ލަންޑަން (އޭޕްރީލް 3) - ޗެލްސީ ހާލަތު ގޯހުން ގޯހަށް ދާތީ އެ ޓީމުގެ ކޯޗުކަމުން ގްރަހަމް ޕޮޓާ ވަކިކުރަން އެ ކްލަބުން ނިންމައިފި އެވެ.

ޗެލްސީން ޕޮޓާ ވަކިކުރަން ނިންމިއިރު، ލީގުގައި އެ ޓީމު ރޭ ކުޅުނު މެޗުން އަމިއްލަ ދަނޑުގައި އެސްޓަން ވިލާ އަތުން 2-0 އިން ބަލިވެ، ވަނީ 11 ވަނަ އަށް ވެއްޓިފަ އެވެ.

ޕޮޓާ އަކީ މި ސީޒަނުގައި ޗެލްސީން ވަކިކުރި ދެ ވަނަ ކޯޗެވެ. ޗެލްސީގެ ކޯޗަކަށް ޕޮޓާ ގެނައީ މިދިޔަ ސެޕްޓެމްބަރު މަހު ތޯމަސް ޓުޗެލް މަގާމުން ވަކިކުރުމަށް ފަހު އެވެ. ޓުޗެލް ވަނީ ދާދި ފަހުން، ބަޔާން މިއުނިކްގެ ކޯޗުކަމާ ހަވާލުވެފަ އެވެ. ޕޮޓާ އަށް ޗެލްސީގެ ކޯޗުގެ މަގާމުގައި ހުރެވުނީ ހަތް ވަރަކަށް މަސް ދުވަހު އެވެ.

މި ސީޒަން ފެށިއިރު، ބްރައިޓަންގެ ކޯޗަކަށް ހުރި ޕޮޓާ ގެންނަން ނިންމީ ޗެލްސީގެ ވެރިޔާ އެމެރިކާގެ މަހުޖަނު، ޓޮޑް ބޯލީ އެވެ. ބޯލީ ޗެލްސީ ހިންގަން ހަވާލުވިތާ 100 ވަނަ ދުވަހު ޕޮޓާ، އެ ޓީމުގެ ކޯޗަކަށް ހަމަޖެއްސީ ފަސް އަހަރުގެ ކޮންޓްރެކްޓެއްގަ އެވެ.

އެކަމަކު، މިދިޔަ ސެޕްޓެމްބަރު މަހު އަށް ވަނަ ދުވަހު ޗެލްސީގެ ކޯޗަކަށް ގެނައި ޕޮޓާ، އަހަރެއް ވެސް ނުވަނިސް މަގާމުން ދުރުކުރަން ޖެހުނީ ޓީމުގެ ނަތީޖާތަށް ވަރަށް ބޮޑަށް ގޯސްވެ، ކްލަބްގެ ސަޕޯޓަރުންގެ ޕްރެޝަރު ވެސް ބޮޑުވެފައިވާތީ އެވެ.

ޕޮޓާގެ ކޯޗުކަމުގައި ޗެލްސީން ނުކުމެފައިވަނީ 31 މެޗަށެވެ. އޭގެ ތެރެއިން 12 މެޗުން މޮޅުވިއިރު، 11 މެޗުން ބަލިވީ އެވެ. އަދި އަށް މެޗު ނިމިފައިވަނީ އެއްވަރުވެގެންނެވެ. މީގެ ތެރެއިން ޕްރިމިއާ ލީގުގައި ޕޮޓާ، ޗެލްސީ ގޮވައިގެން ނުކުތް 22 މެޗުގެ ތެރެއިން މޮޅުވީ ހަތް މެޗުންނެވެ.