ކޮރަޕްޝަންގެ ކުށް ސާބިތުވެ ބަންދުކޮށްފައި ހުރި އިރާގުގެ ކުރީގެ ދީނީ އޮފިޝަލަކު ފުލުހުންގެ އެހީއާ އެކު ފިލައިފި އެވެ.

ރިޕޯޓުތައް ބުނާ ގޮތުން ސުންނީ ވަގުފު ފަންޑު ބެލެހެއްޓި ސާދް ގަމްބާޝް ފިލުމުން ގިނަ އަދަދެއްގެ ފުލުހުން ވަނީ ހައްޔަރުކޮށްފަ އެވެ.

ސާދް ގަމްބާޝް ހަތަރު އަހަރަށް ޖަލަށް ހުކުމް ކުރީ މި މަހުގެ ކުރީކޮޅު އެވެ. އަންގާރަ ދުވަހުގެ ރޭ އޭނާ ބަގުދާދުގެ ޕޮލިސް ސްޓޭޝަނަކުން ފިލީ ބައެއްގެ އެހީއާ އެކު ކަމަށް ސަރުކާރުން ބުނެ އެވެ.

ފިލަން އެހީވި ކަމަށް ތުހުމަތު ކުރެވޭ މީހުން ހައްޔަރު ކުރީ ހެކީގެ ގޮތުގައި ހޯދި ލިޔުންތަކެއްގެ ބޭނުންކޮށްގެން ކަމަށް އިދާރާތަކުން ބުނެ އެވެ.

އިންޓީރިއާ މިނިސްޓްރީއިން ބުނީ އަށް ފުލުސް އޮފިސަރުންނާއި 18 އޭޖެންޓުން ހައްޔަރުކޮށްފައިވާ ކަމަށެވެ.

ސުންނީ ވަގުފު ފަންޑުގެ ވެރިޔާކަމުން ސާދް ގަމްބާޝް ވަކިކުރީ މާޗް 2022 ގަ އެވެ. ކޮރަޕްޝަންގެ ތުހުމަތުގައި ހައްޔަރު ކުރީ އޭގެ ފަހުންނެވެ.

ހަތަރު އަހަރުގެ ޖަލު ހުކުމެއް އިއްވީ ވަގުފު ފަންޑުގެ 36 މިލިއަން ޑޮލަރު ބޭނުންކޮށްގެން ހޮޓަލެއް ގަތް ކަމަށް ސާބިތުވުމުންނެވެ.

އިރާގުގައި ކޮރަޕްޝަން ވަރަށް ބޮޑަށް އޮވެ އެވެ. މިދިޔަ ނޮވެމްބަރު މަހު އިދާރާތަކުން ބުނީ ޓެކްސް އޮފީސްތަކުން 2.5 ބިލިއަން ޑޮލަރު ވަގަށް ނަގާފައިވާ ކަމަށެވެ.