ބަގުދާދް، އިރާގް (މޭ 27) - މަގުތަކާއި ރޭލު ދަގަނޑު އަޅައި ޔޫރަޕާއި މެދުއިރުމަތި ގުޅުވާލަދޭ ބިޔަ މަޝްރޫއެއް ރާވައި އިރާގުން އިއުލާންކޮށްފި އެވެ.

"ރޫޓް އޮފް ޑެވެލޮޕްމަންޓް" ގެ ނަން ދީފައިވާ 17 ބިލިއަން ޑޮލަރުގެ މަޝްރޫއުގައި ތުރުކީއާ ގުޅޭ އިރާގުގެ އުތުރު ބޯޑަރުން ފެށިގެން އިރާގުގެ އެންމެ ދެކުނުން ގަލްފްއާ ހަމައަށް 1،200 ކިލޯމީޓަރު ކަވަރު ކުރާނެ އެވެ.

ބޮޑު ވަޒީރު މުހައްމަދު ޝިއާ އަލް ސޫދާނީ އެ މަޝްރޫއު އިއުލާން ކުރެއްވީ އިރާން، އުރުދުން، ކުވެއިތު، އޮމާން، ގަތަރު، ސައުދީ އަރަބިއްޔާ، ސީރިއާ، ތުރުކީ އަދި ޔޫއޭއީގެ މަންދޫބުންނާ އެކު ބޭއްވި ހަފުލާއެއްގަ އެވެ.

"މިއީ ތެލަށް ބަރޯސާ ނުވެ އޮންނަ އިގުތިސާދެއްގެ މައި ތަނބެއްގެ ގޮތުގައި އަޅުގަނޑުމެން ދެކެން،" ސޫދާނީ ވިދާޅުވި އެވެ.

އިރާގުން ބުނީ މަޝްރޫއުގެ މަސައްކަތުގައި ބައިވެރިވާން ބޭނުންވާ ކޮންމެ ގައުމަށް ވެސް އެ ފުރުސަތު އެބަ އޮތް ކަމަށާއި އިތުރު މަޝްވަރާއަށް ފަހު ކަންކަން ފައިނަލް ކުރެވޭނެ ކަމަށެވެ.

އެ ގައުމުން އަންދާޒާ ކުރަނީ ތިން އަހަރާއި ފަސް އަހަރާ ދެމެދުގެ މުއްދަތެއްގައި މަޝްރޫއު ނިންމާލެވޭނެ ކަމަށެވެ.

ތެލުގެ މުއްސަނދިކަން އޮތް ނަމަވެސް، ކޮރަޕްޝަނާއި ހަނގުރާމައިގެ ސަބަބުން އެ ގައުމުގެ އުމްރާނީ ތަރައްގީ އޮތީ ފަހަތަށް ޖެހިފަ އެވެ. ވަކިން ހާއްސަކޮށް އިރާގުގެ މަގުތަކުގެ ގޯސް ހާލަތު ފާހަގަކުރެވެ އެވެ.

ސޫދާނީގެ ސަރުކާރުގެ އެންމެ ބޮޑު އެއް އަމާޒަކީ ހަނގުރާމައިގެ ތެރޭގައި ސުންނާފަތިވެފައިވާ މަގުތައް އަލުން އާރާސްތުކޮށް، ކަރަންޓާ ގުޅޭ ތަރައްގީ ވަރުގަދަ ކުރުމެވެ.