ޕެރިސް (ފެބްރުއަރީ 20) - ފްރާންސް ލީގުގައި ލިއޮނަލް މެސީ، މެޗުގެ އިތުރު ވަގުތުގައި ޖެހި ހިލޭ ޖެހުމުން ޕީއެސްޖީން މިރޭ 4-3 އިން ލިލް އަތުން މޮޅުވެއްޖެ އެވެ.

މި މޮޅާ އެކު ޕީއެސްޖީ ލީގުގެ އެއް ވަނައިގައި އޮތީ 24 މެޗުން 57 ޕޮއިންޓް ހޯދައިގެންނެވެ. ދެ ވަނައިގައި އޮތް މޮނާކޯ އިން މިރޭ ބްރެސްޓް ދަނޑުގައި 2-1 އިން މޮޅުވިއިރު، މޮނާކޯ އަށް ވަނީ 24 މެޗުން 50 ޕޮއިންޓް ލިބިފަ އެވެ.

ޕީއެސްޖީން ލީޑުނެގީ މެޗުގެ 11 ވަނަ މިނިޓްގައި ކީލިއަން އެމްބާޕޭ ޖެހި ގޯލުންނެވެ. މިއީ ނޭމާ ދިން ބޯޅައެއް ހިފައިގެން އޭރިއާތެރެއިން ލިލްގެ ދެ ކުޅުންތެރިން ކައިރިން ދެމިގަތުމަށް ފަހު އެމްބާޕޭ ޖެހި އިންޑިވިޖުއަލީ މޮޅު ގޯލެކެވެ. އޭގެ ހަ މިނިޓް ފަހުން، މެޗުގެ 17 ވަނަ މިނިޓްގައި ޕީއެސްޖީން ލީޑުފުޅާކުރީ މެޗުގައި ކުޑަހުޅަށް އަނިޔާވެގެން އަށިގަނޑުގައި ބާލަން ޖެހުނު ނޭމާ އެވެ. އޭރިއާތެރެއިން ވިޓީނިއާ ދިން ބޯޅަ ނޭމާ ވަނީ ގޯލަށް ވައްދާލައިފަ އެވެ. ނޭމާ، ކުޑަހުޅަށް އަނިިޔާވެގެން ބަދަލުުކުރީ ދެ ވަނަ ހާފުގެ ކުރީކޮޅުގަ އެވެ.

މި މެޗުގައި ޕީއެސްޖީން ދެ ގޯލުގެ ލީޑެއް ނެގި ނަމަވެސް ލިލް އިން ވަނީ ނަތީޖާ އަނބުރާލައިފަ އެވެ. މެޗުގެ 24 ވަަނަ މިނިޓްގައި ލިލްގެ ފުރަތަމަ ގޯލު ޖެހީ އަންދްރޭ ގޯމޭޒް ނެގި ހިލޭ ޖެހުމަކުން ބަފޯޑް ޑިއަކީޓޭ ބޮލުންނެވެ. އެ ޓީމަށް އެއްވަރުކޮށްދިނީ 58 ވަަނަ މިނިޓްގައި ޕެނަލްޓީ އަކުން ޖޮނަތަން ޑޭވިޑް އެވެ. މިއީ ޕީއެސްޖީގެ މާކޯ ވެރާޓީ ކުރި ފައުލަކަށް ދިން ޕެނަލްޓީ އެކެވެ. އޭގެ 10 މިނިޓް ފަހުން، މެޗުގެ 68 ވަނަ މިނިޓްގައި އޭރިއާތެރެއިން ޖޮނަތަން ބަމްބާ ވަނީ ގޯލެއް ޖަހައި ލިލް އަށް ލީޑުނަގައިދީފަ އެވެ.

ޕީއެސްޖީން ގިނަ އެޓޭކްތަކެއް ކުރި މި މެޗުގައި އެ ޓީމަށް އެއްވަރުކޮށްދިނީ 87 ވަނަ މިނިޓްގައި އެމްބާޕޭ އެވެ. މިއީ އޭރިއާތެރެއިން ހުއާން ބާނާޓް ޖައްސާލި ބޯޅައެއް ތިރިތިރިން ގޯލުގެ ކައިރީ ކަނަށް ފޮނުވާލައިގެން އެމްބާޕޭ ޖެހި ގޯލެކެވެ. މެޗުގެ އިތުރު ވަގުތުގެ ހަތް މިނިޓްގެ ތެރެއިން ފަސް ވަނަ މިނިޓްގައި މެސީ ވަނީ ހިލޭ ޖެހުމަކުން ގޯލު ޖަހައި ޕީއެސްޖީ މޮޅުކޮށްދީފަ އެވެ. މެސީ ފޮނުވާލި ހިލޭ ޖެހުން ގޯލަށް ވަނީ ދަނޑީގައި ޖެހިފަ އެވެ.

މެޗަށް ފަހު ޕީއެސްޖީން ނޭމާގެ އަނިޔާގެ ތަފްސީލް ދެނެގަންނަން ހެދި ފުރަތަމަ ޓެސްޓްތަކުން ފައިގެ ކުޑަހުޅުގައި ރެނދެއް ލާފައި ނެތްކަން އެނގޭ ކަމަށް އެ ކްލަބާ ހަވާލާދީ ފްރާންސްގެ ނޫސްތަކުން ވަނީ ރިޕޯޓްކޮށްފަ އެވެ. އެކަމަކު، ތަފްސީލް އެނގޭ ވަރުގެ ރިޕޯޓެއް ލިބެން އޮތީ 24 ގަޑިއިރަށް ފަހު، ހަދާ ޓެސްޓްތަކުން ކަމަށް ޕީއެސްޖީގެ އޮފިޝަލަކު ވަނީ ފްރާންސްގެ ލެކިއުޕޭ ނޫހަށް ދިން އިންޓަވިއުއެއްގައި ބުނެފަ އެވެ.

ނޭމާ އަކީ މި ސީޒަނުގައި ޕީއެސްޖީ އަށް ރަނގަޅު ފޯމެއްގައި ހުރި ކުޅުންތެރިއެކެވެ. ލީގުގައި ނޭމާ ވަނީ 13 ގޯލު ޖަހައި 10 ގޯލު ޖަހަން ފުރުސަތު ތަނަވަސްކޮށްދީފަ އެވެ.