ލަންޑަން (މާޗް 7) - މިހާރު ކުރިއަށްދާ މެޗުތަކުގައި މަސައްކަތްކުރަމުން އަންނައިރު، ފޯކަސް ބަހައްޓަނީ ހަމައެކަނި ޗެލްސީގެ ވަޒީފާ ސަލާމަތްކުރަން ނޫން ކަމަށް ޗެލްސީގެ ކޯޗު ގްރަހަޕް ޕޮޓާ ބުނެފި އެވެ.

އެންމެ ފަހުން ޗެލްސީ ކުުޅުނު މެޗުން އިނގިރޭސި ޕްރިމިއާ ލީގުގައި 1-0 އިން ލީޑްސް ޔުނައިޓެޑް އަތުން މޮޅުވިއިރު، މިއީ 50 ވަރަކަށް ދުވަހުގެ ތެރޭގައި ކުޅުނު 8 މެޗުގެ ތެރެއިން ޗެލްސީން މެޗެއް ކާމިޔާބުކުރި ފުރަތަމަ ފަހަރެވެ.

ޕްރެޝަރު ހާލަތެއްގައި އޮވެ، ހޯދުނު އެ މޮޅަކީ ހިތްހަމަ ޖެހުމެއް ކަމަށް ޕޮޓާ ވަނީ ބުނެފަ އެެވެ.

"ތެދެއް، މޮޅުވުމަކީ ފުޓްބޯޅައިގައި ކުރިއަށްދާން ލިބޭ ހިތްވަރެއް. އެކަމަކު، މީގެ އަހަރެމެންނަށް ލީޑްސް މެޗު މޮޅުވެގެންނޭ ކިޔާފައި ފަސޭހަކޮށްލެވޭ ކަމަށް ނުދެކެން. ފުޓްބޯޅައިގައި އެއް މެޗުން އަނެއް މެޗަށް ފޯކަސް ބެހެއްޓުން އެންމެ މުހިންމު ކަމަކީ، ވަރަށް ގާތްގާތުގައި އެއް މެޗުން އަނެއް މެޗަށް ފޯކަސް ބަދަލުކުރަން މި ޖެހެނީ،" ޕޮޓާ ބުންޏެވެ.

އިނގިރޭސި ބައެއް މީޑިއާ ރިޕޯޓްތައް ބުނާގޮތުން ލީޑްސް އާއި ޑޯޓްމަންޑް އަތުން ޗެލްސީ ކުރިހޯދައިފިނަމަ ޕޮޓާ އަށް ޗެލްސީގެ ކޯޗުގެ މަގާމުގައި ދެމިހުރެވޭނެ އެވެ.

ޑޯޓްމަންޑް އަތުން ޗެލްސީ ވަނީ ފުރަތަމަ ލެގުގައި 1-0 އިން ބަލިވެފަ އެވެ. އެ ނަތީޖާ އަނބުރާލައި، ޗެލްސީން ޗެމްޕިއަންސް ލީގުގެ ކުއާޓާ ފައިނަލަށް ދަތުރުކޮށްފިނަމަ މިއީ ޕޮޓާ އަށް ޗެލްސީގައި މަޑުކުރަން ބޭނުންވާ ހުރިހާ ކަމެއް ބަދަލުވާނެ ހާލަތެއް ގެނެވޭނެ ފުރުސަތެއް އޮތް މެޗެއް ނޫންތޯ ސުވާލުކުރުމުން އެ އަށް ސީދާ ޖަވާބެއް ދޭން ދެކޮޅު ހެދި އެވެ.

"ތި ހީކުރަނީ އަހަރެންގެ ހުރިހާ ފޯކަސް އެއް ހުރީ ވަޒީފާ ސަލާމަތްކުރަންތޯ؟ ނޫން، އެހެނެއް ނޫން. އަހަރެން ބޭނުމީ ޗެލްސީ އަށް ރަނގަޅު ގޮތް، އަހަރެން ކޯޗުކޮށްދޭ ޓީމަށް ކާމިޔާބު، އަހަރެން އަބަދުވެސް މި ބުނަނީ ގުޅިގެން މަސައްކަތް ކޮށްފިއްޔާ މެޗުތަކަކުން މޮޅުވެގެން މި ހާލަތު ބަދަލުކުރެވޭނެއޭ،" ބްރައިޓަން ދޫކޮށް މި ސީޒަނުގައި ޗެލްސީއާ ހަވާލުވި ޕޮޓާ ބުންޏެވެ.

ޗެލްސީން މިރޭ ޑޯޓްމަންޑް ކައިރިން ނަތިޖާ އަނބުރާލަން ބޭނުންނަމަ ޑިސެމްބަރު 27 ގެ ފަހުން ފުރަތަމަ ފަހަރަށް އެއް މެޗެއްގައި އެއް ގޯލަށް ވުރެ އިތުރަށް ޖަަހަން ޖެހޭނެ އެވެ. ޗެލްސީން އެންމެ ފަަހުން އެއް މެޗެއްގައި އެއް ގޯލަށް ވުރެ އިތުރަށް ޖެހީ ޑިސެމްބަރު މަހު 27 ގައި ޕްރިމިއާ ލީގުގައި ބޯންމައުތު އަތުން 2-0 އިން މޮޅުވި މެޗުގަ އެވެ.

މިރޭގެ މެޗަށް ޗެލްސީ ނުކުންނައިރު، އަނިޔާއިން ރަނގަޅުވެގެން އެންގޯލޯ ކާންޓޭ އަންނަނީ ޕްރެކްޓިހުގައި ބައިވެރިވަމުންނެވެ. އަނެއްކޮޅުން، ޗެލްސީގެ ރީސް ޖޭމްސް އާއި ކްރިސްޓިއަން ޕުލިސިޗް ވެސް މި މެޗުގައި ފެނުމުގެ ފުރުސަތު އެބައޮތެވެ.