އައްޑޫ ސިޓީގައި ޓޫރިޒަމް ފުޅާކުރުމަށް ކުރަމުންދާ މަސައްކަތްތަކުގެ ތެރެއިން ހަންކެޑެ ސަރަހައްދުގައި 1041 ކޮޓަރި ތަރައްގީ ކުރުމުގެ މަޝްރޫއު މިއަދު އިއުލާންކޮށްފި އެވެ.

ރައީސް އިބްރާހިމް މުހައްމަދު ސޯލިހު ނެރުއްވި ހާއްސަ ގަރާރެއްގެ ދަށުން ޓޫރިޒަމް އާމްދަނީ އިތުރުކުރުމުގެ ގޮތުން ބިދޭސީންނަށް ގެދޮރު ވިއްކަން ސަރުކާރުން ކުރިއަށްގެންދާ ރިއަލް އެސްޓޭޓް ޓޫރިޒަމް ޕްރޮޖެކްޓު ހިންގުމަށް ހަންކެޑެ ހަވާލުކޮށްފައި އޮތީ މޯލްޑިވްސް ފަންޑު މެނޭޖުމަންޓު ކޯޕަރޭޝަން (އެމްއެފްއެމްސީ) އާ އެވެ.

ހަންކެޑެ ތަރައްގީކުރާނެ ގޮތުގެ ޑިޒައިންތަކާ އެކު އެމްއެފްމްސީން މިއަދު ވަނީ އެ ޕްރޮޖެކްޓު އިއުލާނުކޮށްފަ އެވެ. ނަމަވެސް، ޕްރޮޖެކްޓު ކޮންޓްރެކްޓުކޮށް އަމަލީ މަސައްކަތް ފަށާނެ ދުވަހެއް ހާމަކޮށްފައެއް ނުވެ އެވެ.

ސައްތައިން ސައްތަ ސަރުކާރުގެ ހިއްސާ އޮންނަ އެމްއެފްމްސީން "ހަންކެޑެ އިންޓެގްރޭޓެޑް ޓޫރިޒަމް ޕްރޮޖެކްޓު" ސިފަކޮށްފައި ވަނީ އައްޑޫގެ އިގްތިސާދަށް އާ ދިރުމެއް ގެންނާނެ މަޝްރޫއުއެއްގެ ގޮތުގަ އެވެ.

މި މަޝްރޫއުއާ އެކު ހުޅިވިގެންދާ ފުރުސަތުތަކުން އައްޑޫގައި އިތުރު ވަޒީފާތައް އުފެދި ކުދި އަދި މެދު ފަންތީގެ ވިޔަފާރިތައް ކުރިއަރައިދިޔުމަށް މަގުފަހިވެގެންދާނެ ކަމަށް އެމްއެފްއެމްސީން ބުނެ އެވެ.

ރިއަލް އެސްޓޭޓުގެ ބޭނުމަށް ކަނޑައަޅާ ސަރަހައްދުތަކުގެ ބިން ހިއްކުމާއި، ކުއްޔަށް ދިނުމުގެ ކަންކަން ކުރަނީ އެމްއެފްއެމްސީންނެވެ.

ސަރުކާރުން އަމާޒު ހިފާފައި ވަނީ އައްޑޫ ސިޓީގައި 8،000 އެނދު ތަރައްގީ ކުރުމަށެވެ. އެ އަމާޒަށް ވާސިލުވުމުގެ ގޮތުން ބިން ހިއްކައި ރިސޯޓު ތަރައްގީ ކުރުމަށް ވެސް ދަނީ ތައްޔާރުވަމުންނެވެ.