ލަންޑަން (ފެބްރުއަރީ 22) - ޗެލްސީގެ ފޯމު ދަށްވިޔަސް، އެ ކްލަބްގެ ޗެއާމަން ޓޮޑް ބޯލީ އާއި ކްލަބުގެ ބޯޑުގެ ތާއީދު ޗެލްސީގެ ކޯޗު ގްރަހަމް ޕޮޓާ އަށް އެބައޮތް ކަމަށާއި އޭނާ މަސައްކަތާއި ދުރު ވިސްނުމަށް ކްލަބުގެ ބޯޑުގެ އިތުބާރު އޮތްކަން ހާމަވެއްޖެ އެވެ.

ޗެލްސީ އެންމެ ފަހުން ކުޅުނު 14 މެޗުގެ ތެރެއިން މޮޅުވީ ދެ މެޗުންނެވެ. އެންމެ ފަހުން ޕްރިމިއާ ލީގުގައި ކުޅުނު މެޗުގައި ޗެލްސީ ވަނީ ސައުތުހެމްޓަން އަތުން އަމިއްލަ ދަނޑުގައި 1-0 އިން ބަލިވެފަ އެވެ.

ތޯމަސް ޓުޗެލް ޗެލްސީގެ ކޯޗުކަމުން ވަކިކޮށް، މިދިޔަ ސެޕްޓެމްބަރު މަހު އެ މަގާމަށް ހަމަޖެއްސި ޕޮޓާ މަގާމުން ވަކިކުުރުމަށް ގޮވާލައި، ގިނަ ސަޕޯޓަރުން ދަނީ ހިތްހަމަނުޖެހުން ފާޅުކުރަމުންނެވެ. އަދި އޭނާ މަގާމުން ވަކިކުރަންޖެހޭ ކަމަށް ބައެއް ތަޖުރިބާކާރުން ވެސް އަންނަނީ ބުނަމުންނެވެ.

މީގެ އެންމެ ބޮޑު އެއް ސަބަބަކީ ޖެނުއަރީ މަހުގެ ޓްރާންސްފާގައި ވެސް ޗެލްސީން ބޮޑު ހޭދައެއްކޮށް، އަށް ކުޅުންތެރިން ޓީމަށް އިތުރުކުރުމެވެ. އެންމެ ފަހުގެ ދެ ޓްރާންސްފާގައި ޗެލްސީން ވަނީ އާ ކުޅުންތެރިން ހޯދުމަށް 600 މިލިއަން ޑޮލަރަށް ވުރެ ގިނައިން އިންވެސްޓްކޮށްފަ އެވެ.

އެހެން ނަމަވެސް، ރިޕޯޓްތައް ބުނާގޮތުން ޗެލްސީގެ ބޯޑުގެ ވިސްނުން ތަފާތެވެ. ޗެލްސީގެ ބޯޑުން ޕޮޓާއާ ހަވާލުކުރީ ދިގު މުއްދަތުގެ ޕްރޮޖެކްޓެވެ. އަދި އަލަށް ގެނައި ކުޅުންތެެރިންނާ އެކު، ރަނގަޅު ޓީމެއް ބިނާކުރުމަށް ޕޮޓާ އަށް ވަގުތު ބޭނުންވާނެ ކަމަށް ޗެލްސީގެ ބޯޑުން ގަބޫލުކުރެއެވެ.

މީގެ އިތުރުން، މި ސީޒަންގައި ޗެލްސީގެ ގިނަ ކުޅުންތެރިންތަކަކަށް ދިމާވެފައިވާ އަނިޔާގެ މައްސަލަތަކާހެދި، ޕޮޓާގެ މަސައްކަތަށް ދަތިތަކެއް ކުރިމަތިވެފައިވާ ކަމަށް ބޯޑުން ގަބޫލު ކުރެ އެވެ.

ޕޮޓާގެ އިރުޝާދުގެ ދަށުން ޗެލްސީ ޕްރިމިއާ ލީގުގައި ކުޅުނު 25 މެޗުގެ ތެރެއިން މޮޅުވެފައިވަނީ ނުވަ މެޗުންނެވެ. ޗެލްސީ މި ވަގުތު އޮތީ ލީގުގެ 10 ވަނައިގަ އެވެ.