މި ސަރުކާރު ވެރިކަމަށް ގެންނަން ޖުމްހޫރީ ޕާޓީ (ޖޭޕީ) އިން މަސައްކަތް ކުރީ ފަސް އަހަރުގެ މުއްދަތަކަށް ކަމަށާއި، ދައުރު ހަމަވުމުގެ ކުރިން އެ ކޯލިޝަނުން ޖޭޕީ ބޭރުކުރާނަމަ، ރައީސް އިބްރާހިމް މުހައްމަދު ސޯލިހު ވެސް އިސްތިއުފާ ދެއްވަންޖެހޭނެ ކަމަށް އެ ޕާޓީގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެވެ.

އަންނަ ރިޔާސީ އިންތިހާބުގައި ކޯލިޝަން ހެދުމަށް ދައުވަތު ދީފައިވަނިކޮށް، ރައީސް ސޯލިހުއާ އެކު ކޯލިޝަން ހެދުމުގެ ބަދަލުގައި ޖޭޕީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން އެ ޕާޓީން ރޭ ވަނީ ނިންމައިފަ އެވެ.

އެއާއެކު، ސަރުކާރު ހިންގާ ކޯލިޝަނުން މިހާރު މިހާރަށް ޖޭޕީ ބޭރުކޮށް، ސަރުކާރުގެ މަގާމުތަކުގައި ތިއްބެވި އެ ޕާޓީގެ ބޭފުޅުން މަގާމުން ވަކި ކުރުމަށް އެމްޑީޕީގެ ތެރެއިން ވަނީ ގޮވާލަން ފަށައިފަ އެވެ.

އެ ވާހަކަ ސަރުކާރަށް ތާއީދުކުރައްވާ މެމްބަރުން މަޖިލީހުގެ މިއަދުގެ ޖަލްސާގައި ކުރިއަށްދާ ބަހުސްގެ ތެރެއިން ތަކުރާރުކުރައްވާތީ، ގާސިމް ވަނީ އެކަމަށް ރައްދު ދެއްވައިފަ އެވެ.

ބަހުސްގެ ތެރެއިން ވާހަކަ ދައްކަވަމުން، ޖޭޕީގެ ރިޔާސީ ކެނޑިޑޭޓުގެ ގޮތުގައި ވެސް ހުންނެވި ގާސިމް ވިދާޅުވީ މިހާރު އޮތް ކޯލިޝަން ވެރިކަމަށް ގެންނަން މަސައްކަތް ކުރީ އެއްބަސްވުމެއްގެ ދަށުން ކަމަށެވެ.

އެ އެއްބަސްވުމަކީ މިއަހަރުގެ ނޮވެމްބަރު މަހުގެ 18 ވަނަ ދުވަހާ ހަމައަށް ދެމިގެންދާ އެއްބަސްވުމެއް ކަމަށާއި، އެ ތާރީހާ ހަމައަށް ސަރުކާރުގެ މަގާމުތަކުގައި ޖޭޕީ މެމްބަރުން ތިބުމަކީ "ލަދުވެތި" ކަމެއް ނޫން ކަމަށް އެމްޑީޕީގެ މެމްބަރުންނަށް ރައްދު ދެއްވައި ގާސިމް ވިދާޅުވި އެވެ.

"އެހެންކަމަށްވަންޏާ ރައީސުލްޖުމްހޫރިއްޔާ ވެސް ޖެހޭނީ އިސްތިއުފާ ދެއްވާށޭ. އެހެންނޫން ކަމަށްވަންޏާ އަޅުގަނޑު ދަންނަވާލަން ޖުމްހޫރީ ޕާޓީއަށް މަގާމުތަކެއް ދެއްވާފައިވަނީ އެއްވެސް މީހެއްގެ ތަރިކަ މުދަލަކުން ނޫން،" ގާސިމް ވިދާޅުވި އެވެ.

އެހެންކަމުން ގާސިމް ވިދާޅުވީ، މި ހިނގާ ރިޔާސީ ދައުރު ނިމުމުގެ ކުރިން ޖޭޕީގެ އެއްވެސް ބޭފުޅަކު ސަރުކާރުން އިސްތިއުފާ ދިނުމަށް ނުދަންނަވާނެ ކަމަށެވެ.

ގާސިމްގެ ވާހަކައިގެ ތެރެއިން މިއަދު ވެސް ވަނީ ކޯލިޝަނުގެ އެއްބަސްވުމުގައިވާ ގޮތަށް ޖޭޕީއަށް ދޭން ބުނި މިންވަރަށް ސަރުކާރުގެ ހިއްސާ ނުދޭ ކަމަށް ވިދާޅުވެފަ އެވެ.

ސަރުކާރުން ބުނަނީ ކީކޭ؟

ޖޭޕީން ވަކިން ވާދަކުރަން ނިންމުމުން، ސަރުކާރުގައި ތިބި އެ ޕާޓީގެ މެމްބަރުންނާމެދު ކަންތައް ކުރާނެ ގޮތަކާމެދު ސަރުކާރުން ސީދާ ވަކި އެއްޗެއް ނުބުނެ އެވެ.

ނަމަވެސް، ސެޕްޓެމްބަރު 9 ގައި އޮންނަ ރިޔާސީ އިންތިހާބަށް ކޯލިޝަން އެކުލަވާލަން މިހާރުގެ ސަރުކާރުގެ ކޯލިޝަން ޕާޓްނަރުންނަށް ދައުވަތު ފޮނުއްވާފައިވާއިރު، އެއަށް ޖުމްހޫރީ ޕާޓީއިން އަދި ޖަވާބެއް ދީފައި ނުވާ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު "އަދަދު" އަށް މިއަދު ވިދާޅުވި އެވެ.

"ޖުމްހޫރީ ޕާޓީއިން ރިޔާސީ ކެންޑިޑޭޓަކު ނެރޭނަމަ، ސަރުކާރުގައި ދެ ރިޔާސީ ކެންޑިޑޭޓުން ތިބެގެން ކުރިއަށް ވަޑައިގަތުމަށް ދަތިވާނެ،" ކޯލިޝަނުން ޖޭޕީ ބޭރުކުރުމަށް ނުސީދާކޮށް އިޝާރާތް ކުރައްވަމުން މިއުވާން ވިދާޅުވި އެވެ.

އެފަދަ ހާލަތެއްގައި މިއުވާން ވިދާޅުވި ގޮތުގައި، ދެން ކަންތައް ކުރައްވާނެ ގޮތަކާ މެދު ރައީސް ޖުމްހޫރީ ޕާޓީގެ ލީޑާޝިޕާއި ގާސިމްއާ އެކު މަޝްވަރާކުރައްވާނެ އެވެ.