އިއްޔެ ހުޅުމާލޭ ވޮލީ ކޯޓުގައި ފެށި އޮފީސް/ކުންފުނިތަކުގެ ވޮލީބޯޅަ މުބާރާތުގެ ފުރަތަމަ މެޗުތައް ސްޓެލްކޯ އާއި އާބަންކޯ އިން ކާމިޔާބުކޮށްފި އެވެ.

ހަތަރު އަހަރުގެ މެދު ކެނޑުމަކަށް ފަހު މި އަހަރު ފެށި އޮފީސް/ކުންފުނިތަކުގެ ވޮލީބޯޅަ މުބާރާތުގައި ނުވަ ޓީމެއް އަންނަނީ ވާދަކުރަމުންނެވެ. ނުވަ ޓީމް ދެ ގްރޫޕަކަށް ބަހާލާފައިވާއިރު ގްރޫޕް އޭގައި ހިމެނެނީ މޯލްޑިވްސް ޕޮލިސް ސާވިސް، މޯލްޑިވްސް ޕޯޓްސް ލިމިޓެޑް (އެމްޕީއެލް)، އާބަންކޯ، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އަދި ސްޓެލްކޯ އެވެ.

ގްރޫޕް ބީގައި ހިމެނެނީ އެމްއެންޑީއެފް، ފިއުލް ސަޕްލައި މޯލްޑިވްސް (އެފްއެސްއެމް)، ވެމްކޯ އަދި މޯލްޑިވްސް ކަރެކެޝަނަލް ސާވިސް އެވެ.

މުބާރާތުގެ ކުޅުން ފެށީ އިއްޔެ ހަވީރު ސްޓެލްކޯ އާއި އެމްއޭސީއެލް ވާދަކުރި މެޗުންނެވެ. މި މެޗު ސީދާ ތިން ސެޓުން ކާމިޔާބުކުރީ ސްޓެލްކޯ އެވެ. ތިން ސެޓުން މެޗު ނިމުނު ނަމަވެސް ހުރިހާ ސެޓެއްވެސް ފެނުނީ ވާދަވެރިކޮށެވެ.

ބީޗްވޮލީބޯޅަ ދެ ތަރިންކަމަށްވާ މުހައްމަދު އަލީ (ޑެންޒޯ) އާއި އަހުމަދު މުހައްމަދު (ކޯކޭ) އަދި އިންޑިއާގެ ގަގަންދީޕް ސިންގް ކުޅުނު ސްޓެލްކޯ އިން މެޗުގެ ސެޓުތައް ގެންދިޔައީ 33-31، 25-19 އަދި 27-25 އިންނެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ގަގަންދީޕް އެވެ.

ދެ ވަނަ މެޗުގައި ރޭ އެމްޕީއެލް ނިކުތީ މި މުބާރާތަށް ވަރުގަދަ އަށް ތައްޔާރުވި އާބަންކޯއާ ދެކޮޅަށެވެ. ގައުމީ ބީޗް ވޮލީބޯޅަ ޓީމްގެ އިސްމާއިލް ސާޖިދު (ކުޑަކާއްޓޭ) ލީޑު ކުރި އާބަންކޯ އިން މި މެޗު ކާމިޔާބުކުރީ ސީދާ ތިން ސެޓުންނެވެ. މެޗުގެ ސެޓުތައް އެޓީމުން ގެންދިޔައީ 25-20، 25-10 އަދި 25-18 އިންނެވެ.

އާބަންކޯ ޓީމްގައި ގައުމީ ޓީމްގެ ކުރީގެ ސެޓަރު އިޝާން މުހައްމަދު (ބަޓިސް) އާއި ގައުމީ ޓީމްގެ އެއް ވަނަ ބްލޮކަރު، އާދަމް ފައިރޫޒް ހިމެނެ އެވެ.

މުބާރާތުގައި މިއަދު ވެސް ދެ މެޗެއް ކުޅޭނެ އެވެ. މިއަދު ހަވީރު ކުޅޭ މެޗުގައި އެފްއެސްއެމް ނިކުންނާނީ އެމްއެންޑީއެފްއާ ދެކޮޅަށެވެ. އެފްއެސްއެމް ޓީމްގައި ހިމެނޭ ފާހަގަކޮށްލެވޭ ކުޅުންތެރިންނަށް ބަލާއިރު ޕާކިސްތާން ގައުމީ ޓީމްގެ މުބައްޝިރު ރަޒާ، ގައުމީ ޓީމްގެ ސެޓަރު ހުސައިން ވިޝާމް (ބުޅިކޭ) އަދި ގައުމީ ޓީމްގެ އެޓޭކަރު ހަސަން ނިލާމް (ޕާޓޭ) ހިމެނެ އެވެ.

އެމްއެންޑީއެފް ޓީމްގައި ގައުމީ ބީޗްވޮލީ ޓީމްގެ އާދަމް ނަސީމް (އެޑަމް) އާއި ގައުމީ ޓީމްގެ ކުރީގެ އެއްވަނަ އެޓޭކަރު އަހުމަދު އަބްދުލްކަރީމް (ލޯންގޭ) ހިމެނެ އެވެ. މިރޭ ކުޅޭ މެޗުގައި ސްޓެލްކޯ ނިކުންނާނީ ޕޮލިހާ ދެކޮޅަށެވެ.