ގއ. ކަނޑުހުޅުދޫ ޒުވާނަކު ގެއްލިގެން ހޯދަމުން ދަނިކޮށް ސައިކަލާއެކު މޫދުގައި މަރުވެފައި އޮއްވާ މިއަދު ފެނިއްޖެ އެވެ.

ފުލުހުން ބުނީ އުމުރުން 24 އަހަރުގެ އެ ޒުވާނާ ގެއްލުނީ ފަތިހު 4:25 ހާއިރު ކަމަށެވެ. އޭނާ ފެނުނީ ސައިކަލާއެކު ރަށުގެ ފަޅު ތެރޭގައި އޮއްވަ އެވެ.

"އާއިލާ މީހުންނާއެކީ ފުލުހުން އޭނާ ހޯދަމުންދަނިކޮށް ފެނިފައި ވަނީ ސައިކަލާއެކު ރަށުގެ ފަޅު ތެރޭ މޫދުން،" މީޑިއާ ފުލުހުން ފޮނުވި މެސެޖެއްގައި ބުނެފައިވެ އެވެ.

ފުލުހުން ބުނީ އޭނާ އެ ރަށު ހެލްތު ސެންޓަރަށް ގެންދިޔައިރު ވެސް އޮތީ މަރުވެފައި ކަމަށެވެ.

އެކަން ހިނގައިދިޔަ ގޮތް ބެލުމަށް ފުލުހުން މިހާރު މަސައްކަތް ކުރަމުންދާ ކަމަށް ވެސް އެ އިދާރާއިން ބުންޏެވެ.