ވައްދާލީ މުހައްމަދު ޔަޒްދާން އަހުމަދު، މުހައްމަދު ނައިކް ބިން އައްސަދު، އަހުމަދު ލީވާން، ހުސެއިން ޝަޔާން މުހައްމަދު އެވެ.

ފައިނަލް މެޗު ކުޅެން ނިންމާފައިވަނީ އާދިއްތަ ދުވަހުގެރޭ 20:30 ގަލޮޅު ދަނޑުގަ އެވެ.